Jeremias 6 - Ti Biblia (1973)

Ti pannacasalacnib ti Jerusalem maipadto. Ti pannacatnagna a gapu ti kinasukir ken kinabangadna. Ti pannacarbec nga umay manipud iti amianan.

¹ Agtalawcayo tapno mailisicayo, dacayo annac ni Benjamin, a rumuar iti tengnga ti Jerusalem, ket puyotenyo ti tangguyob idiay Tecoa, ket mangipasdeccay iti maysa a pagilasinan idiay Bet-hacerem; ta ti kinadakes cumita manipud iti amianan, ken dackel a pannacarbec.

² Ti napintas ken nalami, ti anac a babai ti Sion, keltayecto.

³ Dagiti pastor agraman dagiti arbanda umaydanto kencuana; ipatacderdanto dagiti toldada a maibusor kencuana iti aglicmut; agpaarabdanto tunggal maysa iti dissona.

⁴ Isaganayo ti gubat a maicaniwas kencuana; tumacdercayo, ket sumang-attayon intono tengnga ti aldaw. Asitayo pay ta ti aldaw aglikig, ta dagiti aniniwan ti malem mayatiddugda.

⁵ Bumangoncayo ket sumang-attayon iti rabii, ket dadaelentayo dagiti palaciona.

⁶ Ta castoy ti kinuna ni Apo Jehova dagiti buybuyot, Agpucancayo cadagiti caycayo, ket mangaramidcayo iti gabsuon a maibusor iti Jerusalem: daytoy ti ili a masarungcaran; isu naananay ti pannacailupit iti tengngana.

⁷ Cas ti maysa a bubon iruarna dagiti danumna, casta ti panangiruarna cadagiti kinadakesna: panangrabsut ken panagdadael mangngeg, kencuana; iti sangoanac cancanayon ti sakit ket sugsugat.

⁸ Maisuroca coma, O Jerusalem, di la ket ta ti cararuac maisina kenca; di la ket ta aramidenca a langalang, maysa a daga nga awan ti agnaed.

⁹ Castoy ti cuna ni Jehova dagiti buybuyot, adasendanto a nalaing unay ti matda iti Israel a cas ti maysa a puon ti uvas: isublim manen ti imam a cas ti agpurpuros iti uvas iti uneg dagiti labba.

¹⁰ Siasino ti pakisaoac ken pangpanecnecac, tapno mangngegda coma? Adtoy, ti lapayagda saan a nacugit, ket saanda a macaipangag: adtoy, ti sao ni Jehova nagbalin cadacuada a umsi; awan ti ragsacda kencuana.

¹¹ Gapuna napnoac iti pungtot ni Jehova; nabannogac nga agibibtor: ibuyatmo cadagiti ubbing iti lansangan, castamet iti gimong dagiti agtutubo a lallaki, ta uray pay ti asawa a lalaki agraman ti asawa a babai maaladanto, ti lacay agraman daydiay napnoanen cadagiti al-daw.

¹² Ket dagiti balbalayda maitedto cadagiti sabsabali agraman dagiti taltalonda ken assawada a babbai; ta yunnatconto ti imac cadagiti agnaed ti daga, cuna ni Jehova.

¹³ Ta manipud iti cabassitan agingga iti cadackelan cadacuada tunggal maysa maiyawat iti kinaagum; ket manipud iti mammadto uray pay agingga iti padi tunggal maysa manangallilaw.

¹⁴ Inagasanda met a parparawpaw ti dunor ti ilic, a cunada, Talna, talna; idinto nga awan ti talna.

¹⁵ Nagbainda aya idi nagaramidda ti macarimon? Saan, saanda a nagbain a pulos, ket dida met napalabbasit: gapuna a mapasagdanto iti nagtengngaan dagidiay mapasag; intono sarungcarac ida, maipalladawdanto, cuna ni Jehova.

¹⁶ Castoy ti cuna ni Jehova, Agtacdercayo cadagiti daldalan ket cumitacayo, ket damagenyo dagiti daan a dandana, sadino ti yan ti nasayaat a dalan; ket magnacayo idiay, ket macasaraccayo iti inana a maipaay cadagiti cararuayo: ngem isuda kinunada, Saancamto a magna kencuana.

¹⁷ Ket nangicabilac cadagiti agbanbantay cadacayo, a kinunac, Ipangagyo ti uni ti tangguyob; ngem isuda kinunada, Dicamto ipangag.

¹⁸ Denggenyo ngarud, dacayo a nasnacion, ket ammoenyo, O gimong, no ania ti adda iti nagtengngaanda.

¹⁹ Denggem, O daga; adtoy, iyeg-conto ti dakes ditoy nga umili, ti met laeng bunga dagiti pampanunotda agsipud ta saanda nga impangag dagiti sasaoc; ket no maipapan iti lintegco, naglictadanda.

²⁰ Ania ti capapa-yanna ti pannacayegna caniac ti incienso nga aggapu idiay Seba, ken ti nasam-it nga unas iti adayu a daga? dagiti datdatonyo a mapuuran saanda a maawat, ket dagiti sacrificioyo saanda met a macaay-ayo caniac.

²¹ Gapuna castoy ti cuna ni Apo Jehova, Adtoy mangicabilacto cadagiti pacaitibcolan iti sangoanan daytoy nga umili; ket dagiti amma agraman cadagiti annac a lallaki maitibcoldanto cadacuada; ti caarruba ken ti gayyemna mapucawdanto.

²² Castoy ti cuna ni Jehova, Adtoy, ti umili umay nga aggapu iti amianan a daga; ket maysa a dackel a nacion mariingto manipud caadayuan a paspaset ti daga.

²³ Nacaiggemda iti bai ken gayang; isuda naulpitda, ket awan ti asida; ti timecda agungor a cas ti baybay, ket sumacayda cadagiti cacabayo, tunggal maysa makiintar, cas iti lalaki iti gubat, a maicaniwas kenca, O anac a babai ti Sion.

²⁴ Nangngegmi ti damagna, dagiti imami kimmapsutda; ti sennaay kinapetnacami, ken ut-ut a cas ti babai nga agpasical.

²⁵ Saancayo nga umaway, wenno magna iti dalan; ta ti campilan ti cabusor, ken pangigtot, adda iti tunggal sikigan.

²⁶ O anac a babai ti ilic, agbarikesca iti nakersang a lupot, ket lumumlumca cadagiti dapdapu: agladingitca, a cas maipaay iti bugbugtong nga anac a lalaki, ti casaeman nga ununnoy; ta ti managdadael umayto a pettat cadatayo.

²⁷ Inaramidca a torre ken maysa a sarikedked iti nagtengngaan ti ilic; tapno maammoam coma ken mapadasmo ti dalanda.

²⁸ Isuda amin nasukirda unay, agpasiarda a mamarpardaya; isuda dagiti suer ken landoc; isuda amin manangallilawda.

²⁹ Dagiti yubuyoban agpuyotda a sirurungsot; ti buli maibus iti apuy; barengbareng ti panangituloyda a mangpagugor; ta dagiti nadangkes saanda a maparut.

³⁰ Tulis a pirac ti pangnaganto dagiti tao cadacuada, ta ni Jehova pinaidna ida.