Jeremias 37 - Ti Biblia (1973)

Ni Baruc insuratna manen ti sao ti Dios. Ti sao nga immay ken Jeremias; isu mabalud, ngem ni ari Sedekias sumarungcar kencuana.

¹ Ket ni Sedekias nga annac ni Josias nagturay nga ari, iti saad ni Conias nga anac ni Joakim, isu a ni Nabucodonosor nga ari ti Babilonia insaadna nga ari ti Juda.

² Ngem isu, wenno dagiti adipenna, wenno dagiti tattao ti daga, dida impangag dagiti sasao ni Jehova, nga insaona babaen ni Jeremias a mammadto.

³ Ket ni Sedekias nga ari imbaonna da Jucal nga anac ni Selemias, ken ni Sefanias nga anac ni Maasias a padi, ken Jeremias a mammadto, a kinunana, Icararagannacami ita ken Jehova a Diostayo.

⁴ Iti daydi ni Jeremias simrec ken rimmuar iti nagtengngaan dagiti tattao; ta isu dida pay imbalud.

⁵ Ket ti buyot ni Faraon rimmuaren sadi Egipto; ket dagiti Caldeos a nanglacub iti Jerusalem idi nangngegda ti damag a maipapan cadacuada, pinanawanda ti Jerusalem.

⁶ Idin dimteng ti sao ni Jehova ken Jeremias a mammadto, a kinunana,

⁷ Castoy ti cuna ni Jehova, a Dios ti Israel, Castoy ti cunayo iti ari ti Juda, a nangibaon cadacayo tapno umumancayo caniac: Adtoy, ti buyot ni Faraon, isu a rumuaren a tumulong cadacayo, agsublinto sadi Egipto iti dagada met laeng.

⁸ Ket dagiti Caldeos umaydanto manen gumubat a maibusor itoy nga ili; ket isu alaendanto, ket puurandanto iti apuy.

⁹ Castoy ti cuna ni Jehova, Dicayo allilawen dagiti bagbagiyo, a cunayo, Dagiti Caldeos pudno a pumanawdanto cadatayo; ta didanto pumanaw.

¹⁰ Ta nupay no kinabilyo coma ti isu-amin a buyot dagiti Caldeos a gumubat a maibusor cadacayo; ket awan ti nabati no di laeng dagiti lallaki a nasugat cadacuada, nupay casta bumangonda coma tunggal lalaki iti toldana, ket puuranda daytoy nga ili iti apuy.

¹¹ Ket naaramid nga idi ti buyot dagiti Caldeos pinanawanna ti Jerusalem maipuon iti buteng iti buyot ni Faraon.

¹² Rimmuar ni Jeremias iti Jerusalem a mapan iti daga ti Benjamin, tapno alaenna ti bingayna sadiay iti nagtengngaan dagiti tattao.

¹³ Ket idi nga isu adda iti ruangan ti Benjamin, maysa a capitan ti guardia adda sadiay, a ti naganna Irias, nga anac ni Selemias, nga anac ni Hananias; ket isu tinengngelna ni Jeremias a mammadto, a kinunana, Matinnagca cadagiti Caldeos.

¹⁴ Idin kinuna ni Jeremias, saan a pudno; diac matinnag cadagiti Caldeos. Ngem isu saanna nga impangag; iti casta ni Irias tinengngelna ni Jeremias, ket isu insangpetna cadagiti piprincipe,

¹⁵ Ket dagiti piprincipe nagpungtotda ken Jeremias, ket isu kinabilda ken imbaludda iti balay ni Jonatan nga escriba; ta dayta ti inaramidda a pagbaludan.

¹⁶ Idi a ni Jeremias dimtengen iti balay a pagbaludan, ken cadagiti silsiled, ket ni Jeremias nagbati sadiay iti adu nga aldaw.

¹⁷ Ni Sedekias nga ari nagbaon, ket pinaalana: ket ti ari nagintuud kencuana a sililimed idiay balayna, ket kinunana, Adda aniaman a sao a naggapu ken Jehova? ket ni Jeremias kinunana, Adda. Ket innayonna pay, Mayawatcanto iti ima ti ari ti Babilonia.

¹⁸ Castamet ni Jeremias kinunana ken ari Sedekias, Ania ti nacabasolac a maibusor kenca, wenno maibusor cadagiti adipenmo, wenno maibusor itoy nga ili; tapno impisucdac iti pagbaludan?

¹⁹ Sadino ti yan dagiti mammadtoyo a nagpadtoda cadacayo, a kinunada, Ti ari ti Babilonia dinto umay a maibusor cadacayo, wenno maibusor itoy a daga?

²⁰ Ket denggem ita, dawatec kenca, O apoc nga ari: ipalubosmo, dawatec kenca, a ti dawatco maisaclang kenca, tapno dinac pasublien iti balay ni Jonatan nga escriba, di la ket ta matayac sadiay.

²¹ Idin ni Sedekias nga ari nagbilin, ket impanda ni Jeremias iti paraangan ti guardia; ket intedda kencuana iti inaldaw ti sangabukel a tinapay nga aggapu iti calsada dagiti agtintinapay agingga iti naibus ti isu-amin a tinapay iti ili. Iti casta ni Jeremias nabati iti paraangan ti guardia.