Jeremias 33 - Ti Biblia (1973)

Ti pannacaisubli a naggapu iti pannacacayaw maicari. Ti talna ken rag-o maisubli idiay Jerusalem. Ti nalinteg a sanga ken ti nalagda a tulag.

¹ Castamet ti sao ni Jehova dimteng ken Jeremias iti maicadua a daras idi sipupupoc pay laeng iti paraangan ti guardia, a kinunana,

² Castoy ti cuna ni Jehova a mangaramid itoy, ni Jehova a mangbukel ken mangipasdec kencuana; Jehova ti naganna:

³ Awagannac ken sungbatancanto, ket ipakitacto kenca dagiti dadackel a banbanag, ken naricut, isuda a saanmo nga ammo.

⁴ Ta castoy ti cuna ni Jehova, a Dios ti Israel, a maipanggep cadagiti balbalay ditoy nga ili, ken maipanggep cadagiti balbalay dagiti ar-ari ti Juda isuda a narugpo a maaramid a pagsalingdan a maibusor cadagiti paggabur ken maibusor iti campilan;

⁵ Bayat ti iyaay dagiti lallaki a makigubat cadagiti Caldeos, tapno punnuenda dagidiay cadagiti bangcay dagiti tattao, a pinapatayco iti ungetco ken iti pungtotco, ken gapu iti amin a kinadakesda inlingedco ti rupac itoy nga ili:

⁶ Adtoy, iyegconto kencuana ti salun-at ken pannacaagas, ket agasacto ida; ket iparangarangconto cadacuada ti aglapusanan a talnan ken kinapudno.

⁷ Ket pagbaliwecto ti pannacacayaw ti Juda ken pannacacayaw ti Israel, ket ibangonconto ida a cas idi damo.

⁸ Ket dalusacto ida cadagiti amin a kinadakesda a nagbasolanda caniac, ket pacawanecto amin dagiti kinadakesda a nagbasolanda, ken naglabsinganda a maicaniwas caniac.

⁹ Ket agpaayto caniac, daytoy nga ili iti nagan ti rag-o, iti panagdayaw ken iti dayag, iti sangoanan dagiti amin a nasnacion ditoy daga a dumngegto cadagiti amin a naimbag nga aramidec, cadacuada, ket agbutengdanto ken agpigergerdanto cadagiti amin a naimbag ken dagiti amin a talna nga paaddaec kencuana.

¹⁰ Castoy ti cuna ni Jehova: Mangngeganto manen ditoy a disso a pagcunaanyo, nga isu langalang, awan ti tao ken awan ti animal, cadagiti met laeng il-ili ti Juda, ken cadagiti lansangan nga awan ti tao idiay Jerusalem, isuda a langalang, ken awan ti agned ken awan ti animal.

¹¹ Ti timec ti rag-o ken ti timec ti ragsac, ti timec ti novio ken ti timec ti novia, ti timec dagiti agcuna, Agyamancayo ken Jehova dagiti buybuyot, ta ni Jehova naimbag, ti kinamanangngaasina agnanayon; castamet dagiti mangyeg cadagiti daton iti panagyaman idiay balay ni Jehova. Ta pagbaliwecto ti pannacacayaw ti daga ket agsubli a cas idi damo, cuna ni Jeho.

¹² Castoy ti cuna ni Jehova dagiti buybuyot: Addanto manen ditoy a disso, a langalang nga awan ti tao ken awan ti animal, ken cadagiti amin nga il-ilina, dagiti pagnaedan dagiti paspastor a pagiddaendanto dagiti pangenda.

¹³ Cadagiti il-ili ti caturodan ken cadagiti il-ili ti nababa a daga ken cadagiti il-ili ti Abagatan ken iti daga ti Benjamin, ken cadagiti arubayan ti Jerusalem, ken cadagiti il-ili ti Juda, dagiti pangen lumabasdanto manen babaen iti ima ti mangbilang cadacuada, cuna ni Jehova.

¹⁴ Adtoy, dagiti al-aldaw dumtengda, cuna ni Jehova, a tungpalecto ti nasayaat a sao nga imbalicasco a maipanggep iti balay ni Israel ken maipanggep iti balay ni Juda.

¹⁵ Cadagidiay nga aldaw, ken iti daydiay a pannawen, pataudecto ti maysa a Sanga ti kinalinteg ken David; ket isunto ti mangtungpal iti kinajusticia ken kinalinteg iti daga.

¹⁶ Cadagidiay nga al-aldaw ti Juda maisalacanto, ket ti Jerusalem agnaedto a sitatalged; ket castoy ti pangnaganto kencuana: Ni Jehova a kinalintegtayo.

¹⁷ Castoy ti cuna ni Jehova: Uray caanoman saanto nga agcurang ken David ti tao nga agtugaw iti trono ti balay ni Israel;

¹⁸ Uray met cadagiti papadi a Levitas saandanto a macurangan ti tao iti sangoanac a mangidatag cadagiti datdaton a mapuuran, ken mangpuur cadagiti datdaton a macan, ken agaramid a cancanayon cadagiti sacrificios.

¹⁹ Ket ti sao ni Jehova dimteng ken Jeremias, a kinunana,

²⁰ Castoy ti cuna ni Jehova: No mabalinyo a dadaelen ti tulagco iti aldaw, ken ti tulagco iti rabii, tapno awanton ti aldaw ken rabii cadagiti pannawenda;

²¹ Iti casta madadaelto met ti tulagco ken David nga adipenco, tapno awanto ti anacna nga agturay iti tronona, ken agraman cadagiti Levitas dagiti papadi, a ministrosco.

²² Cas iti buyot idiay langit a saan a mabilang, casta met ti darat ti baybay a di masucat; castanto ti panangpaaduc iti capuonan ni David nga adipenco, ken cadagiti Levitas nga agannong caniac.

²³ Ket ti sao ni Jehova dimteng ken Jeremias, a kinunana,

²⁴ Dica inutob aya ti saoen daytoy nga umili, a kinunana, Dagiti dua a familia a pinili ni Jehova, imbellengna ida? castoy ti pananguyawda iti ilic, tapno saandanton coma a nacion iti sangoda.

²⁵ Castoy ti cuna ni Jehova: No saan nga agtalinaed ti tulagco a maipapan itialdaw ken rabii, ken no saanco a tinudingan dagiti anannuroten idiay langit ken ditoy daga;

²⁶ Iti casta ibellengconto metten ti capuonan ni Jacob, ken ni David nga adipenco, tapno saanco nga alaenen ti capuonanna nga agturay iti capuonan da Abraham, Isaac ken Jacob ta pagbaliwecto ti pannacacayawda ken mangaasiacto cadacuada.