Jeremias 5 - Ti Biblia (1973)

Ti Jerusalem dina icancanon ti caadda ti Dios. Ti pannacarbec ti Jerusalem asidegen. Ti basol ti Juda.

¹ Agtaraycayo nga agallaalla cadagiti lanlansangan ti Jerusalem, ket kitaenyo ita, ket ammoenyo, ket sapulenyo cadagiti nalawa a disdissona, no macasaraccayo iti maysa a tao, no adda asinoman nga agaramid a sililinteg, nga agsapul ti kinapudno; ket isu pacawanecto.

² Ket nupay no cunada, Cas sibibiag ni Jehova; pudno nga agsapsapatada a siuulbud.

³ O Jehova, saan aya a dagita matam cumitada iti kinapudno? sica sinaplitmo ida, ngem saanda a nasakitan; rinunotmo ida, ngem dida kinayat ti umawat iti panangtubngar; inaramidda dagiti ruprupada a natangtangken, ngem ti bato; dida kinayat ti sumubli.

⁴ Idin kinunac, Pudno a dagitoy napanglawda; maagda; ta dida ammo ti dalan ni Jehova, wenno ti linteg ti Diosda:

⁵ Mapanacto cadagiti natan-oc a tattao, ket agsaoacto cadacuada; ta isuda ammoda ti dalan ni Jehova, ken ti kinajusticia ti Diosda. Ngem dagitoy a nagcaycaysa binungtolda ti sangol, ken pinugsatda dagiti singdan.

⁶ Gapuna maysa a leon nga aggapu iti cabakiran patayennanto ida, maysa a lobo nga aggapu cadagiti let-ang pucawennanto ida, maysa a leopardo agbantayto a maibusor cadagiti il-ilida, isu-amin a rumuar idiay mapisangpisangto; agsipud ta dagiti salungasingda adu, k ket ti kinamanaglicudda nanayonan.

⁷ Casano ti panangpacawanco kenca? Dagiti annacmo pinanawandac, ket nagsapatada gapu cadagidiay saan a dios. Idi pinacanco ida a napnecda, nakicamalalada, ket nagoornongda a nagbubunggoy cadagiti balbalay dagiti balangcantis.

⁸ Casda la cadagiti napacan a cabcabayo nga agallaalla; tunggal maysa ginaraigianna ti asawa a babai ti caarrubana.

⁹ Saanacto aya a sumarungcar maipuon cadagitoy a banbanag? cuna ni Jehova; ket saanto aya a maibalesan ti cararuac iti maysa a nacion a cas daytoy?

¹⁰ Umulicayo iti rabaw dagiti bacbacudna, ket dadaelenyo; ngem dicayo talipupusen: iccatenyo dagiti sangsangada; ta saan a cucua ida ni Jehova.

¹¹ Ta ti balay ti Israel ken ti balay ti Juda nagaramidda a sigugulib unay a maicaniwas caniac, cuna ni Jehova.

¹² Inlibacda ni Jehova, ket kinunada, Saan nga isu; awanto met ti dakes nga umay cadatayo; ket ditayto met macakita iti campilan wenno bisin:

¹³ Ket dagiti mammadto agbalindanto nga angin, ket ti sao awan cadacuada: castoy ti maaramidto cadacuada.

¹⁴ Gapuna a castoy ti cuna ni Jehova, ti Dios dagiti buybuyot, Agsipud ta saoenyo daytoy a sao, adtoy, pagbalinecto nga apuy dagiti sasaoc, iti ngiwatmo, ket daytoy nga umili pagsungrod, ket lamutenanto ida.

¹⁵ Adtoy, iyegconto ti maysa a nacion cadacayo manipud iti adayu, O balay ti Israel, cuna ni Jehova: isu nabileg a nacion, isu nabayagen a nacion, maysa a nacion a ti pagsasaona dica ammo, ket dica met maawatan ti saoenda.

¹⁶ Ti tagubanba maysa a tanem a silulucat, isuda amin nabilegda a lallaki.

¹⁷ Ket canendanto ti apitmo, ken ti tinapaymo, a canen coma dagiti annacmo a lallaki ken babbai; ibusendanto dagiti ar-arbanmo ken dagiti pangpangenmo; canendanto dagiti uv-uvasmo ken dagiti highigosmo; rebbaendanto dagiti nasarikedkedan nga il-ilim, isuda a pagcammatalcam, babaen ti capilan.

¹⁸ Ngem uray pay cadagit nga al-aldaw, cuna ni Jehova, siac dicayto talipupusen.

¹⁹ Ket intono, cunaenyonto, Apay nga inaramid ni Jehova a Diostayo amin dagitoy a banbanag cadatayo? iti casta cunaemto cadacuada, Cas ti panangpanawyo caniac, ket nagservicayo cadagiti didios a gangannaet ti dagayo, casta ti panagserviyonto cadagiti gangannaet iti daga a saanyo a cucua.

²⁰ Ipalawagyo daytoy iti balay ni Jacob, ket iwarragawagyo idiay Juda a cunaenyo,

²¹ Denggenyo ita daytoy, O maag nga umili, ken awan ti pannacaawatna; nga adda matana, ngem saan a macakita; nga adda lapayagna, ngem saan a macangngeg;

²² Saancayo aya nga agbuteng caniac? cuna ni Jehova: saancayo aya nga agpigergerto iti sangoanac, siac a nangicabil ti darat a beddeng ti baybay, ti agnanayon a bilin, nga isu saannanto a malasat? ket uray dagiti dalluyonna agpallatocda, nupay casta saanda nga umartap: uray pay no agungorda, nupay casta saanda a malasat.

²³ Ngem daytoy nga umili addaan nasukir ken nasupring a pusona; isuda immalsada ket pimmanawda.

²⁴ Dida met cunaen iti pusoda, Pagbutngantayo coma itan ni Jehova a Diostayo, isu a mangted ti tudo, ti umuna ken ti maudi iti pannawenna a nakedngan; isu a mangigaga cadatayo cadagiti nakedngan a lawlawas ti panagapit.

²⁵ Dagiti kinadakesyo pinapanawda dagitoy a banbanag, ket dagiti basbasolyo impaidamda ti naimbag cadacayo.

²⁶ Ta iti nagtengngaan ti ilic masaracan dagiti nadangkes a lallaki; agbantayda a cas ti panagsaneb dagiti mangnganup iti tumatayab; mangipacatda iti bateng, agtiliwda cadagiti tattao.

²⁷ Cas ti maysa a tangcal napno cadagiti tumatayab, casta ti pannacapno dagiti balbalayda ti panangallilaw: gapuna nagbalinda a dackel ken bimmacnangda.

²⁸ Limmucmegda, agsilnagda; wen, isuda aglabesda cadagiti aramid ti kinadakes; saanda a salaysayen ti panggep, ti panggep ti ulila, tapno rumang-ayda coma; ket ti calintegan dagiti nacacaasi saanda nga ocomen.

²⁹ Saanacto aya a sumaruncar gapu cadagitoy a banbanag? cuna ni Jehova; saanto aya a maibalesan ti cararuac iti maysa a nacion a cas itoy?

³⁰ Maysa a nacascasdaaw ken nacaamamac a banag ti mapasamac iti daga:

³¹ Dagiti mammadto agipadtoda a siuulbod, ket dagiti papadi agturayda maipuon cadacuada; ket ti ilic pagayatanna a casta: ket ania ti aramidenyonto iti pannungpalanna?