Jeremias 31 - Ti Biblia (1973)

Ti pannacaibsuli ti Israel. Ni Raquel mamaliwliwa. Iti casacbayan nga irarang-ay ti Israel. Ti baro ken nalagda a tulag.

¹ Iti dayta met laeng a pannawen, cuna ni Jehova, siacto ti Dios dagiti amin a familia ti Israel, ket isudanto ti ilic.

² Castoy ti cuna ni Jehova, Dagiti umili a natidda ti campilan nacasaracda iti parabur idiay let-ang; ti met laeng Israel, idi napanac tapno isu paginanaec.

³ Ni Jehova nagparang caniac iti nabayagen a pannawen, a kinunana, Wen, siac nagayatac kenca iti agnanayon a panagayat: gapuna a babaen ti kinamanangngaasi inyasidegca.

⁴ Siac bangonencanto manen, ket maibangoncanto, O virgen ti Israel: sica maarcosancanto manen cadagiti pandereta, ket mapancanto makisalsala cadagidiay nga agragragsac.

⁵ Agmulacanto manen cadagiti cauvasan cadagiti banbantay idiay Samaria: dagiti agmulmula agimuladanto, ket lacamendanto ti bungana.

⁶ Ta addanto aldaw, a dagiti tattao nga agbanbantay iti rabaw dagiti turturod ti Efraim agpuccawdanto, Bumangoncayo, ket intayo sumang-at idiay Sion ken Jehova a Diostayo.

⁷ Ta castoy ti cuna ni Jehova; Agcantacayo a siraragsac a maipaay ken Jacob, ket agdir-icayo a maipaay iti cangronaan cadagiti nasnacion: agibunannagcayo, agdaydayawcayo, ket cunayo, O Jehova, ispalem ti ilim, ti matda iti Israel.

⁸ Adtoy, siac iyegconto ida manipud iti daga iti amianan, ket urnongecto ida manipud cadagiti caadayuan a paspaset ti daga, ket maicuyog cadacuada ti bulsec ken ti pilay, ti babai a masicug ken castamet daydiay nga agpasical nga agipasngay: agsublidanto ditoy a dackel a bunggoy.

⁹ Isuda umaydanto nga agsangsangit, ket babaen ti panagpacaasi siac idalanconto ida: papagnaecto ida iti sibay dagiti carcarayan ti danum, iti nalinteg a dalan a didanto pacaitibcolan: ta siac ti ama ti Israel, ket ni Efraim ti inauna nga anacco.

¹⁰ Denggenyo ti sao ni Jehova, O dacayo a nasnacion, ket ipalawagyo cadagiti adayu a purpuro; ket cunayo, Ti nangiwaras iti Israel urnongennanto, ket aywanannanto a cas ti pastor cadagiti arbanna.

¹¹ Ta ni Jehova sinubbotna ni Jacob, ket isu inispalna iti ima daydiay a napigpigsa ngem isu.

¹² Ket umaydanto agcanta idiay tapaw ti Sion, ket agpunipondanto iti kinaimbag ni Jehova, iti trigo, ken iti baro nga arac, ken iti lana, ken cadagiti urbon dagiti pangen ken arban: ket ti cararuada caslanto maysa a minuyungan a madandanuman; ket saandanton nga agleddaang a pulos.

¹³ Iti casta ti balasang agragsacto iti panagsala, ken dagiti agtutubo a lalaki ken dagiti lallacay nga aggigiddan: ta pagbalinecto ti leddaangda a rag-o, ket liwliwaecto ida, ket manipud iti leddaangda pagragsakecto ida.

¹⁴ Ket pennekecto ti cararua dagiti papadi iti kinataba, ket ti ilic mapnecto iti kinaimbagco, cuna ni Jehova.

¹⁵ Castoy ti cuna ni Jehova: Mangngegan ti timec sadi Rama, ununnoy, ken napait a panagsangsangit, ni Raquel sangitanna dagiti annacna; ket madi a maliwliwa maipuon cadagiti annacna, agsipud ta awandan.

¹⁶ Castoy ti cuna ni Jehova: Medmedam dayta timecmo iti panagsangit, ken dagita matam cadagiti luluam; ta dayta aramidmo magungunaanto, cuna ni Jehova, ket umaydanto manen manipud iti daga ti cabusor.

¹⁷ Ket adda inanama a maipaay iti masangoanam, cuna ni Jehova, ket dagiti annacmo umaydanto mannen iti beddengda met laeng.

¹⁸ Kinapudnona a nangngegac ni Efraim nga umas-asug a castoy, Sica dinusanac, ket nadusaac a cas iti urbon ti vaca a saan a nairuam iti sangol: pasubliennac, ket mapasubliacto; ta sica ni Jehova a Diosco.

¹⁹ Kinapudnona calpasan ti pannacabawingco, nagbabawiac; ket calpasan ti pannacaisuroc, dinanogco, toy luppoc: nagbainac, wen, mariroac met laeng, ta sinagabac ti pannacaumsi ti kinaagtutuboc.

²⁰ Ni Efraim aya ti ay-ayatec nga anacco? isu aya ti dong-dongngoen nga anac? ta no maminano nga agsaoac iti maibusor kencuana, sipapasnecac pay laeng a manglagip kencuana: gapuna a ti pusoc mailiw kencuana; kinapudnona addanto caasic kencuana, cuna ni Jehova.

²¹ Mangipatacderca cadagiti pagtandaanam mangaramidca cadagiti teddec a mangiturong kenca; iturongmo ta pusom iti calsada, ti met laeng dalan a napanam: agsublica manen, O virgen ti Israel, agsublica manen cadagitoy nga il-ilim.

²² Casano ti cabayagmo nga agal-laal-la, O sica managlicud nga anac a babai? ta ni Jehova pinarsuana ti baro a banag ditoy daga: Ti babai lawlawennanto ti lalaki.

²³ Castoy ti cuna ni Jehova dagiti buybuyot, a Dios ti Israel: Aramatendanto manen daytoy a sao idiay daga ti Juda ken cadagiti il-ilina, intono pagbaliwec ti pannacacayawda; ni Jehova bendicionannaca, O pagnaedan ti kinalinteg, O bantay ti kinasanto.

²⁴ Ket ti Juda ken castamet amin nga il-ilina agnaeddanto sadiay, dagiti mannalon ken dagidiay cumuyog cadagiti arban.

²⁵ Ta pinenneccon ti nautoyan a cararua, ket ti tunggal naladingit a cararua pinunnoc manen.

²⁶ Ket iti daytoy nagriingac, ket kimmitaac; ket ti turogco nasamit caniac.

²⁷ Adtoy, dagiti al-aldaw dumtengda, cuna ni Jehova, a siac imulacto ti balay ni Israel ken ti balay ni Juda agraman capuonan ti tao ken agraman capuonan ti animal.

²⁸ Ket maaramidto a cas iti panangaywanco idi, a mangparut ken mangrugpo, ken mangrebba, ken mangdadael, ken mangpasagaba cadacuada; castanto ti panangaywanco a mangibangon, ken agmula cadacuada, cuna ni Jehova.

²⁹ Cadagidiay nga al-aldaw didanto saoenen, Dagiti amma kinnanda dagiti naalsem nga uvas, ket dagiti ngipen dagiti ubbing maalinoda.

³⁰ Ngem tunggal maysa matayto gapu iti bucodna a kinadakes: tunggal tao a mangan cadagiti naalsem nga uvas, dagiti ngipenna met laeng maalinodanto.

³¹ Adtoy, dagiti al-aldaw dumtengda, cuna ni Jehova, a mangaramidacto iti maysa a baro a tulag iti balay ni Israel, ken iti balay ni Juda:

³² Saan a cas idi tulag nga inaramidco cadagiti ammada, idi aldaw a panangibinco tapno aonec ida iti daga nga Egipto; daydi a tulagco dinadaelda, nupay siac idi ti asawa a lalaki cadacuada, cuna ni Jehova.

³³ Ngem daytoy ti tulag nga aramidecto iti balay ti Israel iti calpasan dagidiay nga aldaw, cuna ni Jehova; Isaadconto ti lintegco iti unegda, ken isuratconto iti pusoda; ket siacto ti Diosda, ket isudanto ti ilic.

³⁴ Ket saandanto a mangisuro tunggal tao iti caarrubana, ken tunggal tao iti cabsatna, a cunana, Ammoem ni Jehova; ta isuda amin am-ammodacto, manipud iti cababassitan agingga iti cadadackelan cadacuada, cuna ni Jehova: ta pacawanecto ti kinadakesda, ket saanconto a lagipenen ti basolda.

³⁵ Castoy ti cuna ni Jehova, a mangted ti init a maipaay a lawag iti aldaw, ken dagiti alagaden ti bulan ken dagiti bitbitwen a maipaay a lawag iti rabii, isu a mangtignay iti baybay tapno dagiti dalluyonna agungorda; ni Jehova dagiti buybuyot ti naganna:

³⁶ No dagitoy nga alagaden suminada iti masangoanac, cuna ni Jehova, iti casta ti capuonan ti Israel aggibusto met ti casasaadna a nacion iti saclangco iti agnanayon.

³⁷ Castoy ti cuna ni Jehova: No ti langit iti ngato mabalin a rucoden, ken dagiti nacaibangonan ti daga mabalin a sukimaten iti baba, iti casta ibellengconto met amin a capuonan ti Israel, gapu iti amin nga inaramiddan, cuna ni Jehova.

³⁸ Adtoy, dagiti al-aldaw dumtengda, cuna ni Jehova, a ti ili maibangonto ken Jehova manipud iti torre ni Hananeel agingga iti ruangan ti suli.

³⁹ Ket ti tali a pagrucod mapanto pay laeng a sililinteg agingga iti turod a Gareb, ket agsicconto iti Goa.

⁴⁰ Ket ti amin a lobong dagiti bangcay, ken dagiti dapdapo, ken amin a taltalon agingga iti waig a Cedron, agingga ti suli ti ruangan ti cabayo nga agpadaya, nasantoanto ken Jehova; isu saanto a maparut, ket saanto met a marugpo iti agnanayon.