Jeremias 30 - Ti Biblia (1973)

Ti pannacaispalda iti pannacacayaw maicari cadacuada.

¹ Ti sao a dimteng ken Jeremias a naggapu ken Jehova, kinunana,

² Castoy ti sao ni Jehova, a Dios ti Israel, kinunana, Isuratmo dagiti amin a sasao nga insaoc kenca iti maysa a libro.

³ Ta, adtoy, dagiti al-aldaw dumtengda, cuna ni Jehova, a siac pagbaliwecto ti pannacacayaw ti ilic nga Israel ken Juda, cuna ni Jehova, ket pasubliecto ida iti daga nga intedco cadagidi ammada, ket tagicuaendanto.

⁴ Ket dagitoy dagiti sasao nga sinao ni Jehova a maipapan iti Israel ken maipanggep iti Juda.

⁵ Ta castoy ti cuna ni Jehova: Nangngegmi ti timec ti panagpigerger, ti panagbuteng, ket awan ti cappia.

⁶ Saludsodenyo ita, ket kitaenyo no ti maysa a lalaki agpasical iti panaganac: apay a makitac ti tunggal lalaki nga adda dagiti imana cadagiti lomona, a cas iti babai nga agpaspasical, ket dagiti amin a rupa bumsagda?

⁷ Ay! ta daydiay nga aldaw naindaclan, iti casta nga awan ti capadpadana: isu met laeng ti pannawen ti panagrigat ni Jacob; ngem isu maisalacanto kencuana.

⁸ Ket maaramidto iti daydiay nga aldaw, cuna ni Jehova dagiti buybuyot, a tuccolecto ti sangolna nga iccaten ita tengngedmo, ken gessatecto dagiti parautmo; ket dagiti sangsangaili saandanto nga aramidenen a bag-enda ti ilic;

⁹ Ngem isuda agservidanto ken Jehova a Diosda, ken ni David nga arida, nga ibangonconto cadacuada.

¹⁰ Gapuna a saanca nga agbuteng, O adipenco a Jacob, cuna ni Jehova; dica met agcullayaw, O Israel: ta, adtoy, isalacancanto manipud iti adayu, ken dagiti capuonam manipud iti daga ti pannacacayawda; ket ni Jacob agsublinto, ket aginananto ken agtalnanto, ket awanto ti mangpabuteng kencuana.

¹¹ Ta siac addaac kenca, cuna ni Jehova, tapno isalacanca: ta uray no aramidec ti naananay a panungpalan dagiti amin a nacion isuda a nangiwarawaraac kenca, nupay casta saanconto nga aramiden ti naananay a panungpalam; ngem babalawencanto a cas maiparbeng, ket uray casano saancanto a baybay-an a saan a madusa.

¹² Ta castoy ti cuna ni Jehova, Ti dunormo saan a maagasan, ket ti sugatmo nasaem.

¹³ Awan ti siasinoman a mangsalacnib iti panggepmo, tapno mabedbedca coma: sica awan kenca ti agas a macaagas.

¹⁴ Amin dagiti caayanayatmo linipatandacan; isuda saandaca a sapsapulenen; ta siac sinugatca iti pangsugat ti cabusor, babaen ti panangdusa ti naranggas a tao, gapu iti kinaruay ti kinadangkesmo, ta dagiti basbasolmo immadudan.

¹⁵ Apay nga agsangitca gapu iti dunormo? ti ut-utmo saan a maagasan: gapu iti kinaruay ti kinadangkesmo: ta dagiti basbasolmo immadudan, siac inaramidco dagitoy a banbanag kenca.

¹⁶ Gapuna nga amin dagidiay mangalun-un kenca, maalun-undanto; ket amin dagiti sumuppiat kenca, tunggal maysa cadacuada mapandanto iti pannacacayaw; ket dagidiay mangdadaelto kenca, madadaeldanto, ket amin a mangsamsamto kenca ipaayconto ida iti pannacasamsam.

¹⁷ Ta siac pasalun-atencanto, ket siac agasacto dagiti sugatmo, cuna ni Jehova; ta ninaganandaca a naibelleng a kinunada, Daytoy isu ti Sion, nga awan ti tao a mangayat kencuana.

¹⁸ Castoy ti cuna ni Jehova; Adtoy, pagbaliwecto ti pannacacayaw dagiti toltolda ni Jacob, ket addanto caasic cadagiti pagnaedanna; ket ti ili maibangonto iti rabaw ti turodna met laeng, ket ti palacio manaedanto a cas iti cadawyanna met laeng.

¹⁹ Ket tumaudto cadacuada ti panagyaman ken ti timec dagidiay nga agragsac: ket paaduecto ida, ket saandanto a bumassit, siac met patan-okecto ida, ket saandanto a nanomo.

²⁰ Dagiti annacda met casdanto idi napalabas a pannawen, ket ti gimongda mapatibkerto iti sangoanac; ket dusaecto amin a mangirurumen cadacuada.

²¹ Ket ti principeda agtaudto met laeng cadacuada, ket ti agturayda rumuarto iti tengngada; ket isu paasidegecto, ket isu umasidegto caniac: ta siasino dayta nga addaan tured nga umasideg caniac? cuna ni Jehova.

²² Ket dacayto ti ilic, ket siacto ti Diosyo.

²³ Adtoy, ti bagio ni Jehova, a ti met laeng pungtotna, rimmuaren a cas sumagad a bagio: isu agdissonto iti olo ti managdacdakes.

²⁴ Ti narungsot a pungtot ni Jehova saanto nga agsubli, agingga iti maaramidna, ken agingga iti malpasna dagiti pinanggep ti pusona: cadagiti ud-udina nga aldaw maawatanyonto daytoy.