Joel 1 - Ti Biblia (1973)

Ni Joel ipalawagna dagiti panangocom ti Dios. Nacaal-alingec a gawat gapu iti dudon ken iti ticag. Bagbaga iti panagbabawi.

¹ Ti sao ni Jehova dimteng ken Joel nga anac ni Fatuel.

² Denggenyo daytoy, dacayo a lallacay, ket ipangagyo dacayo amin nga agnaed iti daga. Adda aya daytoy cadagiti aldawyo, wenno cadagiti aldaw dagiti ammayo?

³ Isu saritaenyo cadagiti annacyo, ket dagiti annacyo saoendanto met coma cadagiti annacda, ket dagiti annacda iti sabali a caputotan.

⁴ Iti natidda ti lucton kinnan ti dudon; ket ti tidda ti dudon kinnan ti lucton; ket ti nabati ti lucton kinnan ti arabas ket ti tidda ti arabas kinnan ti dangaw.

⁵ Agriingcayo, dacayo a managbartec, ken agsangitcayo; ket agdung-awcayo, dacayo amin nga agiinum ti arac, maipuon iti nasam-it nga arac; ta isu naisina iti ngiwatyo.

⁶ Ta maysa a nacion simmang-at iti dagac, nabileg, ken saanda a mabilang; dagiti ngipenna isuda dagiti ngipen ti leon, ket adda kencuana dagiti sangi ti leon a caba-ian.

⁷ Winarawarana ti uvasco, inukisanna ti cayoc nga higos: isu inukisanna a naan-anay, ket impurruacna; dagiti sangsangana naaramidda a napudaw.

⁸ Agsangitca cas maysa a virgen a nabaricsan iti lupot a nakersang a maipaay iti asawa iti kinaubingna.

⁹ Ti daton a macan ken ti daton a mainum naisinada iti balay ni Jehova; dagiti papadi, nga agannong ken ni Jehova, agpanesda.

¹⁰ Ti away malangalang, ti daga agpanes; ta ti bukel madadael, ti baro nga arac matianan, ti lana bumassit.

¹¹ Marirucayo coma, O dacayo a manalon; Agdung-awcayo, O dacayo nga agaywan iti cauvasan, gapu iti trigo ken cebada; ta ti apit ti talon mapucaw.

¹² Ti uvas nagango, ket ti cayo ti higos naglaylay; ti cayo ti granada, ti cayo ti palma castadamet, ken ti cayo ti manzana, amin met laeng dagiti caycayo ti tanap nangangoda; ta ti rag-o malaylay cadagiti anac dagiti tattao.

¹³ Agbarikescayo iti lupot a nakersang, ket agasugcayo, dacayo a papadi; agdung-awcayo, dacayo a managannong iti altar; umaycayo, agiddacayonga agpatnag iti a nakersang, dacayo a managannong iti Diosco; ta ti daton a macan ken ti daton a mainum maipaidamda iti balay ti Diosyo.

¹⁴ Mangilasingcayo iti maysa a panagayunar, mangayabcayo iti maysa a gimong a nangayed, urnongenyo dagiti lallacay ken amin nga agnaed iti daga iti balay ni Jehova a Diosyo, ket awaganyo ni Jehova.

¹⁵ Ay ilala pay ti aldaw! ta asidegen ti aldaw ni Jehova, ket umayto cas pannacadadael nga aggapu iti Mannacabalinamin.

¹⁶ Saan aya a ti taraon maiccat iti sango dagiti matayo, castamet ti ragsac ken rag-o iti balay ti Diostayo?

¹⁷ Dagiti bucbukel aglungtotda iti siroc dagiti bingcolda; dagiti agamang marbada, dagiti sarusar madadaelda; ta ti bukel nagango.

¹⁸ Anian nga uga dagiti animal! dagiti ar-arban ti vaca nakiburda, ta awan ti pagarabanda; wen, dagiti pangen dagiti carnero mapagwalang-walangda.

¹⁹ O Jehova, kenca umkisac; ta ti apuy linamutna dagiti pagpaaraban idiay let-ang, ket ti gil-ayab inuramna amin a caycayo ti tanap.

²⁰ Wen, dagiti animal ti tanap agalalda nga umawag kenca; ta dagiti wawaig ti danum naatiananda, ket ti apuy linamutda dagiti pagpaaraban idiay let-ang.