Jeremias 7 - Ti Biblia (1973)

Ti panagrucbab dagiti managbasol iti templo awan ti capapayanna. Ti barengbareng a panagrucbabda matubngar. Ti pannacadusa ti panagrucbab cadagiti didios ken ti kinabangad. Dagiti kinarimon ti Tofet ken ti pannacadusada.

¹ Ti sao a dimteng ken Jeremias a naggapu ken Jehova, cunana,

² Agtacderca iti ruangan ti balay ni Jehova, ket iwarragawagmo idiay daytoy a sao, ket cunaem, Denggenyo ti sao ni Jehova, dacayo amin a taga Juda, a sumrec cadagitoy a ruangan tapno agrucbabcayo ken Jehova.

³ Castoy ti cuna ni Jehova dagiti buybuyot, ti Dios ti Israel, Pasayaatenyo dagiti dalanyo ken dagiti gapuananyo, ket pagnaedencayto ditoy a disso.

⁴ Dicayo agcammatalec cadagiti natiri a sasao, a cunayo, Ti templo ni Jehova, ti templo ni Jehova, ti templo ni Jehova, isuda dagitoy.

⁵ Ta no pasayaatenyo a nalaing dagiti dalanyo ken dagiti gapuananyo; no agaramidcayo a naananay iti kinajusticia iti tao ken ti padana a tao.

⁶ No saanyo nga irurumen ti gangannaet, ti ulila, ken ti balo, ken dicayo mangiparucpuc ti awan basolna a dara iti daytoy a disso, ket dicayo met sumurot cadagiti sabali a diosen nga agpaay a pacaranggasanyo met laeng;

⁷ Iti casta pagnaedencayto ditoy a disso, iti daga nga intedco cadagiti ammayo, nanipud idi unana agpapan iti agnanayon.

⁸ Adtoy, dacayo agtaleccayo cadagiti natiri a sasao, a dida macaited gunguna.

⁹ Agtacawcayto aya, agpapatay, ken makicamalala, ken agsapata a siuulbod, ken agpuur iti incienso a maipaay ken Baal, ken sumurot cadagiti sabali a diosen a saanyo a naam-ammo,

¹⁰ Ket umaycayo nga agtacder iti sangoanac iti daytoy a balay, a mainaganan iti naganco, ket cunayo, Naruc-atancami; tapno maaramidyo amin dagitoy a kinarimon?

¹¹ Daytoy a balay a mainaganan iti naganco, nagbalin aya a taeng dagiti mannanacaw iti imatangyo? Adtoy, siac, siac met laeng, nakitac, cuna ni Jehova.

¹² Ngem incayo ita iti naglugarac idi idiay Silo, isu a nangisaadac iti naganco idi damo, ket kitaenyo no ania ti inaramidco kencuana gapu iti kinadangkes iti ilic nga Israel.

¹³ Ket ita, agsipud ta inaramidyo amin dagitoy nga aramid, cuna ni Jehova, ket nagsaoac cadacayo, a bimmangonac a nasapa ket nagsaoac, ngem saancayo a dimngeg; ket siac inayabancayo, ngem dicayo simmungbat:

¹⁴ Gapuna aramidecto iti balay isu a mainaganan iti naganco, isu a pagcammatalcanyo, ken iti disso nga intedco cadacayo ken cadagiti ammayo, cas inaramidco iti Silo.

¹⁵ Ket pagtalawencayto iti imatangco, cas iti panangibellengco cadagiti amin a cacabsatyo, ti amin met laeng a capuonan ni Efraim.

¹⁶ Ngarud saanmo nga icararagan daytoy nga umili, ket dica met agpuccaw wenno agcararag gapu cadacuada, ket dica met ibabaet ida caniac, ta saancanto a denggen.

¹⁷ Saanmo aya a makita no ania ti aramidenda cadagiti il-ili ti Juda ken cadagiti lanlansangan ti Jerusalem?

¹⁸ Dagiti annac agurnongda iti pagsungrod, ket dagiti amma gangatanda ti apuy, ket dagiti babbai masaenda ti gamay, tapno aramidenda dagiti bibingca a maipaay iti reina ti langit, ken mangibuyatda cadagiti datdaton a mainum cadagiti sabali a diosen, tapno gargariendac nga agpungtot.

¹⁹ Gargariendac aya nga agpungtot? cuna ni Jehova; saanda aya a gargarien ti bagida met laeng, nga agpaay a pacariribucan dagiti ruprupada met laeng?

²⁰ Gapuna castoy ti cuna ni Apo Jehova: Adtoy ti ungetco ken ti pungtotco maibuyatto iti daytoy a disso, iti tao, ken iti animal, ken cadagiti caycayo ti tanap, ken iti bunga ti daga; ket isu mauramto ket saanto a maiddep.

²¹ Castoy ti cuna ni Jehova dagiti buybuyot, ti Dios ti Israel: Pagtiponenyo dagiti datonyo a mapuuran ken cadagiti sacrificioyo, ket mangancayo iti lasag.

²² Ta saanac a nagsao cadagiti ammayo wenno imbilinco cadacuada idi aldaw a panangaonco cadacuada iti daga ti Egipto, a maipapan cadagiti datdaton a mapuuran wenno sacrificio:

²³ Ngem daytoy a banag imbilinco cadacuada, a kinunac, Ipangagyo ti timecco, ket siacto ti Diosyo, ket dacayto ti ilic; ket magnacayo iti amin a dalan nga ibilinco cadacayo, tapno mapaimbagcayo.

²⁴ Ngem isuda saanda a nangipangag, wenno intimud ti lapayagda, no di ket nagnada iti bucodda a pammagbaga ken iti kinatangken ti dakes a pusoda, ken nagsanodda, ket saan a nagna iti masangoanan.

²⁵ Nanipud idi aldaw a dagiti ammayo rimmuarda iti daga ti Egipto agingga iti daytoy nga aldaw, imbaonco cadacayo amin dagiti ad-adipenco a mammadto, iti inaldaw a bimmangonac a nasapa ket imbaonco ida:

²⁶ Nupay casta saandac nga impangag, wenno intimud ti lapayagda, no di ket pinatangkenda ti teltelda: dimmacdakesda ngem dagidi ammada.

²⁷ Ket saoemto amin dagitoy a sasao cadacuada; ngem saandacanto nga ipangag: umayabcanto met cadacuada; ngem didacanto sungbatan.

²⁸ Ket cunamto cadacuada, Daytoy ti nacion a saan a nangipangag iti timec ni Jehova a Diosda, wenno immawat ti sursuro; ti kinapudno napucawen ken simmina iti ngiwatda.

²⁹ Pukisam ti boocmo, O Jerusalem, ket ibellengmo, ket agunnoyca cadagiti nalucasan a panpantoc; ta ni Jehova naglictadanna ken pinanawanna ti caputotan ti pungtotna.

³⁰ Ta dagiti annac ni Juda inaramidda ti dakes iti imatangco, cuna ni Jehova: insaadda dagiti kinarimonda iti balay a mainaganan iti naganco, tapno isu tulawanda.

³¹ Ket binangonda dagiti nangato a disso ti Tofet, isu nga adda iti lobong ti anac a lalaki ni Hinnom, tapno puuranda dagiti annacda a lallaki ken babbai iti apuy; isu a saanco nga imbilin, ket diac met pinanunot.

³² Gapuna, adtoy, dagiti al-aldaw umayda, cuna ni Jehova, nga isu saanto a managananen ti Tofet, wenno Ti lobong ti anac a lalaki ni Hinnom, no di ket Ti lobong ti Pagpapatayan: ta agitanemdanto idiay Tofet agingga ti awan ti disso a pagicalian.

³³ Ket dagiti bangcay daytoy nga umili agpaayto a taraon cadagiti tumatayab ti langit, ken cadagiti an-animal ti daga; ket awanto ti mangbugaw cadacuada.

³⁴ Ket pasardengecto cadagiti il-ili ti Juda, ken cadagiti lanlansangan ti Jerusalem, ti timec ti rag-o ken ti timec ti ragsac, ti timec ti novio ken ti timec ti novia; ta ti daga agbalinto a langalang.