Jeremias 41 - Ti Biblia (1973)

Ni Ismael papatayenna ni Gedalias ken dadduma pay ket cayawanna dagiti taga Mizpa. Ni Johanan subbotenna ida.

¹ Ket naaramid iti maicapito a bulan, a ni Ismael nga anac ni Netanias, nga anac a lalaki ni Elisama, a nagtaud iti naarian a putot ken maysa cadagiti pagturayen ti ari, ken sangapulo a lallaki a cadduana immayda ken Gedalias nga anac a lalaki ni Ahicam idiay Mizpa; ket nakipanganda iti tinapay idiay Mizpa.

² Idin bimmangon ni Ismael nga anac ni Netanias, ken dagiti sangapulo a lallaki nga adda idi kencuana, ket kinabilda ni Gedalias nga anac ni Ahicam nga anac ni Safan iti campilan, ket pinatayna, isu a ti ari ti Babilonia insaadna a gobernador ti daga.

³ Ni Ismael pinatayna dagiti amin a Judios nga adda idi kencuana, dagidi adda, ken Gedalias idiay Mizpa, ken dagiti Caldeos a nasaracan sadiay, dagiti lallaki ti gubat.

⁴ Ket naaramid iti maicadua nga aldaw calpasan ti panangpapatayna ken Gedalias, ket awan pay ti tao a nacaammo idi,

⁵ Nga immay dagiti lallaki a naggapu iti Sikem, naggapu iti Silo, ken naggapu iti Samaria, walopulo met laeng a lallaki, a nakiskisan dagiti imingda, ken dagiti pagananayda narayab, ken dagiti bagbagida sinugatdan, a siiiggemda cadagiti datdaton a macan ken incienso, tapno iyegda ida iti balay ni Jehova.

⁶ Ket ni Ismael nga anac ni Netanias rimmuar iti Mizpa a sumabet cadacuada, ket agsangsangit bayat ti ipapanna: ket naaramid idi simmabet cadacuada, a kinunana cadacuada, Umaycayo ken Gedalias nga anac ni Ahicam.

⁷ Ket iti casta idi nga immayda iti tengnga ti ili, ni Ismael nga anac ni Netanias pinatayna ida ket isu ken dagiti lallaki nga adda idi kencuana imbellengda ida iti bito.

⁸ Ngem nasaracan idi cadacuada ti sangapulo a lallaki a kinunada ken Ismael, Dinacami patayen; ta adda nga inlemmengmi a naidulin iti away ti trigo, ken cebada, ken lana, ken diro. Iti casta indianna, ket saanna ida nga pinatay a maicanunong cadagiti cacabsatda.

⁹ Ti bito a pagibellengan ni Ismael cadagiti amin a bangcay dagiti lallaki a pinatayna idi iti arpad ni Gedalias (isu met laeng daydi inaramid ni Asa a gapu iti buteng ken Baasa nga ari ti Israel), ni Ismael nga anac ni Netanias pinunnona daydi cadagiti napapatay.

¹⁰ Idin ni Ismael impanna a kinayawan amin a natda cadagiti tattao idiay Mizpa, dagiti met laeng annac a babbai ti ari, ken isu-amin a tattao a nabati idiay Mizpa, a ni Nabuzaradan a capitan ti guardia incumitna idi ken Gedalias nga anac ni Ahicam; ni Ismael nga anac ni Netanias impanna ida a kinayawan, ket pimmanaw a mapan cadagiti annac ti Ammon.

¹¹ Ngem idi ni Johanan nga anac a lalaki ni Carea, ken amin a cacapitan dagiti buybuyot, nga adda idi kencuana nangngegda ti maipapan iti amin a kinadakes nga inaramid ni Ismael nga anac ni Netanias.

¹² Ngarud innalada amin dagiti lallaki, ket napanda makigubat ken Ismael nga anac ni Netanias, ket isu nasaracanda iti denna dagiti dadackel a dandanum nga adda idiay Gabaon.

¹³ Naaramid nga idi dagiti amin a tattao nga adda idi ken Ismael nakitada ni Johanan nga anac ni Carea, ken dagiti amin a cacapitan dagiti buybuyot nga adda idi kencuana, naragsacda.

¹⁴ Iti casta dagiti isu-amin a tattao ni Ismael nga impanna idi a kinayawan a naggapu iti Mizpa nagbawingda ket nagsublida ket napanda ken Johanan nga anac ni Carea.

¹⁵ Ngem ni Ismael nga anac ni Netanias intalawanna ni Johanan ket caduana dagiti walo a lallaki, ket napan cadagiti annac ti Ammon.

¹⁶ Idin ni Johanan nga anac ni Carea, ken dagiti amin a cacapitan dagiti buybuyot nga adda idi kencuana, insublida amin a natda cadagiti tattao a sinubbotna ken Ismael nga anac ni Netanias, dagidi innalana idiay Mizpa calpasan ti panangpatayna ken Gedalias nga anac ni Ahicam, cayatna a sawen, dagiti lallaki ti gubat, ken dagiti babbai, ken dagiti ubbing, ken dagiti eunucos isuda nga insublina a naggapu iti Gabaon.

¹⁷ Ket pimmanawda, ket nagnaedda sadi Geruth-kimham nga adda iti denna ti Bethlehem, tapno agturongda idiay Egipto.

¹⁸ A gapu cadagiti Caldeos; ta nagbutengda idi cadacuada, agsipud ta ni Ismael nga anac ni Netanias pinatayna ni Gedalias nga anac ni Ahicam, isu a ti ari ti Babilonia insaadna a gobernador iti daga.