Jeremias 38 - Ti Biblia (1973)

Ni Jeremias mabalud manen ngem mairuar. Maisaclang manen a sililimed ken Sedekias.

¹ Ket da Sefatias nga anac ni Matan, ken Gedalias nga anac ni Pasur, ken Jucal nga anac ni Selemias, ken ni Pasur nga anac ni Malkias nangngegda dagiti sasao a ni Jeremias insaona cadagiti amin a tattao, a kinunana,

² Castoy ti cuna ni Jehova, Ti agnaed itoy nga ili matayto babaen ti campilan, gapu iti bisin, ken iti angol; ngem ti rumuar a mapan cadagiti Caldeos agbiagto, ket ti biagna addanto kencuana a cas sinamsamna, ket isu agbiagto.

³ Castoy ti cuna ni Jehova, Pudno a daytoy nga ili mayawatto iti ima ti buyot ti ari ti Babilonia, ket alaennanto.

⁴ Idin kinuna dagiti piprincipe iti ari, Dawatenmi kenca a daytoy a tao, mapapatay coma; agsipud ta pagcapuyenna dagiti im-ima dagiti lallaki ti gubat a mabati itoy nga ili, ken dagiti im-ima dagiti amin a tattao, iti panagsaona ti castoy a sasao cadacuada: ta daytoy a tao saanna a sapulen ti pagimbagan daytoy nga ili, no di ket ti pagdacsanna.

⁵ Ket ni Sedekias nga ari kinunana, Adtoy, isu adda iti imayo; ta ti ari awan kencuana ti pannacabalin nga agaramid iti aniaman a maibusor cadacayo.

⁶ Idin innalada ni Jeremias, ket isu imbellengda iti nauneg a pagbaludan ni Malkias nga anac ti ari, nga adda idi iti paraangan ti guardia: ket impababada ni Jeremias babaen cadagiti tali. Ket iti pagbaludan a nauneg awan idi ti danum no di laeng lutlut; ket ni Jeremias nailumlum iti lutlut.

⁷ Ket ni Ebed-melec nga Etiope, nga eunuco, nga adda idi iti balay ti ari, nangngegna nga incabildan ni Jeremias iti nauneg a pagbaludan (ti ari adda a situtugaw idi iti ruangan ni Benjamin.)

⁸ Ni Ebed-melec rimmuar iti balay ti ari, ket nagsao iti ari, a kinunana,

⁹ Apoc nga ari, dagitoy a lallaki inaramidda a sidadangkes dagiti amin nga inaramidda ken Jeremias a mammadto, isu nga impisucda iti nauneg a pagbaludan; ket isu matayto ngata iti disso a yanna, gapu iti bisin; ta awanen ti tinapay iti ili.

¹⁰ Idin ti ari, binilinna ni Ebed-melec nga Etiope, a kinunana, Manggicuyogca manipud ditoy iti tallopulo a lallaki, ket aonenyo ni Jeremias a mammadto iti nauneg a pagbaludan, casacbayan ti ipapatayna.

¹¹ Iti casta ni Ebed-melec incuyogna dagiti lallaki, ket napan iti balay ti ari iti siroc ti paggamengan, ket nangala sadiay cadagiti rigrigis ken narutrut a pagananay, ket isuda impababana babaen cadagiti taltali ken Jeremias iti nauneg a pagbaludan.

¹² Ket ni Ebed-melec nga Etiope kinunana ken Jeremias, Icabilmo coma dagitoy a rigrigis ken narutrut a pagan-anay cadagiti kilikilim iti licud dagiti tali. Ket ni Jeremias inaramidna a casta.

¹³ Iti casta inalut-utda ni Jeremias babaen cadagiti taltali, ket isu inaonda iti nauneg a pagbaludan: ket ni Jeremias nagtaeng iti paraangan ti guardia.

¹⁴ Idin ni Sedekias nga ari nagbaon, ket pinaalana ni Jeremias a mammadto agingga iti maicatlo a sercan nga adda iti balay ni Jehova: ket ti ari kinunana ken Jeremias, Cayatco a saludsuden kenca iti maysa a banag; dica ilemmeng iti aniaman caniac.

¹⁵ Iti casta kinuna ni Jeremias ken Sedekias, No ipalawagco kenca, saan aya a pudno a papatayennacto? ket no itdec kenca ti pammalacad, dinacto ipangag.

¹⁶ Iti casta ni Sedekias nga ari nagsapata a sililimed ken Jeremias a kinunana, Cas sibibiag ni Jehova, isu a nangaramid cadagiti cararuatayo, saancanto a papatayen, ket dicanto met yawat iti ima dagitoy a lallaki nga agsapul iti biagmo.

¹⁷ Idin kinuna ni Jeremias ken Sedekias, Castoy ti cuna ni Jehova, a Dios dagiti buybuyot, a Dios ti Israel: No sica mapanca cadagiti piprincipe ti ari ti Babilonia, iti casta agbiagto ta cararuam, ket daytoy nga ili dinto mapuuran iti apuy; ket sica agbiagcanto ken ti balaymo.

¹⁸ Ngem no dica mapan cadagiti piprincipe ti ari ti Babilonia, iti casta daytoy nga ili mayawatto iti ima dagiti Caldeos, ket isu puurandanto iti apuy, ket dicanto macalisi iti imada.

¹⁹ Ket ni Sedekias nga ari kinunana ken Jeremias, Siac cabutengco dagiti Judios a nagtinnag cadagiti Caldeos, di la ket ta yawatdac iti imada, ket isuda lalaisendac.

²⁰ Ngem ni Jeremias kinunana, Didacanto yawat, Dawatec kenca, agtulnogca iti timec ni Jehova, daytoy nga isaoc kenca: tapno naimbag kenca, ket ta cararuam agbiagto.

²¹ Ngem no madica a rumuar, daytoy ti sao a ni Jehova impakitana caniac:

²² Adtoy, dagiti amin a babbai a matdada iti balay ti ari ti Juda maiparuardanto cadagiti piprincipe ti ari ti Babilonia, ket dagidiay a babbai cunadanto, Dagiti caingongot a pagayammo, inuyutandaca, ket inatiwdaca: idinto ta dagiti sacsacam mailumlumda iti lutlut, timmallicudda.

²³ Ket iruardanto dagiti amin nga assawam ken dagiti annacmo cadagiti Caldeos; ket sica dicanto macaliclic iti imada, no di ket maalacanto babaen ti ima ti ari ti Babilonia: ket sicanto ti gapu ti pannacapuur daytoy nga ili iti apuy.

²⁴ Idin kinuna ni Sedekias ken Jeremias, Awan coma ti macaammo maipapan cadagitoy a sasao, ket dicanto mapatay.

²⁵ Ngem no dagiti piprincipe mangngegda a nakisaoac kenca, ket umayda, ket cunada kenca, Ipalawagmo cadacami no ania ti imbagam iti ari; isu dica ilimed cadacami, ket dacami didacanto papatayen; casta met no ania ti kinuna ti ari kenca:

²⁶ Iti casta cunamto cadacuada, Insaclangco ti dawatco iti ari nga isu saannac coma a pasublien iti balay ni Jonatan tapno matay sadiay.

²⁷ Idin immay dagiti amin a piprincipe ken Jeremias, ket nagsaludsudda kencuana; ket isu imbagana cadacuada ti mayalubog cadagitoy amin a sasao nga imbilin ti ari. Iti casta dida nagsaon kencuana; ta ti panggep saan a nadlawan.

²⁸ Iti casta ni Jeremias nagtaeng iti paraangan ti guardia agingga iti aldaw a pannacaala ti Jerusalem.