Jeremias 50 - Ti Biblia (1973)

Ti Babilonia madadaelto, ket ti Israel maispal.

¹ Ti sao nga insao ni Jehova a maipapan iti Babilonia, ken iti daga a Caldea babaen ken Jeremias a mammadto.

² Ipalawagyo cadagiti nasnacion ket iwarragawagyo, ket ipatacderyo ti wagayway, iwarasyo ket dicayo ilimed: cunayo, Ti Babilonia naalan, ni Bel mabainan, ni Merodac agcullayaw; dagiti ladawanna a kinitikitan mabainanda, dagiti diosenna agcullayawda.

³ Ta manipud iti amianan umay timaysa a nacion a maibusor kencuana, a pagbalinennanto ti dagaa a langalang, ket awanto ti agnaed sadiay: nagtaraydan, napandan tao ken animal agpadpada.

⁴ Cadagita nga al-aldaw ken iti dayta a pannawen, cuna ni Jehova, dagiti annac ti Israel umaydanto, isuda ken maicanunong dagiti annac ti Juda; maipandanto nga agsangsangit, iti dalanda ket sapulendanto ni Jehova a Diosda.

⁵ Umintuuddanto a maipapan iti Sion a dagiti rupada sisasango sadiay a cunada, Umaycayo: ket tumiponcayo ken Jehova iti maysa a tulag nga agnanayon a dinto malipatan.

⁶ Ti ilic napucawda a carcarnero: dagiti paspastorda inyawawanda ida; pinasiasida ida cadagiti banbantay; napanda manipud bantay agingga iti turod; nalipatanda ti paginanaanda.

⁷ Amin a nacasarac cadacuada inalununda ida; ket dagiti casupadida kinunada, Saancami a nacabasol, agsipud ta nacabasolda a maicaniwas ken Jehova, a pagnaedan ti kinalinteg, ni met laeng Jehova, nga inanama dagiti ammada.

⁸ Agtalawcayo iti tengnga ti Babilonia, ket rumuarcayo iti daga dagiti Caldeos, ket agbalincayo a cas cadagiti calding a lallaki iti sango dagiti pangen.

⁹ Ta adtoy, tignayecto ket pasangatecto a maibusor iti Babilonia ti maysa a bonggoy dagiti dadackel a nacion nga aggapu iti daga nga akinamianan ket aguornosdanto a maibusor kencuana; manipud sadiay maalanto: dagiti panada casdanto la iti maysa a nalaing a lalaki a mannacabalin; awanto ti agsubli a barengbareng.

¹⁰ Ket ti Caldea agbalinto a samsam: amin a mangsamsam kencuana mapnecdanto, cuna ni Jehova.

¹¹ Gapu ta naragsaccayo gapu ta agrac-ocayo, O dacayo nga agsamsam iti tawidco, gapu ta naliwaycayo a cas maysa nga urbon ti vaca nga agregnas ti trigo, ket aggaraigicayo a cas cadagiti napigsa a cabayo;

¹² Ni inayo mabainanto a naananay; daydiay nangyanac cadacayo marironto: adtoy, isunto ti caudian cadagiti nasnacion, maysa a let-ang, namaga a daga, ken langalang.

¹³ Maipuon iti pungtot ni Jehova isu saanto a manaedan, no di ket aglangalangto a naananay: tunggal maysa a lumabas iti Babilonia masdaawto, ket agsanamticto maipuon cadagiti amin a didigrana.

¹⁴ Aguornoscayo a maibusor iti Babilonia nga aglicmut, dacayo amin a mangbiat ti ba-i; isu ti panaenyo, dicayo medmedan dagiti panpana: ta isu nagbasol a maicaniwas ken Jehova.

¹⁵ Agdir-icayo a maibusor kencuana nga aglicmut; isu tumuloken; dagiti sarikedkedna matuangen dagiti bacudna marpuugdan, ta isu ti pangbales ni Jehova: agibalescayo kencuana; cas ti inaramidna, casta ti daramidenyo kencuana.

¹⁶ Pucawenyo ti agmulmula a taga Babilonia, ken ti agtagicumpay iti pannawen ti panagani; maipuon iti buteng iti campilan a mangparigat isuda agsublidanto tunggal maysa iti ilina, ket agtalawdanto tunggal maysa mapan iti dagana met laeng.

¹⁷ Ti Israel maysa a carnero a maanupan; isu pinagtalaw dagiti leon; umuna ti ari ti Asiria ti nangalun-un kencuana; ket iti camaudiananna ni Nabucodonosor nga ari ti Babilonia tinuccolna dagiti tultulangna.

¹⁸ Gapuna a castoy ti cuna ni Jehova dagiti buybuyot, a Dios ti Israel: Adtoy, dusaecto ti ari ti Babilonia ken ti dagana, a cas ti panangdusac iti ari ti Asiria.

¹⁹ Ket iyegconto manen ti Israel iti pagarabanna, ket agarabto idiay Carmelo ken Basan, ket ti cararuana mapnecto iti rabaw dagiti turturod ti Efraim ken sadi Galaad.

²⁰ Cadagita nga al-aldaw ken dagita a pannawen, cuna ni Jehova, ti kinadangkes ti Israel masapulto, ket awanto; ken dagiti basbasol ti Juda, ket saandanto a masaracan: ta pacawanecto dagidiay natda nga imbatic.

²¹ Sumang-atca a maibusor iti daga a Merataim, a maibusor met laeng kencuana, ken maibusor cadagiti agnaed sadi Pekod: papatayen ken dadaelem ida a talipupusen, cuna ni Jehova, ket aramidem cas mayannurot iti amin nga imbilinco kenca.

²² Maysa a daranudor ti gubat adda iti daga, ken iti dackel a pannacadadael.

²³ Anian ti panagputed ken panagburac ti malo ti isu-amin a lubong! anian ti panagbalin ti Babilonia a langalang, iti tengnga dagiti nasnacion!

²⁴ Incabilco ti maysa a silo a maipuon kenca, ket matiliwca met, O Babilonia, ket isu saanmo a naammoan: masaracanca ken matiliwca met, gapu ta inaramidmo ti maibusor ken Jehova.

²⁵ Ni Jehova linuctanna dagiti pagidulinan cadagiti igamna, ket inruarna dagiti igam ti pungtotna; ta ti Apo, ni Jehova dagiti buybuyot, adda aramidenna iti daga dagiti Caldeos.

²⁶ Bumusorcayo kencuana manipud iti caadayuan a beddeng; luctanyo dagiti agamangna; isu ipalladawyo a cas cadagiti gabsuon, ket dadaelenyo a talipupusen; isu maibus coma.

²⁷ Patayenyo amin a vacvacana a lalaki; bay-anyo ida a sumalog iti pagpartian: asida pay! ta ti aldawda addan, ti pannawen ti pannacasucnalda.

²⁸ Ti timec dagidiay nga agtaray ken agtalaw iti daga a Babilonia, tapno maiwarragawag idiay Sion ti panangibales ni Jehova a Diostayo, ti pannacaibales ti templona.

²⁹ Paurnongyo dagiti pumapana a maibusor iti Babilonia, dagiti amin a mangbiat ti ba-i; agpacarsocayo a maibusor kencuana nga aglicmut; awan coma ti macatalaw; isu supapacanyo a mayalubog ti aramidna; cas mayannurot iti isu-amin nga inaramidna, aramidenyo kencuana, ta isu natangsit idi a maibusor ken Jehova, a maibusor iti Santo ti Israel.

³⁰ Gapuna a dagiti agtutubo a lallakina mapasagdanto cadagiti lansanganna, ken isu-amin dagiti lallakina ti gubat mapaulimecdanto iti dayta nga aldaw, cuna ni Jehova.

³¹ Adtoy, maibusorac kenca, O sica a natangsit, cuna ti Apo, ni Jehova dagiti buybuyot; ta ti aldawmo addan, ti pannawen ti isusucnalco kenca.

³² Ket ti natangsit maitibcolto ken matuang, ket awanto ti mangbangon kencuana; ket silmutacto dagiti il-ilina iti apuy, ket alun-unennanto ti amin nga adda iti aglicmut kencuana.

³³ Castoy ti cuna ni Jehova dagiti buybuyot: Dagiti annac ti Israel ken dagiti annac ti Juda maparigatda a maicanunong; ket isu-amin a nangcayaw cadacuada igawidda ida; madida a palubosan ida.

³⁴ Ti Mannubbotda nabileg; ni Jehova dagiti buybuyot ti naganna; isu salacnibannanto a naananay ti panggepda, tapno maitedna ti inana iti daga, ken riribuc cadagiti agnaed sadi Babilonia.

³⁵ Ti campilan agdisso cadagiti Caldeos, cuna ni Jehova, ken cadagiti agnaed sadi Babilonia, ken cadagiti piprincipena, ken cadagiti mamasiribna.

³⁶ Ti campilan agdisso cadagiti agpasindayag, ket agbalindanto a maag; ti campilan agdisso cadagiti lallakina a mannacabalin, ket agcullayawdanto.

³⁷ Ti campilan agdisso cadagiti cabayoda, ken cadagitiluganda, ken cadagiti amin a mailaoc nga il-ili nga adda iti tengngana; ket agbalindanto a cas babbai: ti campilan agdisso cadagiti gamengna, ket matacawdanto.

³⁸ Ti ticag adda cadagiti dandanumna, ket mamagaandanto; ta isu ti daga dagiti ladladawan a kinitikitan, ket agmauyongda a maipapan cadagiti didiosen.

³⁹ Gapuna a dagiti naatap nga animal ti let-ang agraman cadagiti lobo agnaeddanto sadiay, ken sadiay agnaedto dagiti avestruz: ket dinto matagitaoan iti agnanayon; ket dinto manaedan manipud caputotan agingga iti caputotan.

⁴⁰ Cas idi panangrebba ti Dios iti Sodoma ken Gomorra ken dagiti il-ili a caparangetda, cuna ni Jehova, iti casta awanto ti tao nga agnaed sadiay, wenno anac ti tao nga agdagus sadiay.

⁴¹ Adtoy, maysa nga ili umay nga aggapu iti amianan; ken dackel a nacion ken adu nga ar-ari mariingdanto manipud cadagiti pungto ti daga.

⁴² Agiggemda iti ba-i ken pica; nadawelda, ket awan ti asida; ti timecda agungor a cas iti baybay; ket agsacayda cadagiti cabayo, tunggal maysa sioornos a cas ti tao iti gubat, a maibusor kenca, O anac a babai ti Babilonia.

⁴³ Ti ari ti Babilonia nangngegnan dagiti damdamag a maipapan cadacuada ket dagiti im-imana agcapuyda; ti ladingit ti nangtengngel kencuana, ken ut-ut a cas iti babai nga agpasical.

⁴⁴ Adtoy, ti cabusor sumang-atto a cas leon nga aggapu iti kinalabiang ti Jordan a maibusor iti nalagda a pagnaedan: ta pagtarayecto ida a pettat nga aggapu kencuana; ket ti siasinoman a mapili daydiay dutocacto iti ngatoenna; ta siasino ti cas caniac? ket siasino ti mangikeddeng caniac ti maysa a pannawen? ket siasino ti pastor a macatacder iti sangoc?

⁴⁵ Ngarud denggenyo ti pammagbaga ni Jehova, a pinanggepna a maibusor iti Babilonia: ken dagiti panggepna nga insicatna a maibusor iti daga dagiti Caldeos: Kinapudnona guyodendanto ida nga yadayu, dagiti met laeng babassit iti arban; pudno a pagbalinennanto ti pagnaedanda a langalang agraman cadacuada.

⁴⁶ Maipuon iti daranudor iti pannacacayaw ti Babilonia ti daga agkintayeg, ket ti ickis mangngegan iti nagtengngaan dagiti nasnacion.