Jeremias 43 - Ti Biblia (1973)

Ni Johanan idalanna ti matda iti Juda idiay Egipto. Ni Jeremias ipadtona ti yaay ni Nabucodonosor sadi Egipto.

¹ Ket naaramid nga idi a ni Jeremias nagibusannan ti panagsaona cadagiti amin a tattao cadagiti sasao ni Jehova a Diosda isu a pinaibaon ti Dios cadacuada, amin dagitoy met laeng a sasao,

² Idin nagsao da Azarias nga anac ni Osaya, ken Johanan nga anac ni Carea, ken amin dagiti nacuspag a lallaki, a kinunada ken Jeremias, Sica agsaoca a siuulbod: ni Jehova a Diostayo saannaca nga imbaon tapno cunam, Dicayto mapan sadi Egipto tapno agyan sadiay;

³ No di ket ni Baruc nga anac ni Nerias durugannaca a maibusor cadacami, tapno yawatnacami iti ima dagiti Caldeos, tapno papatayendacami, ken ipandacami a nacayawan sadi Babilonia.

⁴ Iti casta ni Johanan nga anac ni Carea, ken amin a cacapitan dagiti buybuyot, ken isu-amin dagiti tattao saanda a tinungpal ti timec ni Jehova, tapno agnaedda iti daga ti Juda.

⁵ Ngem ni Johanan nga anac ni Carea, ken amin a cacapitan dagiti buybuyot, innalada ti amin a natda iti Juda, a nagsubli a naggapu cadagiti amin a nasnacion a nacaipananda idi tapno agyanda iti daga ti Juda;

⁶ Dagiti lallaki, ken babbai, ken ubbing, ken dagiti anac a babbai ti ari, ken tunggal tao a ni Nabuzaradan a capitan ti guardia imbatina idi ken Gedalias nga anac ni Ahicam nga anac ni Safan; ken ni Jeremias a mammadto, ken ni Baruc nga anac ni Nerias.

⁷ Ket napanda iti daga nga Egipto; ta saanda a tinungpal ti timec ni Jehova: ket immayda sadi Tafnes.

⁸ Idin immay ti sao ni Jehova ken Jeremias sadi Tafnes a kinunana,

⁹ Alaem dagiti dadackel a batbato ita imam, ket ilumlummo ida iti masa a naladrilloan nga adda iti sercan ti balay ni Faraon sadi Tafnes iti imatang dagiti lallaki ti Juda;

¹⁰ Ket cunam cadacuada, Castoy ti cuna ni Jehova dagiti buybuyot, a Dios ti Israel: Adtoy, agbaonacto, ket alaecto ni Nabucodonosor nga ari ti Babilonia, nga adipenco, ket isaadconto ti tronona iti rabaw dagitoy a batbato nga inlumlumco; ket iyucradnanto ti naarian a toldana iti rabawda.

¹¹ Ket umayto, ket cabilennanto ti daga nga Egipto; dagiti agpaay ken patay mayawatdanto ken patay, ken dagiti agpaay iti pannacacayaw, iti pannacacayaw, ken dagiti agpaay iti campilan, iticampilan.

¹² Ket pasgedacto ti apuy cadagiti balbalay dagiti diosen ti Egipto; ket puurannanto ida, ket ipannanto ida a nacayawan: ket cawesannanto ti bagina met laeng iti daga nga Egipto, cas la iti panagcawes ti maysa a pastor; ket rumuarto sadiay a sitatalna.

¹³ Burakennanto met dagiti monmon ti Bet-semes, nga adda iti daga nga Egipto; ket dagiti balbalay dagiti diosen ti Egipto puurannanto iti apuy.