Jeremias 40 - Ti Biblia (1973)

Ni Jeremias mabati ken Gedalias. Ni Gedalias salacnibanna dagiti tattao a mabati. Isu balacadan ni Johanan a maipapan ken Ismael.

¹ Ti sao a dimteng ken Jeremias a naggapu ken Jehova idi a ni Nabuzaradan a capitan ti guardia isu napalubusannan a pumanaw iti Rama idinto nga innalana a sicacawar iti nagtengngaan dagiti amin a nacayawan iti Jerusalem ken Juda, a naipanda a nacayawan idiay Babilonia.

² Ket ti capitan ti guardia innalana ni Jeremias, ket kinunana kencuana, Ni Jehova a Diosmo binalicasna daytoy a dakes a maicaniwas itoy a disso.

³ Ket ni Jehova inyegna, ket inaramidna a cas ti panagsaona idi: agsipud ta nagbasolcayo a maicaniwas ken Jehova, ket saancayo a nagtulnog iti timecna, gapuna a daytoy immapay cadacayo.

⁴ Ket ita, adtoy, siac palubusanca itoy nga aldaw cadagiti cawar nga adda iti imam. No ipapanmo a nasayaat iti icucuyogmo caniac agingga idiay Babilonia, umayca, ket siac taripatoencanto a naimbag; ngem no pagarupem a dakes ti icucuyogmo caniac agingga sadi Babilonia, dica aramiden: adtoy, ti amin a daga adda iti sangom; iti sadinoman a pagarupem a naimbag ken maiparbeng a papanam, inca sadiay.

⁵ Ket idi isu saan pay a nagsubli, Agsublica ngarud, kinunana, ken Gedalias nga anac ni Ahicam, nga anac ni Safan, isu a ti ari ti Babilonia insaadna a gobernador cadagiti il-ili ti Juda, ket makipagnaedca kencuana iti tengnga dagiti tattao; wenno mapanca iti uray sadinoman a pagarupem a maiparbeng a papanam. Iti casta ti capitan ti guardia intedna kencuana ti taraon ken maysa a sagut, ket isu pinalubosannan.

⁶ Idin napan ni Jeremias ken Gedalias nga anac ni Ahicam sadi Mizpa, ket nakipagnaed kencuana iti tengnga dagiti tattao a nabati iti daga.

⁷ Ket idi dagiti amin a cacapitan dagiti buybuyot nga adda iti away, isuda met laeng ken dagiti lallakida, nangngegda a ti ari ti Babilonia insaadna ni Gedalias nga anac ni Ahicam a gobernador iti daga, ket incumitna idi kencuana dagiti lallaki, ken babbai, ken ubbing, ken dagiti capanglawan iti daga, isuda a saan a naipan idi a nacayawan sadi Babilonia;

⁸ Idin immayda ken Gedalias sadi Mizpa, da Ismael nga anac ni Netanias, ken Johanan ken Jonatan nga annac ni Carea, ken Saraya nga anac ni Tanhumet, ken dagiti annac ni Efai a Netofatita, ken Jezanias nga anac ti Maacatita, isuda ken dagiti lallakida.

⁹ Ket ni Gedalias nga anac ni Ahicam nga anac ni Safan nagsapata cadacuada ken cadagiti lallakida, a kinunana, Saancayo coma a mabuteng nga agservi cadagiti Caldeos: agnaedcayo iti daga, ket agservicayo iti ari ti Babilonia, ket naimbagto cadacayo.

¹⁰ No maipapan caniac, adtoy, agnaedacto iti Mizpa, tapno sumango cadagiti Caldeos nga umayto cadatayo: ngem dacayo urnongenyo ti arac ken bungbunga iti pannawen ti pudot ken lana, ket icabilyo ida cadagiti alicamenyo, ket agnaedcayo cadagiti il-iliyo nga innalayon.

¹¹ Casta met dagiti Judios nga adda idi sadi Moab, ken cadagiti annac ti Ammon, ken sadi Edom, ken cadagiti amin a dagdaga, nangngegda a ti ari ti Babilonia imbatina idi ti natda ti Juda, ket isu insaadna iti ngatoenda ni Gedalias nga anac ni Ahicam nga anac ni Safan;

¹² Idin dagiti amin a Judios nagsublida a naggapu cadagiti amin a disso a nacaibellenganda idi, ket napanda iti daga a Juda ken Gedalias sadi Mizpa, ket inurnongda ti arac ken bungbunga a nawadwad unay iti pannawen ti pudot.

¹³ Castamet ni Johanan nga anac ni Carea, ken amin a cacapitan dagiti buybuyot nga adda idi iti away napanda ken Gedalias sadi Mizpa.

¹⁴ Ket kinunada kencuana, Dica ammo aya a ni Baalis nga ari dagiti annac ti Ammon imbaonnan ni Ismael nga anac ni Netanias tapno alaenna ta biagmo? Ngem ni Gedalias nga anac ni Ahicam saanna idi a pinati.

¹⁵ Iti casta ni Johanan nga anac ni Carea nagsao ken Gedalias sadi Mizpa a sililimed, a kinunana, Dawatec kenca, a palubosannac, ket innacto papatayen ni Ismael nga anac ni Netanias, ket awanto ti tao a macaammo: ania ti gapuna nga alaenna coma ta biagmo, tapno dagiti amin a Judios a nagurnong kenca mawarawarada coma, ken ti matda ti Juda mapucaw?

¹⁶ Ngem ni Gedalias nga anac ni Ahicam kinunana ken Johanan nga anac ni Carea, Dicanto aramiden daytoy a panggep; ta ulbod ti sasawem a maipapan ken Ismael.