Joel 2 - Ti Biblia (1973)

Ni Joel icasabana ti panagbabawi. Ti Espiritu ti Dios maicari.

¹ Puyotenyo ti tangguyob idiay Sion, ket pagunienyo ti panagbuac iti nasantoan a bantayco; amin dagiti agnaed iti daga agkintayegda coma; ta ti aldaw ni Jehova umay, ta adda iti asidegen;

² Aldaw a nasipnget ken nacudrep, aldaw dagiti ul-ulep ken napuscol a sipnget, a cas ti bannawag nga agsacnap iti rabaw dagiti banbantay; maysa nga ili a dackel ken nabileg; uray caanoman awan ti pumadpad, ket awanton uray pay iti calpasanda uray cadagiti tawtawen dagiti adu a caputotan.

³ Maysa nga apuy aglamut iti sangoananda; ket iti licudanda maysa a gil-ayab a mangoram; ti daga cas ti minuyungan ti Eden iti sangoananda, ket iti licudanda maysa a langalang a let-ang, wen, ket awan ti nacatalaw cadacuada.

⁴ Ti langada casla langa dagiti cabayo; ket cas tattao a nagsacay iti cabayo, casta ti panagtarayda.

⁵ Cas iti daranudor dagiti lugan cadagiti tapaw dagiti banbantay casta ti panaglagtoda; cas ti anabaab ti gil-ayab ti apuy a manglamut iti punget, cas maingel nga ili a maurnos a maipaay iti gubat.

⁶ Iti sangoananda, dagiti il-ili agtuocda; amin a ruprupa bumsagda.

⁷ Agtarayda a cas la mamaingel a tattao; cumalayatda iti bacud a cas la tattao ti gubat; ket isuda magnada tunggal maysa iti dalanna, ket saanda a dadaelen dagiti intarda.

⁸ Awan met ti agdudungpar cadacuada; magnada tunggal maysa iti danana; ket rimmubsida cadagiti igigam dagiti cabusor, ket saan a madadael ti turongda.

⁹ Lumagtoda iti ili; agtarayda iti rabaw ti bacud; agcalay-atda cadagiti balbalay; sumrecda cadagiti tawtawa a cas la mannanacaw.

¹⁰ Agkintayeg ti daga iti sangoananda; dagiti langit agpigergerda; ti init ken ti bulan agridemda, ket dagiti bitbitwen ipaidamda ti silengda.

¹¹ Ket ni Jehova agtimec iti sangoanan ti buyotna; ta ti pacarsona dackel unay; ta isu napigsa a manungpal iti saona; ta ti aldaw ni Jehova dackel ken nacaal-alingec unay; ket asino ti macaitured?

¹² Uray pay ita, cuna ni Jehova, agsublicayo caniac, iti amin a pusoyo, ken buyugen ti panagayunar, ken panagsangit, ken panagpanes:

¹³ Ket pigisenyo ti pusoyo, a saan a dagiti cawesyo, ket agsublicay ken Jehova a Diosyo; ta isu managparabur ken manangngaasi, natanang nga agunget, ket aglablabes iti kinamanangngaasi, ket isu ibabawina ti dakes.

¹⁴ Asino ti macaammo no isu saanto nga agbaliw ken agbabawi, ket mangibati iti maysa a bendicion iti licudanna, uray pay maysa a daton a macan ken maysa a daton a mainum a maipaay ken ni Jehova a Diosyo?

¹⁵ Pagtimekenyo ti tangguyob idiay Sion, mangilasincayo iti maysa a panagayunar, mangayabcayo iti maysa a nangayed a gimong;

¹⁶ Tiponenyo dagiti tattao, pasantoenyo ti gimongda, tiptiponenyo dagiti lallacay, urnongenyo dagiti ub-ubbing, ken dagiti agsuso; rumuar coma ti novio iti siledna, ken iti novia iti sagumbina.

¹⁷ Dagiti papadi, nga aganannong ken ni Jehova agsangitda coma iti nagbaetan ti duag ken ti altar, ket cunaenda coma, Ilacsidmo ti ilim, O Jehova, ket dica coma yawat ti patawidam iti pannacaibabain, tapno dagiti nasnacion agturayda coma cadacuada: ania ti gapu a cunaenda coma cadagiti il-ili, Sadino ti yan ti Diosda?

¹⁸ Idin ni Jehova naimon gapu iti dagana, ket kinaasianna ti ilina.

¹⁹ Ket ni Jehova simmungbat ket kinunana iti ilina, Adtoy, ipawitconto cadacayo ti bukel, ken baro nga arac, ken lana, ket mapneccayto cadacuada; ket saancayto a pabainanen iti nagtengaan dagiti nasnacion;

²⁰ No di ket yadayucto cadacayo ti makinamianan a buyot, ket isu ipaturongconto iti daga a naticag ken langalang, iti camaunana agingga iti baybay a makindaya, ket iti camaudina agingga iti baybay a makinlaud; ket ti buyocna sumngawto, ket ti nabangsit nga angotna ngumatonto, gapu ta isu nagaramid cadagiti dadackel a banbanag.

²¹ Dica agbuteng, O daga, agragragsacca ken agrag-oca; ta ni Jehova nagaramid cadagiti dadackel a banbanag.

²² Dicayo agbuteng, dacayo an-animal ti tay-ac; ta dagiti pagpaaraban iti let-ang lumangtoda, ta ti cayo agbunga, ti cayo ti higos ken uvas pumigsada.

²³ Agragsaccayo ngarud, dacayo annac ti Sion, ket agrag-ocayo ken ni Jehova a Diosyo; ta isu itedna cadacayo ti masapa a tudo a tumutop, ket patinnagenna cadacayo ti tudo, ti masapa ken maladaw a tudo, cas idi damo.

²⁴ Ket dagiti pagidulinan mapunnodanto ti trigo, ket dagiti tangtangke agliplippiasdanto iti baro nga arac ken lana.

²⁵ Ket supapacacto cadacayo dagiti tawtawen a kinnan ti dudon, lucton, ken ti arabas, ken ti dangaw, ti dackel a buyotco nga imbaonco cadacayo.

²⁶ Ket mangancayto a nawadwad ket mapneccayto, ket daydayawenyonto ti nagan ni Jehova a Diosyo, isu a nagaramid iti nacascasdaaw cadacayo; ket ti ilic saanton a mapabainan uray caanoman.

²⁷ Ket mabigbigyonto a siac addaac iti nagtengngaan ti Israel, ken siac ni Jehova a Diosyo, nga awan sabalin; ket ti ilic uray caanoman saanton a mapabainan.

²⁸ Ket maaramidto iti calpasanna, nga ibucbocconto ti Espirituc iti amin a lasag; ket dagiti annacyo a lallaki ken babbai agipadtodanto, dagiti lallacayyo agtagtagainepdanto cadagiti tagtagainep; dagiti agtutuboyo a lallaki macakitadanto cadagiti sirsirmata:

²⁹ Ken castamet dagiti ad-adipen a lallaki ken babbai cadagita nga al-aldaw ibucbocconto ti Espirituc.

³⁰ Ket iparangconto dagiti pagsidsiddaawan cadagiti langlangit ken iti daga: dara, ken apuy, ken monmonmon nga asuc.

³¹ Ti init agbalinto a sipnget, ket ti bulan dara, no di pay dumteng ti dackel ken nacakigkigtot nga aldaw ni Jehova.

³² Ket maaramidto, nga uray siasino nga umawagto iti nagan ni Jehova, maisalacanto; ta idiay bantay Sion ken idiay Jerusalem addanto dagidiay a macatalaw, cas sinao ni Jehova, ket cadagiti matidda addanto dagiti ayayaban ni Jehova.