Jeremias 29 - Ti Biblia (1973)

Ni Jeremias balacadanna dagiti nacayawan tapno agtalnada. Ti pannacaisublida iti calpasana iti pitopulo a tawen. Ti nacaay-ay-ay a casasaad ti matda sadi Judea. Ni Jeremias tubngarenna dagiti dadduma a naulbod a mammadto.

¹ Ket dagitoy dagiti sasao ti surat nga impaw-it ni Jeremias a mammadto manipud Jerusalem cadagiti natda cadagiti panglacayen ti pannacacayaw ken cadagiti papadi, ken cadagiti mammadto, ken cadagiti amin a tattao a nacayawan nga impan ni Nabucodonosor manipud Jerusalem agingga iti Babilonia.

² (Calpasan a ni Jeconias nga ari, ken ti reina nga ina, ken dagiti eunucos ken dagiti piprincipe ti Juda ken Jerusalem, ken dagiti nalaing a managar-aramid, ken dagiti mammanday, pimmanawda sadi Jerusalem),

³ Babaen ti ima ni Elasa, nga anac a lalaki ni Safan, ken Gemarias nga anac a lalaki ni Helcias, (isu nga imbaon ni Sedekias nga ari ti Juda sadi Babilonia ken ni Nabucodonosor nga ari ti Babilonia), a kinunana,

⁴ Castoy ti cuna ni Jehova dagiti buybuyot, a Dios ti Israel, cadagiti amin a nacayawan, isuda a pinaipanco a nacayawan, isuda a pinaipanco a nacayawan manipud Jerusalem agingga iti Babilonia:

⁵ Mamangoncayo cadagiti balbalay, ket agnaedcayo cadacuada, ket agmulacayo cadagiti minuyongan, ket canenyo dagiti bungbunga cadacuada.

⁶ Mangasawacayo, ket agputotcayo cadagiti annac a lallaki ken babbai, ken mangalacayo cadagiti assawa a maipaay cadagiti annacyo a lallaki; ken iccanyo dagiti annacyo a babbai cadagiti assawada, tapno agipasngayda coma cadagiti annac a lallaki ken babbai: ket umaducayo idiay, ket saancayo a bumassit.

⁷ Ket birukenyo ti talna ti ili a nagpaipanac cadacayo a nacayawan, ket agcararagcayo ken Jehova gapu kencuana: ta ti talnana maaddaancayonto iti talna.

⁸ Ta castoy ti cuna ni Jehova dagiti buybuyot, a Dios ti Israel: Saanyo nga ipalubos cadagiti mammadtoyo, nga adda cadagiti nagtengngaanyo, ken cadagiti mammoyonyo nga allilawendacayo, saanyo met nga imdengan dagiti tagtagainepyo a tinagtagainepyo met laeng.

⁹ Ta isuda agipadtoda a siuulbod cadacayo iti naganco: Diac imbaon ida, cuna ni Jehova.

¹⁰ Ta castoy ti cuna ni Jehova, Calpasan ti pannacaturpos iti pitopulo a tawen a maipaay iti Babilonia siac sarungcarancayto, ket tungpalecto ti nasayaat a saoc cadacayo, a panangipasublic cadacayo ditoy a disso.

¹¹ Ta ammoc dagiti panpanunot a panunotec a maipapan cadacayo, cuna ni Jehova, panpanunotda ti cappia, ket saan nga iti dakes, tapno mangted cadacayo ti inanama iti maududi a pagtungpalanyo.

¹² Ket umawagcayto caniac, ket rumuarcayto ket agcararagcayto caniac, ket ipangagcayonto.

¹³ Ket sapulendacto, ket masaracandac, intono birukendac iti amin a pusoyo.

¹⁴ Ket masaracandacto, cuna ni Jehova: ket pagbaliwecto iti pannacacayawyo, ket urnongencayto nga aggapu cadagiti amin a nacion, ken cadagiti amin a disso a nangipaturongac cadacayo, cuna ni Jehova; ket pagsubliencayto manen ditoy a disso a nangigapuac cadacayo a nacayawan.

¹⁵ Gaput ta kinunayo, Ni Jehova namangon cadatayo cadagiti mammadto ditoy Babilonia;

¹⁶ Castoy ti cuna ni Jehova a maipapan iti ari nga agtugaw iti trono ni David, ken maipapan cadagiti amin a tattao nga agnaed itoy nga ili, dagiti cacabsatyo a saanda a nakicuyog cadacayo iti pannacacayaw;

¹⁷ Castoy ti cuna ni Jehova dagiti buybuyot: Adtoy, ibaonconto cadacuada ti campilan, ti bisin, ken ti angol, ket pagbalinecto ida a cas cadagiti nalaad nga higos, a saan a mabalin a canen, ta dakesda unay.

¹⁸ Ket camatecto ida iti campilan, iti bisin, ket iti angol, ket iyawatconto ida a maipalladaw nga agal-laal-la cadagiti amin a pagarian ditoy daga, nga agbalinda a pagtabtabbaawan, ken pagsidsiddaawan, ken pagsansanamtican, ken pacaumsian, cadagiti amin a nacion a nangipaturongac cadacuada;

¹⁹ Gapu ta isuda dida impangag dagiti sasaoc, cuna ni Jehova, isuda a pinaidanunco cadacuada cadagiti adipenco a mammadto a bimmangonac a masapa ket imbaonco ida; ngem dicayo kinayat a dinengngeg, cuna ni Jehova.

²⁰ Denggenyo ngarud ti sao ni Jehova, dacayo amin a nacayawan, dacayo a pinaipanco manipud Jerusalem agingga iti Babilonia.

²¹ Castoy ti cuna ni Jehova dagiti buybuyot, a Dios ti Israel, a maipapan ken ni Acab nga anac a lalaki ni Colias, ken maipapan ken ni Sedekias nga anac a lalaki ni Maasias, isuda a mangipadles iti ulbod cadacayo iti naganco: Adtoy, iyawatconto ida iti ima ni Nabucodonosor nga ari ti Babilonia; ket papatayennanto ida iti sangoanan dagiti matayo;

²² Ket cadacuada maalanto ti maysa a lunod cadagiti amin a nacayawan ti Juda nga adda idiay Babilonia, a cunana, Ni Jehova aramidennacayonto a cas ken Sedekias ken cas ken Acab, nga ti ari ti Babilonia pinuuranna ida iti apuy;

²³ Ta isuda anacaaramidda iti kinamauyong iti Israel, ket nakicamalalada cadagiti babbai nga assawa dagiti caarrubada, ket nagsaoda cadagiti sasao nga ulbod iti naganco isu a saanco nga imbilin cadacuada; ket siac ti mannacaammo, ken mamanecnec, cuna ni Jehova.

²⁴ Ket maipapan ken Semaya a Nehelamita agsaocanto a cunaem,

²⁵ Castoy ti saoen ni Jehova dagiti buybuyot, a Dios ti Israel, a cunana, Gapu ta nangipaw-itca cadagiti sursurat iti naganmo met laeng cadagiti amin a tattao nga adda idiay Jerusalem, ken ni Sofonias nga anac a lalaki ni Maasias a padi, ken cadagiti amin a papadi a kinunam,

²⁶ Ni Jehova inaramidnaca a padi iti saad ni Joiada a padi tapno adda coma agtuturay iti balay ni Jehova, ta tunggal maysa a tao nga agmauyong ken pagbalinenna ti bagina met laeng a mammadto, dayta icabilmonto coma iti tul-ong, ken cadagiti paratengnged.

²⁷ Ita ngarud apay a saanyo a tinubngar ni Jeremias a taga Anatot, isu a pagbalinenna ti bagina met laeng a maysa a mammadto cadacayo?

²⁸ Ta isu ngarud nagbaon cadacami ditoy Babilonia, a kinunana, Ti pannacacayaw atiddagto: mangipatacdercayo cadagiti balbalay, ket agnaedcayo cadacuada; ket agmulacayo cadagiti minuyungan, ket canenyo ti bunga cadacuada.

²⁹ Ket ni Sofonias a padi binasana daytoy a surat cadagiti lapayag ni Jeremias a mammadto.

³⁰ Idin ti sao ni Jehova immay ken ni Jeremias a kinunana,

³¹ Agbaonca cadacuada amin a nacayawan, a cunam, Castoy ti cuna ni Jehova a maipanggep ken Semaya a Nehelamita: Gapu ta ni Semaya nagipadto cadacayo ket saanco nga imbaon, ket pinagtalecnacayo iti ulbod;

³² Gapuna castoy ti cuna ni Jehova, Adtoy, dusaecto ni Semaya a Nehelamita, ken ti putotna: isu awananto ti maysa a lalaki a makipagnaed iti nagtengngaan daytoy nga umili; awanto met ti makitana a naimbag nga aramidecto a maipaay iti ilic, cuna ni Jehova, ta isu insurona ti isusukir a maibusor ken Jehova.