Jeremias 44 - Ti Biblia (1973)

Ni Jeremias tubngarenna dagiti tattao, ket ipalawagna ti pannacadadaelda sadi Egipto. Gapu ta isu saanda nga impangag idi, balacadan ni Jeremias ida manen, ket ibagana cadacuada a bassito dagiti agsubli sadi Judea.

¹ Ti sao a dimteng ken Jeremias a maipapan cadagiti amin a Judios a nagnaed iti daga nga Egipto, a nagnaed sadi Migdol, ken sadi Tafnes, ken sadi Memfis, ken iti daga ti Patros, a kinunana,

² Castoy ti cuna ni Jehova dagiti buybuyot, a Dios ti Israel: Nakitayon ti amin a dakes nga inyegco iti Jerusalem, ken cadagiti il-ili ti Juda; ket, adtoy, daytoy nga aldaw langalangda, ket awan ti tao nga agnaed cadacuada,

³ A gapu iti kinadakesda nga inaramidda a ginargaridac nga agpungtot, iti inda panagpuur iti incienso, ken agservi cadagiti sabali a diosen a saanda a naammoan, isuda, wenno dacayo, wenno dagiti ammayo.

⁴ Nupay imbaonco cadacayo dagiti amin nga adipenco a mammadto, a bumangonac a masapa tapno ibaonco ida, a kinunac, O dicayo agaramid itoy macarimon a banag a guraec.

⁵ Ngem saanda nga impangag, wenno inyallingagda ti pagdengngegda tapno agbabawida iti kinadakesda, tapno, dida agpuur iti incienso cadagiti sabali a diosen.

⁶ Gapuna a ti pungtot ken ungetco naibuyat, ket simged cadagiti il-ili ti Juda, ken cadagiti lanlansangan ti Jerusalem; ket narbada ken langalangda a cas itoy nga aldaw.

⁷ Castoy ngarud ti cuna ni Jehova, a Dios dagiti buybuyot, a Dios ti Israel; Apay aramidenyo ti dackel a kinadakes a maibusor cadagiti cararuayo met laeng, tapno dadaelenyo cadacayo ti lalaki ken babai, maladaga ken agsussuso, iti tengnga ti Juda, tapno awanto ti matda cadacayo;

⁸ Iti nanggargarianyo caniac nga agpungtot babaen dagiti gappuanan dagiti im-imayo, a puuranyo ti incienso cadagiti sabali a diosen iti daga nga Egipto, nga incay nagyanan; tapno madadaelcayo, ken tapno agbalincayo coma a lunod ken pacaumsian cadagiti amin a nasnacion ti daga.

⁹ Nalipatanyon aya ti kinadakes dagiti ammayo, ken ti kinadakes dagiti ar-ari ti Juda, ken ti kinadakes dagiti assawada, ken ti bucodyo a kinadakes, ken ti kinadakes dagiti assawayo a babbai, nga inaramidda iti daga ti Juda, ken cadagiti lanlansangan ti Jerusalem?

¹⁰ Saanda a nagpacumbaba agingga itoy nga aldaw, saanda a nagbuteng, dida met nagna iti lintegco, wenno cadagiti ipaalagadco, nga incabilco iti sangoananyo ken iti sangoanan dagiti ammayo.

¹¹ Gapuna a castoy ti cuna ni Jehova dagiti buybuyot, a Dios ti Israel: Adtoy, isangocto ti rupac a maibusor cadacayo tapno pagdacsan, a mangdadael met laeng iti amin a Juda.

¹² Ket alaecto ti natda iti Juda, dagiti agturong a sumrec iti daga nga Egipto tapno agyanda sadiay, ket maibusdanto amin; iti daga nga Egipto mapasagdanto; maibusdanto babaen ti campilan ken iti bisin; mataydanto manipud iti cabassitan inggana met laeng iti cadackelan babaen ti campilan ken iti bisin; ket isudanto ti pacatabbaawan, ken pagsidaawan, ken pacailunodan ken pacaumsian.

¹³ Ta dusaecto dagidiay agnaed iti daga nga Egipto, a cas ti panangdusac idi iti Jerusalem babaen ti campilan, iti bisin, ken iti angol;

¹⁴ Iti casta awanto ti matda a taga Juda, a napan iti daga nga Egipto tapno agyanda sadiay, a macalisi wenno matdanto, tapno agsubli iti daga ti Juda, a tarigagayanda a pagsublian tapno agnaedda sadiay: ta awanto ti agsubli no di laeng dagidiay nagtalaw.

¹⁵ Idin dagiti amin a lallaki nga ammoda a dagiti assawada puuranda ti incienso cadagiti sabali a diosen, ken dagiti amin a babbai a nagtacder sadiay, maysa a dackel a gimong, dagiti amin met laeng a tattao a nagnaed iti daga nga Egipto, sadi Patros, simmungbatda ken Jeremias, a kinunada,

¹⁶ No maipapan iti sao nga insaom cadacami iti nagan ni Jehova, dacami saandacanto nga ipangag.

¹⁷ No di ket tungpalenminto a di-bumurong ti tunggal sao a rimmuaren iti ngiwatmi, a mangpuur iti incienso iti reina ti langit, ken mangibuyat cadagiti datdaton a mainum kencuana, a cas inaramidmin, dacami ken dagiti ammami, dagiti ar-ari ken piprincipe cadagiti il-ili ti Juda, ken cadagiti lanlansangan ti Jerusalem; ta iti daydi umanayen ti taraonmi, ken nacaradcadcami, ket awan ti nakitami a dakes.

¹⁸ Ngem manipud idi insardengmi ti panagpuur ti incienso iti reina ti langit, ken imbuyat kencuana dagiti datdaton a mainum, agcurangcami iti isu-amin, ket maibuscami babaen ti campilan, ken iti bisin.

¹⁹ Ket idi pinuuranmi ti incienso iti reina ti langit, ken imbuyatmi kencuana dagiti datdaton a mainum, inaramidmi aya dagiti cancanen a pagdayaw kencuana, ken imbuyatmi kencuana dagiti datdaton a mainum nga awan dagiti assawami a lallaki?

²⁰ Idin kinuna ni Jeremias cadagiti amin a tattao, cadagiti lallaki ken cadagiti babbai, cadagiti amin met laeng a tattao a nangted kencuana iti dayta a sungbat, a kinunana,

²¹ Ti incienso a pinuuranyo cadagiti il-ili ti Juda, ken cadagiti lanlansangan ti Jerusalem, dacayo ken dagiti ammayo, dagiti ar-ariyo ken piprincipeyo, ken dagiti tattao ti daga, saan aya a nalagip ni Jehova, ken dina pinanunot?

²² Iti casta ni Jehova saanen a nacaitured, a gapu iti kinadakes dagiti aramidyo, ken gapu cadagiti kinarimon nga inaramidyo; gapuna a ti dagayo agbalinen a langalang, ken pagsidsiddaawan, ken pacailunodan, nga awan ti agnaed a cas itoy nga aldaw.

²³ Agsipud ta pinuuranyo ti incienso, ken gapu ta nagbasolcayo a maibusor ken Jehova, ken saanyo a nagtulnogan ti timec ni Jehova, dicay met nagna iti lintegna, wenno cadagiti ipaalagadana, wenno cadagiti pangpanecnecna; gapuna daytoy a kinadakes napasamac cadacayo, a cas itoy nga aldaw.

²⁴ Castamet ni Jeremias kinunana cadagiti amin a tattao, ken cadagiti amin a babbai, Denggenyo ti sao ni Jehova, amin a taga Juda nga adda iti daga nga Egipto:

²⁵ Castoy ti cuna ni Jehova dagiti buybuyot, a Dios ti Israel, a cunana, Dacayo ken dagiti assawayo a babbai nagsaocayon nga agpadpada babaen cadagiti ngiwatyo, ket cadagiti imayo isu tinungpalyo a kinunayo, Di-bumurong a tungpalenminto dagiti carcarimi nga incarimin a puuran ti incienso iti reina ti langit, ken ibuyatminto kencuana dagiti datdaton a mainum: pasingkedanyo ngarud dagiti carcariyo, ket tungpalenyo dagiti carcariyo.

²⁶ Gapuna denggenyo ti sao ni Jehova, amin a taga Juda nga agnaed iti daga nga Egipto: Adtoy, nagsapataac babaen ti dackel a naganco, cuna ni Jehova, a ti naganco saanto a balicsenen ti ngiwat ti siasinoman a tao ti Juda iti amin a daga nga Egipto, a cunana, Cas sibibiag ni Apo Jehova.

²⁷ Adtoy, bantayac ida a maipaay iti dakes, ket saan a maipaay iti imbag; ket dagiti amin a lalaki ti Juda nga adda iti daga nga Egipto maibusdanto babaen ti campilan ken iti bisin, inggana iti panungpalanda.

²⁸ Ket dagidiay nacatalaw iti campilan agsublidanto manipud iti daga ti Egipto agingga iti daga ti Juda, bassit ti dagupda; ket amin a natda iti Juda a napan iti daga ti Egipto tapno agyanda sadiay, ammodanton no siasino ti akinsao iti mataginayonto, ti saoc wenno ti saoda.

²⁹ Ket daytoy ti pagilasinan cadacayo, cuna ni Jehova, a dusaennacayto, itoy a disso, tapno ammoyo a dagiti sasaoc mataginayondanto a di bumurong a maibusor cadacayo a maipaay iti dakes:

³⁰ Castoy ti cuna ni Jehova, Adtoy, itdecto ni Faraon Hofra nga ari ti Egipto iti ima dagiti cabusorna, ken iti ima dagiti mangbiroc iti biagna cas iti panangtedco ken Sedekias nga ari ti Juda iti ima ni Nabucodonosor nga ari ti Babilonia, a cabusorna idi, ken nangbiroc iti biagna.