Jeremias 47 - Ti Biblia (1973)

Ti padto a maibusor iti Filistia.

¹ Ti sao ni Jehova a dimteng ken Jeremias a mammadto a maipapan cadagiti Filisteos, iti sacbay ti panangcabil ni Faraon iti Gaza.

² Castoy ti cuna ni Jehova: Adtoy, dagiti dandanum dumackelda nga aggapu iti amianan, ket agbalindanto nga ayus nga aglablabiang, ket layusendanto ti daga ken amin nga adda kencuana, ti ili ken dagiti agnaed kencuana; ket dagiti lallaki agickisdanto, ken amin dagiti agnaed iti daga agdung-awdanto.

³ Gapu iti daranudor ti panagbaddec dagiti cuco dagiti maingel, gapu iti dalagudug dagiti luganna, gapu iti caraducud dagiti pilidna, dagiti amma dida tumaliaw cadagiti annacda a gapu iti kinacapuy dagiti imada;

⁴ Maipuon iti aldaw a dumteng tapno madadael dagiti amin a Filisteos, ken mangkeltay manipud Tiro ken Sidon iti tunggal manulong a mabati: ta ni Jehova dadaelennanto dagiti Filisteos, ti nabati iti puro a Caftor.

⁵ Panagcalvo dumtengen iti Gaza; Ti Ascalon, ti nabati iti tanapda, napucawen: casano ti cabayag ti panangsugatmo ta bagim?

⁶ O sica campilan ni Jehova, casano ti cabayag iti dica pannacatalna? agsublica ita calubanmo; aginanaca ket agtalnaca.

⁷ Casano ti panagtalnam, idinto nga adda incumit kenca ni Jehova? a maibusor iti Ascalon, ken maibusor iti igid ti baybay, idiay ti tinudinganna.