Jeremias 4 - Ti Biblia (1973)

Ti pannacaserrec ti Juda maipadto, ken ti un-unnoy kencuana.

¹ No agsublicanto, O Israel, cuna ni Jehova, no agsublicanto caniac, ken iccatem dagiti kinarimonmo iti imatangco; saancanto a mapaalis.

² Ket isapatamto, Cas sibibiag ni Jehova, iti kinapudno, iti kinajusticia, ken iti kinalinteg; ken dagiti nasnacion mabendicionanda kencuana, ket kencuana agragrag-odanto.

³ Ta castoy ti cuna ni Apo Jehova cadagiti lallaki ti Juda ken ti Jerusalem, Rebbaenyo ti talon a binaybay-anyo, ket dicayo agmula iti nagbaetan dagiti sisiit.

⁴ Agcugitcayo ken Jehova, ket iccatenyo ti makinrabaw a cudil ti pusoyo, dacayo lallaki ti Juda ken agnaed ti Jerusalem; di la ket ta ti pungtotco rumuar a cas apuy, ket aguram nga awan ti macaiddep kencuana, gapu iti cadakes dagiti gapuananyo.

⁵ Ipacdaaryo idiay Juda, ken iwarragawagyo idiay Jerusalem; ket cunaenyo, Puyotenyo ti tangguyob iti daga: ipuccawyo, ket cunayo, Aguornongcayo, ket intayon cadagiti nasarikedkedan nga il-ili.

⁶ Mangipasdeccayo iti maysa a wagayway iti agturong idiay Sion: agtalawcayo tapno mailisicayo, dicayo agtactac; ta iyegconto ti dakes manipud iti amianan, ken maysa a dackel a pannacadadael.

⁷ Maysa a leon simmang-at manipud iti casamecanna, ken maysa a mangdadael cadagiti nasnacion; isu adda iti dalanna, rimmuar iti dissona, tapno aramidenna ti dagam a langalang, tapno dagiti il-ilim maracracda, nga awan ti agnaed.

⁸ Gapu itoy agbarikescayo iti nakersang a lupot, agunnoycayo ken agdung-awcayo; ta ti narungsot a pungtot ni Jehova saan a simmina cadatayo.

⁹ Ket maaramidto iti dayta nga aldaw, cuna ni Jehova, a ti puso ti ari marunawto, ken ti puso dagiti piprincipe; ken dagiti papadi masdaawdanto, ket dagiti mammadto aglagawdanto.

¹⁰ Sa kinunac, Ay, Apo Jehova! pudno nga inallilawmo daytoy nga umili ken ti Jerusalem, a kinunam, Addanto talnayo; idinto a ti campilan abutenna ti biag.

¹¹ Iti dayta a pannawen maisaonto iti daytoy nga umili ken iti Jerusalem, Maysa a napudot nga angin manipud cadagiti nalucasan a panpantoc iti let-ang nga agturong iti anac a babai ti ilic, saan nga mangsariwagwag, wenno mangdalus;

¹² Maysa a napigpigsa nga angin nga aggapu cadagitoy umayto caniac: ita iyebcasconto met ti panangocom a maibusor cadacuada.

¹³ Adtoy, isu sumang-atto a cas cadagiti ulep, ket dagiti luganna casdanto la alipugpug; dagiti cabayona naparpartacda ngem dagiti aguila. Asitayo pay! ta narbectayo,

¹⁴ O Jerusalem, dalusam ti pusom iti kinadakes, tapno maisalacanca. Casano ti cabayag ti panagtalinaedda kenca, dagiti dakes a pampanunotmo?

¹⁵ Ta maysa a timec ipalawagna manipud iti Dan, ket iwarragawagna ti dakes manipud cadagiti turturod ti Efraim.

¹⁶ Saritaenyo cadagiti nasnacion; adtoy, iwarragawagyo a maicaniwas iti Jerusalem, a dagiti agbanbantay umayda manipud iti adayu a daga, ket agtimecda a maicaniwas cadagiti il-ili ti Juda.

¹⁷ Cas cadagiti agbanbantay iti talon casta ti pannacailicmut dagiti maibusor kencuana, agsipud ta isu nagsukir a maicaniwas caniac, cuna ni Jehova.

¹⁸ Ti dalanmo ken dagiti gapuanam nagun-odda dagitoy a banbanag kenca; daytoy ti kinadakesmo; pudno a napait, ta dumanon dita pusom.

¹⁹ Anian ti tuocco? Anian ti tuocco! agsakit ti caungan itoy pusoc; ti pusoc saan nga agtalna; diac macaulimec; agsipud ta nangngegmo, O cararuac, ti uni ti tangguyob, ti buac ti gubat.

²⁰ Pannacarbec ken pannacarbec ti maiririaw; ta sui-amin a daga nalangalang: pettat a nadadael dagiti toltoldac, ken dagiti bengbengco iti maysa a canito.

²¹ Casano ti cabayag ti pannacakitac ti wagayway ken panangdengngeg ti uni ti tangguyob?

²² Ta ti ilic maag, saandac nga amammo; isuda nacunengda nga annac, ket awan ti pannacaawatda; masiribda nga agaramid ti dakes, ngem ti panagaramid iti naimbag awan ti pannacaammoda.

²³ Kinitac ti daga, ket adtoy, isu langalang ken ongaong; ken dagiti langlangit, ket awan ti silaw cadacuada.

²⁴ Kinitac dagiti banbantay, ket adtoy, nagkintayegda, ket amin dagiti turturod naggarawda nga agsublisubli.

²⁵ Kimmitaac, ket, adtoy, awan ti tao, ket dagiti amin a tumatayab ti tangatang nagtalawda.

²⁶ Kimmitaac, ket, adtoy, ti nabunga a talon let-angen, ket amin dagiti il-ilina narbada iti imatang ni Jehova, ken iti sangoanan ti narungsot a pungtotna.

²⁷ Ta castoy ti cuna ni Jehova, Ti amin a daga aglangalangto; nupay casta diacto talipupusen.

²⁸ Gapu iti daytoy ti daga agladingitto, ken dagiti langlangit iti ngato agngisitdanto; agsipud ta sinaoc, ken pinanggepco, ket diac imbabawi, ket diacto met agsunod.

²⁹ Tunggal ili agtalaw gapu iti daranudor dagiti lallaki a nagcabayo ken lallaki a panaan; mapanda cadagiti casamecan, ken umulida iti rabaw dagiti batbato: tunggal ili mabaybay-an, ket awan ti tao nga agnaed idiay.

³⁰ Ket sica, no mapaglangalangca, ania ti aramidemto? Uray, no agcawesca iti escarlata, uray pay agarcosca cadagiti binalitocan, uray pay padackelem dagiti matam iti pinta, awan capapayan ti panangpapintasmo ita bagim met laeng; dagiti caayanayatmo uyawendaca, isuda camatenda ti biagmo.

³¹ Ta nangngegco ti maysa a timec a cas maysa a babai nga agpasical, cas ti tuoc ti mangipasngay ti anacna nga inauna, ti timec ti anac a babai ti Sion, nga agngoyngoy-a, nga iyucradna dagiti im-imana, a cunana, Asiac pay ita! ta ti cararuac matalimudaw iti sangoanan dagiti mangpapatay.