Jeremias 27 - Ti Biblia (1973)

Maibilin cadagiti nasnacion ti panagpacumbabada ken Nabucodonosor.

¹ Idi damo ti panagturay ni Joakim nga anac a lalaki ni Josias, ari ti Juda, dimteng daytoy a sao ken Jeremias a naggapu ken Jehova, a kinunana,

² Castoy ti cuna ni Jehova caniac: Mangaramidca cadagiti singdan ken sangol, ket isaadmo dita teltelmo;

³ Ket ipaw-itmo ida iti ari ti Edom, ken iti ari ti Moab, ken iti ari dagiti annac ti Ammon, ken iti ari ti Tiro, ken iti ari ti Sidon, babaen ti ima dagiti babaonen nga umay iti Jerusalem ken Sedekias nga ari ti Juda:

⁴ Ket itedmo cadacuada ti maysa a paibaga cadagiti appoda, a cunana, Castoy ti cuna ni Jehova dagiti buybuyot, a Dios ti Israel, Castoy ti cunaenyonto cadagiti appoyo:

⁵ Inaramidco ti lubong, dagiti tattao ken dagiti an-animal nga adda iti rabaw ti daga, babaen ti dackel a pannacabalinco ken babaen ti siunnat a tackiagco; ket isu itedconto iti daydiay ipagarupco a maiparbeng.

⁶ Ket ita intedco amin dagitoy a dagdaga iti ima ni Nabucodonosor, nga ari ti Babilonia, nga adipenco; casta met dagiti an-animal ti tanap intedco kencuana nga agpaay kencuana.

⁷ Ket amin dagiti nasnacion agservidanto kencuana, ken iti anacna a lalaki, ken iti anac a lalaki ti anacna a lalaki, agingga iti pannawen ti bucod na a daga dumteng: ket calpasanna adu a nasnacion ken dadackel nga ar-ari isu aramidendanto a bag-enda.

⁸ Ket maaramidto a ti nacion ken ti pagarian a dinto agservi ken naisao a Nabucodonosor nga ari ti Babilonia, ken saanto a mangisaad iti tengngedda iti baba ti sangol ti ari ti Babilonia, dayta a nacion dusaecto, cuna ni Jehova, babaen ti campilan, iti bisin, ken iti angol, agingga iti maibusco ida babaen ti imana,

⁹ Ngem no maipapan cadacayo, dicayo ipangag dagiti mammadtoyo, wenno dagiti mammoyonyo wenno dagiti tagtagainepyo, wenno dagiti mammadlesyo wenno dagiti mangnganitoyo nga agsao cadacayo, nga agcuna, Saancayto nga agservi iti ari ti Babilonia:

¹⁰ Ta isuda agipadtoda iti ulbod cadacayo, tapno iyadayudacayo iti dagayo, ken tapno paruarencayo coma ket mapucawcayo.

¹¹ Ngem ti nacion a mangisaad iti tengngedna iti baba ti sangol ti ari ti Babilonia, ken agservi kencuana, dayta a nacion palubosacto nga agnaed iti bucodna a daga, cuna ni Jehova; ket isu talonendanto, ket agnaedda kencuana.

¹² Ket nagsaoac ken Sedekias nga ari ti Juda a mayalubog amin cadagitoy a sasao, a kinunac, Iyegyo dagiti tengngedyo iti baba ti sangol ti Babilonia, ket agservicayo kencuana ken iti ilina, ket agbiagcayo.

¹³ Apay a mataycayto, sica ken ti ilim, babaen ti campilan, iti bisin ken iti angol, cas sinao ni Jehova maipapan iti nacion a dinto agservi iti ari ti Babilonia?

¹⁴ Ket dicayo ipangag dagiti sao dagiti mammadto nga agsao cadacayo a cunada, Saancayo nga agservi iti ari ti Babilonia; ta isuda agipadtoda iti ulbod cadacayo.

¹⁵ Ta saanco ida nga imbaon, cuna ni Jehova, no di ket agipadtoda a siuulbod iti naganco; tapno pagtalawencayo ken tapno mapucawcayo, dacayo ken dagiti mammadto nga agipadto cadacayo.

¹⁶ Casta met a nagsaoac cadagiti papadi ken iti amin daytoy nga umili, a kinunac, Castoy ti cuna ni Jehova: Dicayo ipangag dagiti sasao dagiti mammadto nga agipadto cadacayo a cunada, Adtoy, dagiti al-alicamen ti balay ni Jehova iti mabiit maiyegto manen manipud Babilonia; ta isuda agipadtoda iti ulbod cadacayo.

¹⁷ Dicayo ipangag ida; agservicayo iti ari ti Babilonia ket agbiagcayo: ania ti gapuna a daytoy nga ili agbalin a langalang?

¹⁸ Ngem no isuda mammadtoda, ken no ti sao ni Jehova adda coma cadacuada, agaramidda coma ita iti panangibabaet ken Jehova dagiti buybuyot, tapno dagiti al-alicamen a nabati iti balay ni Jehova, ken iti balay ti ari ti Juda, ken idiay Jerusalem saanda coma a mapan idiay Babilonia.

¹⁹ Ta castoy ti cuna ni Jehova dagiti buybuyot a maipapan cadagiti monmon ken maipapan iti baybay, ken maipapan cadagiti batay, ken maipapan iti tidda cadagiti al-alicamen a nabati ditoy nga ili.

²⁰ A saan nga innala ni Nabucodonosor nga ari ti Babilonia, idi impanawna a nacayawan ni Jeconias nga anac a lalaki ni Joakim, nga ari ti Juda, manipud Jerusalem agingga iti Babilonia ken amin dagiti natatan-oc ti Juda ken Jerusalem;

²¹ Wen, castoy ti cuna ni Jehova dagiti buybuyot, a Dios ti Israel, a maipapan cadagiti al-alicamen a nabati iti balay ni Jehova, ken iti balay ti ari ti Juda, ken ti Jerusalem:

²² Maipandanto idiay Babilonia, ket agyanda idiay agingga iti aldaw a panangsarungcarco cadacuada, cuna ni Jehova; iti casta alaecto ida, ket isublic ida ditoy a disso.