Jeremias 39 - Ti Biblia (1973)

Dagiti Caldeos alaenda ti Jerusalem. Da Jeremias ken Ebed-melec mailiclicda.

¹ Ket naaramid idi a ti Jerusalem naala (iti maicasiam a tawen ni Sedekias nga ari ti Juda, iti maicasangapulo a bulan, immay ni Nabucodonosor nga ari ti Babilonia ken amin a buyotna a maibusor iti Jerusalem ket limmacubda kencuana;

² Iti maicasangapulo ket maysa a tawen ni Sedekias, iti maicapat a bulan, ti maicasiam nga aldaw ti bulan, maysa a gutbaw naaramid iti ili),

³ Nga amin a piprincipe ti ari ti Babilonia simrecda, ket nagtugawda iti ruangan a nagtengnga, da Nergal-sarezer, Samgar-nebo, Sarsekim, Rabsaris, Nergal-sarezer, Rabmag, agraman cadagiti amin a sabali a piprincipe ti ari ti Babilonia.

⁴ Ket naaramid nga idi ni Sedekias nga ari ti Juda ken dagiti amin a lallaki ti gubat nakitada ida, nagtarayda; ket rimmuarda iti ili iti rabii, iti dalan ti minuyungan ti ari, a limmasat iti ruangan nga adda iti nagbaetan dagiti dua a bacud; ket rimmuar a nagpa-Araba.

⁵ Ngem ti buyot dagiti Caldeos kinamatna ida, ket nacamacamda ni Sedekias cadagiti tanap ti Jerico; ket idi isu innalada, insangpetda ken Nabucodonosor nga ari ti Babilonia idiay Ribla iti daga nga Hamat; ket isu inocomna.

⁶ Idin ti ari ti Babilonia pinatayna dagiti annac a lallaki ni Sedekias sadi Ribla iti imatangna: casta met ti ari ti Babilonia pinatayna dagiti amin a natatacneng iti Juda.

⁷ Mainayon pay sinuatna dagiti mata ni Sedekias, ket isu kinawaranna, tapno isu ipanna sadi Babilonia.

⁸ Ket dagiti Caldeos pinuuranda ti balay ti ari, ken dagiti balbalay dagiti tattao iti apuy, ket rinebbada dagiti bacud ti Jerusalem.

⁹ Idin ni Nabuzaradan a capitan ti guardia, impanna a nacayawan sadi Babilonia ti natda cadagiti tattao a nabati iti ili, dagiti met naglicud a napan kencuana, ken ti natda cadagiti tattao a nabati.

¹⁰ Ngem ni Nabuzaradan a capitan ti guardia imbatina dagiti napanglaw cadagiti tattao, nga awan idi ti cucuada, iti daga ti Juda, ket intedna cadacuada dagiti cauvasan ken taltalon iti isu met laeng a pannawen.

¹¹ Ket ni Nabucodonosor nga ari ti Babilonia binilinna ni Nabuzaradan a capitan ti guardia a maipapan ken Jeremias, a kinunana,

¹² Isu alaem, ken taripatoem a naimbag ket dica ranggasan; no di ket aramidem kencuana ti cas ibagananto met laeng kenca.

¹³ Iti casta ni Nabuzaradan a capitan ti guardia nagbaon, ket da Nabusazban, Rabsaris, ken Nergal-sarezer, Rabmag, ken dagiti amin a cangronaan nga agtuturay ti ari ti Babilonia;

¹⁴ Nagbaonda ket innalada ni Jeremias idiay paraangan ti guardia ket isu incumitda ken Gedalias nga anac ni Ahicam, nga anac ni Safan, tapno iyawidna coma iti balayna. Iti casta isu nagnaed iti nagtengngaan dagiti tattao.

¹⁵ Ket ti sao ni Jehova dimteng ken Jeremias, idinto a sipupupuc iti paraangan ti guardia, a kinunana,

¹⁶ Inca, ket agsaoca ken Ebed-melec nga Etiope, a cunam, Castoy ti cuna ni Jehova dagiti buybuyot, a Dios ti Israel; Adtoy, iyegconto dagiti sasaoc iti daytoy nga ili a maipaay iti pagdacsan, ket saan a maipaay a pagimbagan; ket matungpaldanto iti sangom iti dayta nga aldaw.

¹⁷ Ngem ispalencanto iti dayta nga aldaw, cuna ni Jehova; ket saancanto a mayawat iti ima dagiti tattao a pagbutngam.

¹⁸ Ta kinapudnona siac ispalencanto, ket dicanto mapasag iti campilan, no di ket ti biagmo caslanto sinamsammo; agsipud ta nagtalecca caniac, cuna ni Jehova.