Jeremias 49 - Ti Biblia (1973)

Ti padto a maibusor iti Ammon, Edom, Damasco, Cedar, ken Hasor, ken Elam.

¹ Maipapan cadagiti annac ti Ammon. Castoy ti cuna ni Jehova: Awan aya ti anac a lalaki ni Israel? awan aya kencuana ti agtawid? apay ngarud a ni Malcam tagicucuaenna ti Gad, ken dagiti tattaona agnaedda cadagiti il-ilina?

² Gapuna adtoy, dagiti al-aldaw dumtengda, cuna ni Jehova, nga ipangngegconto ti panagbuac ti gubat a maibusor iti Rabba cadagiti annac ti Ammon; ket agbalinto a nalangalang a gabsuon, ket dagiti annacna a babbai mapuurandanto iti apuy: iti casta ti Israel tagicucuaennanto dagidiay nangtagicua kencuana, cuna ni Jehova.

³ Agdung-awca, O Hesbon, ta ti Ar marba; agickiscayo, dacayo annac a babbai ti Rabba, agbarikescayo iti nakersang a lupot: agunnoycayo ket agtaraycayo nga agal-laal-la iti nagtengngaan dagiti al-alad; ta ti Malcam macayawanto, agraman dagiti papadina ken piprincipena.

⁴ Apay nga agragsacca cadagiti lobong, ti agay-ayus a lobongmo, O managlicud nga anac a babai? nga agtalec cadagiti gamengna, a cunana, Asino ti umayto caniac?

⁵ Adtoy, iyegconto kenca ti nacabutbuteng, cuna ti Apo, ni Jehova dagiti buybuyot, nga aggapu iti amin nga aglicmut kenca; ket mapagtalawcayto, a madagdagus, tunggal lalaki, ket awanto ti mangurnong cadagiti nagtaltalaw.

⁶ Ngem calpasanna pagbaliwecto ti pannacacayaw dagiti annac ti Ammon, cuna ni Jehova.

⁷ Maipapan iti Edom. Castoy ti cuna ni Jehova dagiti buybuyot: Awanen aya ti kinasirib sadi Teman? napucaw aya ti pammagbaga dagiti manakem? ti kinasiribda napucaw aya?

⁸ Agtaraycayo, agsublicayo, agnaedcayo cadagiti caadalman, O agnaed sadi Dedan; ta iyegconto kencuana ti pannacaparigat ni Esau iti pannawen a panangsucnalconto kencuana.

⁹ No dagiti agburas ti uvas umayda kenca, saanda aya a mangibati cadagiti uvas nga adasen? no dagiti tulisan iti rabii, saanda aya a mangdadael laeng agingga iti mapnecda?

¹⁰ Ngem pinaglabusco ni Esau, linucasac dagiti nalimed a dissona; ket saanto a macalemmeng: ti capuonanna madadael, ken dagiti cacabsatna, ken dagiti caarrubana, ket isu met laeng awanen.

¹¹ Bay-am dagiti ul-ulila nga annacmo, salacnibacto ida a sibibiag; ket dagiti babbalom a babbai agtalecda coma caniac.

¹² Ta castoy ti cuna ni Jehova: Adtoy, dagiti saan coma nga uminum iti copa uminumdanto a di bumurong; ket sica saancanto aya a madusa a pulos? dicanto macalasat a di madusa, no di ket uminumcanto a di-agcurang.

¹³ Ta nagsapataac babaen caniac met laeng, cuna ni Jehova, a ti Bosra agbalinto a pagsiddaawan, pacaumsian, langalang ken pacailunodan; ket amin dagiti il-ilina agnanayondanto a langalang.

¹⁴ Nangngegcon dagiti damdamag a naggapu ken Jehova, ket maysa nga embajador maibaon cadagiti nasnacion, a cunana, Aguornongcayo ket bumusorcayo kencuana, ket bumangoncayo a gumubat.

¹⁵ Ta, adtoy pinagbalinca a bassit iti tengnga dagiti nasnacion, ken maab-abi iti nagtengngaan dagiti tattao.

¹⁶ No maipapan iti kinamanangigtotmo, ti kinacuspag ta pusom inallilawnaca, O sica nga agnaed cadagiti rengrengngat ti bato, nga icutam ti toctoc ti turod: nupay no aramidem coma ta umocmo iti ngato a cas iti aguila, ipababacanto manipud sadiay, cuna ni Jehova.

¹⁷ Ket ti Edom agbalinto a pagsiddaawan: tunggal maysa a lumabas kencuana masdaawto, ket agsanamtic cadagiti amin a pannacadidigrana.

¹⁸ A cas iti pannacarba ti Sodoma ken Gomorra ken dagiti il-ilina, cuna ni Jehova, awanto ti tao nga agnaed sadiay, awanto met ti anac ti tao nga agdagus sadiay.

¹⁹ Adtoy, sumang-atto a cas la leon manipud iti kinalabiang ti Jordan: a maibusor iti nalagda a pagnaedan: ta pagtarayecto ida a pettat nga aggapu kencuana; ket siasino ti mapili, daydiay dutocacto iti ngatoenna: ta siasino ti cas caniac? ket siasino ti mangikeddeng caniac iti maysa a pannawen? ket siasino ti pastor nga agtacderto iti sangoc?

²⁰ Ngarud denggenyo ti pammagbaga ni Jehova, a pinanggepna a maibusor iti Edom; ket dagiti panggepna insicatna a maibusor cadagiti agnaed sadi Teman: kinapudnona guyodendanto ida nga yadayu, dagiti met laeng babassit iti pangen; pudno nga aramidennanto ti pagnaedanda a langalang agraman cadacuada.

²¹ Ti daga agkintayeg itidaranudor ti pannacatnagda; adda maysa nga ickis a ti unina mangngegan agingga idiay Baybay a Nalabaga.

²² Adtoy, sumang-atto ken tumayabto a cas iti aguila, ket yucradnanto dagiti payacna a maibusor iti Bosra: ket ti puso dagiti mannacabalin a lallaki ti Edom agbalinto a cas iti puso ti babai nga agpasical iti dayta nga aldaw.

²³ Maipapan iti Damasco. Mariro ti Hamat ken Arpad; ta nangngegandan dagiti dakes a damdamag, marunawda; adda liday iti rabaw ti baybay; saan a macatalna.

²⁴ Ti Damasco nagbalinen a nacapuy, tumallicud tapno agtaray, ket panagpigerger ti kimpet kencuana: liday ken ladladingit ti nangpetpet kencuana a cas babai nga agpaspasical.

²⁵ Anian ti di pannacabaybay-a ti ili ti dayaw, ti ili ti rag-oc?

²⁶ Gapuna a dagiti agtutubona a lallaki mapasagdanto cadagiti lanlansanganna, ket amin dagiti lallaki ti gubat mapaulimecdanto iti dayta nga aldaw, cuna ni Jehova dagiti buybuyot.

²⁷ Ket silmutac ti bacud ti Damasco iti apuy ket alun-unennanto dagiti palacio ni Ben-hadad.

²⁸ Maipapan iti Cedar, ken cadagiti pagarian ti Hasor, a kinabil ni Nabucodonosor nga ari ti Babilonia. Castoy ti cuna ni Jehova: Bumangoncayo, sumang-atcayo sadi Cedar, ket dadaelenyo dagiti annac ti daya.

²⁹ Dagiti toldada ken dagiti pangenda alaendanto; ipandanto ida nga yadayu a maipaay cadacuada met laeng dagiti bengbengda, ken amin nga alicamenda, ken dagiti camelloda; ket ipuccawdanto cadacuada, Nacakigkigtot iti amin a sikigan!

³⁰ Agtaraycayo, agpagpagnacayo iti adayu, agnaedcayo cadagiti caadalman, O dacayo nga agnaed sadi Hasor, cuna ni Jehova; ta ni Nabucodonosor nga ari ti Babilonia nabalacadan a maibusor cadacayo, ket isu insicatna ti panggep a maibusor cadacayo.

³¹ Bumangoncayo, sumang-atcayo iti maysa a nacion a sitatalna, nga agnaed a sitatalged, cuna ni Jehova; nga awan cadacuada dagiti rikep ti ruangan wenno balbalunet, nga agnaedda nga is-isuda.

³² Ket dagiti camelloda agbalindanto a samsam, ken tikinaadu dagitivacada agbalinda nga inagaw: ket warawaraecto cadagiti amin nga angin dagidiay napukisan ti ngarab ti boocda; ket iyegconto ti pannacaparigatda manipud iti amin a sikiganda, cuna ni Jehova.

³³ Ket Jehova ti Hasor pagnaedanto dagiti aso ti bakir, langalang iti agnanayon: awanto ti tao nga agnaed sadiay, ket awanto met ti anac ti tao nga agdagus sadiay.

³⁴ Ti sao ni Jehova a dimteng ken Jeremias a mammadto a maipapan iti Elam, idi pangrugianan ti panagari ni Sedekias nga ari ti Juda, a kinunana,

³⁵ Castoy ti cuna ni Jehova dagiti buybuyot: Adtoy, bungtolecto ti ba-i ti Elam, a pangolo ti pigsada.

³⁶ Ket iti Elam iyegconto dagiti uppat nga angin nga aggapu cadagiti uppat a paset ti langit, ket warawaraecto ida a maiturong cadagitoy amin nga angin; ket awanto ti nacion a saanto a pacadanonan dagiti maibelleng iti Elam.

³⁷ Ket pagcullayawecto ti Elam iti sango dagiti cabusorda, ken iti sango dagidiay nga agsapul iti biagda; ket yegconto ti dakes cadacuada, ti met laeng narungsot a pungtotco, cuna ni Jehova; ket ipasurotconto ti campilan cadacuada, agingga iti maibusco ida:

³⁸ Ket isaadconto ti tronoc sadi Elam, ket dadaelecto manipud sadiay ti ari ken dagiti piprincipe, cuna ni Jehova.

³⁹ Ngem mapasamacto cadagiti maududi nga aldaw, a pagbaliwecto ti pannacacayaw ti Elam, cuna ni Jehova.