Jeremias 46 - Ti Biblia (1973)

Maipadto ti pannacaparmec ni Faraon sadi Carkemis gapu ken Nabucodonosor. Ti Israel maliwliwa.

¹ Ti sao ni Jehova nga immay ken Jeremias a mammadto a maipapan cadagiti nasnacion.

² Iti Egipto: maipapan iti buyot ni Faraon-neco nga ari ti Egipto, nga adda idi iti denna ti carayan Eufrates idiay Carkemis, a kinabil ni Nabucodonosor nga ari ti Babilonia idi maicapat a tawen ni Joakim nga anac ni Josias, nga ari ti Juda.

³ Agsaganacayo iti sarapa ken calasag, ket umadanicayo iti bacal.

⁴ Cawesanyo dagiti cabayo, ket sumacaycayo, dacayo a tattao nga agcabayo, ket sumangocayo a sicacabal ti oloyo; pasilengenyo dagiti gayang, icabilyo dagiti cabal a badoyo.

⁵ Apay nga adda nakitac? isuda agcullayawda ket agsanodda; ket dagiti mamaingelda mapasagda, ket mapagtalawda a masingdat, ket dida tumaliaw: ti pangigtot adda iti tunggal sikigan, cuna ni Jehova.

⁶ Saan coma nga agtaray dagiti nasiglat, di met agtalaw ti maingel a tao; iti amianan iti denna ti carayan Eufrates nagtibcolda ket napasagda.

⁷ Asino daytoy a dumackel a cas iti Nilo, a dagiti danumna agpalongda a cas cadagiti carayan?

⁸ Ti Egipto dumackel a cas iti Nilo, ket dagiti danumna agpalong a cas cadagiti carayan: ket cunana, Tumacderacto, abbongacto ti daga; dadaelecto dagiti il-ili ken dagiti naed cadacuada.

⁹ Dumucloscayo, dacayo cabayo; ket agrungsotcayo, dacayo lugan; ket dagiti mamaingel a tattao magnada coma; da Cus ken Put, nga agiggem iti calasag; ken dagiti Ludim a mangiggem ken mangbiat iti ba-i.

¹⁰ Ta daytoy nga aldaw isu ti aldaw ti Apo, ni Jehova dagiti buybuyot, aldaw ti panangibales, tapno mabalesna dagiti casupadina: ket ti campilan mangalununto, ket mapnecto, ket uminumto nga agpennec iti darada; ta ti Apo, ni Jehova dagiti buybuyot, adda sacrificiona iti daga nga akinamianan iti denna ti carayan Eufrates.

¹¹ Sumang-atca sadi Galaad, ket alaem ti balsamo, O virgen nga anac ti Egipto: awan capapay-anna ti panangaramatmo cadagiti adu nga ag-agas; awan ti pannacaagas a maipaay kenca.

¹² Dagiti nasnacion nangngegdan ti pannacaibabainmo, ken ti daga napno iti riawmo; ta dagiti mamaingel maitublacda cadagiti mamaingel, mapasagda a maicanunong.

¹³ Ti sao ni Jehova nga imbagana ken Jeremias a mammadto, maipanggep iti yaay coma ni Nabucodonosor nga ari ti Babilonia ket cabilenna ti daga nga Egipto.

¹⁴ Ipalawagyo sadi Egipto, ket iwarragawagyo sadi Migdol, ket iwarnacyo sadi Memfis ken Tafnes: cunayo, Agtacdercayo, ket agsaganacayo; ta ti campilan nangalun-un iti aglicmut kenca.

¹⁵ Apay a dagiti napigsa a tattaom mapacsiatda? dida nagtacder, agsipud ta ni Jehova pinagtalawna ida.

¹⁶ Pinagtibcolna dagiti adu, wen, napasagda maysa iti rabaw iti sabali: ket kinunada, Tumacdercayo ket intayo coma manen iti bucodtayo nga ili, ken iti nacayanacantayo a daga a panawantayo ti campilan a mangparigat.

¹⁷ Imkisda sadiay, Ni Faraon nga ari ti Egipto nadadaelen; pinalabasnan ti natudingan a pannawen.

¹⁸ Cas sibibiagac, cuna ti Ari, a ti naganna Jehova dagiti buybuyot, pudno a cas Tabor iti nagbaetan dagiti banbantay, ken cas Carmelo iti denna ti baybay, casta ti umayto.

¹⁹ O sica nga anac a babai nga agnaed sadi Egipto, agsaganaca a macayawan; ta ti Memfis agbalinto a langalang, ket mapuuranto ket awan ti agnaed.

²⁰ Ti Egipto maysa a naimnas a bumalasang a vaca, ngem ti pannacadadael manipud iti amianan, dumteng wen dimtengen.

²¹ Casta met dagitinatangdanan a lallakina iti tengngana mayarigda cadagiti bumaro a vaca iti pagyaponan; ta mapasublida met, nagtalawda a nagcucuyog, dida nagtacder: ta ti aldaw ti pannacaparigatda dimtengen cadacuada, ti pannawen ti pannacasucnalda.

²² Ti unina umaspingto iti uni ti uleg; ta magnadanto agraman maysa a buyot, ket umaydanto a maibusor kencuana agraman cadagiti wasay, a cas cadagiti agtaga iti cayo.

²³ Pucanendanto ti bakirna, cuna ni Jehova, nupay nasamec; agsipud ta ad-aduda ngem cadagiti dudon, ket saanda a mabilang.

²⁴ Ti anac a babai ti Egipto mabainanto; mayawatto iti ima dagiti tattao a taga amianan.

²⁵ Ni Jehova dagiti buybuyot, a Dios ti Israel, cunana, Adtoy, dusaecto ni Amon a taga No, ken Faraon, ken Egipto, agraman cadagiti diosenna, ken ar-arina; ni met laeng Faraon ken dagiti agtalec kencuana;

²⁶ Ket yawatconto ida iti ima dagiti mangsapul cadagiti biagda, ken iti ima ni Nabucodonosor nga ari ti Babilonia, ken iti ima dagiti adipenna; calpasanna addanto manen agnaed, cas cadagiti aldaw idi ugma, cunani Jehova.

²⁷ Ngem dica agbuteng, O Jacob nga adipenco, dica met agcullayaw; O Israel: ta adtoy, siac ispalencanto manipud iti adayu, ken ti capuonam manipud iti daga ti pannacacayawda; ket ni Jacob agsublinto, ket natalgedto ken natalna, ket awanto ti mangpabuteng kencuana.

²⁸ Dica agbuteng, O Jacob nga adipenco, cuna ni Jehova; ta addaac kenca: ta aramidecto ti naananay a panungpalan dagiti amin a nasnacion isuda a nangiturongac kenca; ngem diacto aramiden ti naananay a panungpalam, ngem bagbagaancanto cas maiparbeng ket diacto ipalubos a pulos nga awan ti dusam.