Jeremias 3 - Ti Biblia (1973)

Dagiti panaganus ni Jehova iti ili. Ti cababalin ti Juda dacdakes ngem ti Israel. Ti Israel mapagbabawi.

¹ Cuncunada, No ti maysa a lalaki pagtalawenna ni asawana, ket isu sumina kencuana, ket agbalin nga asawa ti sabali a lalaki, isu pasubliennanto aya manen kencuana? saan aya a dayta a daga matulawanto ti dackel? Ngem sica nagbalangcantisca iti adu a caayanayat; nupay casta agsublica manen caniac, cuna ni Jehova.

² Itangadmo dagita matam cadagiti nalucasan a panpantoc, ket kitaem; sadino ti saanmo a nakicaiddaan? Iti arpad dagiti daldalan nagururayca cadacuada, cas maysa a taga Arabia iti let-ang, ket tinulawam ti daga iti pannakicamalalam ken iti kinadangkesmo.

³ Gapuna a dagiti arbis naipaidamda, ket awan ti maud-udi a tudo; nupay casta adda idi kenca ti muging ti balangcantis, sica dica mabainan.

⁴ Manipud ita a pannawen saancanto aya nga umawag caniac, Amac, sica ti mangidalan iti kinaubingco?

⁵ Itaginayonnanto aya ti pungtotna iti awan inggana? isu idulinna aya agingga iti panungpalan? Adtoy, nagsaoca ken nagaramidca cadagiti dakes a banbanag, ket inaramidmo ti pagayatam.

⁶ Ni Jehova kinunana manen caniac cadagiti al-aldaw ni Josias nga ari, Nakitam dayta inaramid ti managlicud nga Israel? isu simmang-at iti rabaw ti tunggal nangato a bantay ken iti siroc ti tunggal narucbos a cayo, ket idiay nagbalangcantis.

⁷ Ket kinunac calpasan ti panangaramidna cadagitoy amin a banbanag, Isu agsublinto caniac; ngem isu saan a nagsubli: ket nakita ni nagulib a cabsatna a babai a Juda.

⁸ Ket siac nakitac, a gapu iti daytoy met laeng a panggep ni managlicud nga Israel nagaramid ti pannakicamalala, isu insinac, ket iniccac iti surat ti panagsina ti agasawa, nupay casta ni nagulib a Juda a cabsatna a babai saan a nagbuteng; no di ket napan met ket nagbalangcantis.

⁹ Ket naaramid gapu iti nalaca a pannakicamalalana, ti daga natulawan, ket isu nakicamalala cadagiti batbato ken cadagiti puon ti cayo.

¹⁰ Ket nupay casta gapu amin daytoy ni nagulib a cabsatna a babai a Juda saan a nagsubli caniac iti amin a pusona, no di ket naginsusubli, cuna ni Jehova.

¹¹ Ket ni Jehova kinunana caniac, Ni managlicud nga Israel nagparang a nalinlinteg ngem ni nagulib a Juda.

¹² Inca, ket iwarragawagmo dagitoy a sasao nga isangom iti amianan, ket cunam, Agsublica, sica managlicud nga Israel, cuna ni Jehova; saanacto a cumita a sipupungtot kenca; ta siac manangngaasiac, cuna ni Jehova, diacto ituloy ti pungtotco iti agnanayon.

¹³ Bigbigem laeng ti kinadakesmo, a simmalungasingca a maibusor ken Jehova a Diosmo, ken pinaadum dagiti daldalanmo cadagiti gangannaet iti siroc ti tunggal narucbos a cayo, ket dica tinungpal ti timecco, cuna ni Jehova.

¹⁴ Agsublicayo, O managlicud nga annac, cuna ni Jehova; ta siac ti asawayo a lalaki; ket mangalaac cadacayo ti maysa iti tunggal ili, dua iti tunggal familia, ket ipancayto idiay Sion.

¹⁵ Ket iccancayto cadagiti paspastor cas mainugot iti pusoc, isuda a mangtaraonto cadacayo iti pannacaammo ken pannacaawat.

¹⁶ Ket maaramidto, intono umaducayo ken manayonancayo iti daga, cadagita nga al-aldaw, cuna ni Apo Jehova, saandanton a cunaen, Ti lacasa ti tulag ni Jehova; ket dinto met mapanunot; ket isu didanto met malagip; ket isu didanto ricnaen ti caawanna; ket isu sannto metten a maaramid.

¹⁷ Iti dayta a pannawen managananto ti Jerusalem ti trono ni Jehova; ket amin dagiti nasnacion maurnongdanto kencuana iti nagan ni Jehova, iti Jerusalem: ket saandanto metten a magna iti mainugot ti kinabangad ti dakes a pusoda.

¹⁸ Cadagita nga al-aldaw ti balay ti Juda makicuyogto iti balay ti Israel, ket rumuardanto nga agcuyog iti daga ti amianan a mapan iti daga nga intedco a tawid cadagiti ammayo.

¹⁹ Ngem kinunac, Casano ti panangisaadco kenca iti nagtengngaan dagiti annac, ken iccanca ti maysa a macaay-ayo a daga, maysa a naimnas a tawid dagiti buybuyot dagiti nasnacion! ket kinunac, Dacayo awagandacto, Amac, ket saancayto a sumina iti isusurotyo caniac.

²⁰ Pudno a cas ti maysa nga asawa a babai sumina a sigugulib iti asawana, casta ti panagaramidyo a sigugulib caniac, O balay ti Israel, cuna ni Jehova.

²¹ Maysa a timec mangngegan iti rabaw dagiti nalucasan a panpantoc, ti sangsangit ken panagdawdawat dagiti annac ti Israel; agsipud ta pinakilloda ti dalanda, linipatanda ni Jehova a Diosda.

²² Agsublicayo, dacayo managlicud nga annac, agasacto ti kinamaglicudyo. Adtoy, umaycami kenca; ta sica ni Jehova a Diosmi.

²³ Pudno a kinaubbaw ti badang nga ururayentayo nga aggapu cadagiti turturod, ti daranudor cadagiti banbantay: pudno nga adda ken Jehova a Diostayo ti pacaisalacanan ti Israel.

²⁴ Ngem ti nacababain a banag, linamutna ti aramid dagidi ammatayo manipud iti kinaubingtayo, dagiti pangpangenda ken dagiti ar-arbanda, dagiti annacda a lallaki ken babbai.

²⁵ Agiddatayo coma iti baintayo, ket ti pannacariribuctayo abbongandatayo coma; ta nagbasoltayo a maicaniwas ken Jehova a Diostayo, datayo ken dagiti ammatayo, manipud iti kinaubingtayo agingga met laeng iti daytoy nga aldaw; ket saantayo a tinungpal ti timec ni Jehova a Diostayo.