Jeremias 26 - Ti Biblia (1973)

Dagiti il-ili ti Juda mapacaammoanda. Maysa a tulag a nalmeng ti panangpapatay ken Jeremias. Daydi nalmeng a tulag maabac.

¹ Iti pangrugianan ti panagturay ni Joakim nga anac a lalaki ni Josias, ari ti Juda, dimteng daytoy a sao a naggapu ken Jehova a kinunana,

² Castoy ti cuna ni Jehova: Agtacderca iti paraangan ti balay ni Jehova, ket agsaoca cadagiti amin nga il-ili ti Juda, nga umay nga agrucbab iti balay ni Jehova, amin dagiti sasao nga ibilinco kenca nga isaom cadacuada; dica kessayan ti maysa a sao.

³ Bareng no ipangagdanto, ket agsublida tunggal tao manipud iti dakes a dalanna; tapno ibabawic coma ti dakes a pinanggepco nga aramiden cadacuada gapu iti kinadakes ti aramidda.

⁴ Ket cunaemto cadacuada, Castoy ti cuna ni Jehova; No didacto ipangag, tapno magnacayo iti lintegco isu nga incabilco iti sangoananyo,

⁵ Tapno ipangagyo dagiti sasao dagiti adipenco a mammadto, isuda nga ibaonco cadacayo, a bimmangonac met laeng a masapa ken imbaonco ida, ngem saancayo a nangipangag;

⁶ Aramidecto ngarud daytoy a balay a cas iti Silo, ket aramidecto daytoy nga ili a lunod cadagiti amin a nacion ti daga.

⁷ Ket dagiti papadi ken dagiti mammadto ken amin nga umili nangngegda ni Jeremias a nagsasao cadagitoy a sasao iti balay ni Jehova.

⁸ Ket naaramid nga idi ni Jeremias natungpalna ti amin a panagsaona nga imbilin ni Jehova kencuana nga isao iti amin nga umili, a dagiti papadi ken dagiti mammadto ken amin ti umili isu tiniliwda a kinunada, Sica mataycanto a di-bumurong.

⁹ Apay a nangipadtoca iti nagan ni Jehova, a kinunam, Daytoy a balay caslanto iti Silo, ket daytoy nga ili langalangto, nga awan ti agnaed? ket amin nga umili naurnong ken Jeremias iti balay ni Jehova.

¹⁰ Ket idi dagiti piprincipe ti Juda nangngegda dagitoy a banbanag, simmang-atda manipud iti balay ti ari agingga iti balay ni Jehova; ket nagtugawda iti pagsercan ti baro a ruangan ti balay ni Jehova.

¹¹ Idin nagsao dagiti papadi ken dagiti mammadto cadagiti piprincipe ken iti amin nga umili, a kinunada, Daytoy a tao maicari iti patay; ta isu nagipadto iti maicaniwas ditoy nga ili, cas nangngegyo cadagiti lapayagyo.

¹² Idin nagsao ni Jeremias cadagiti amin a piprincipe ken iti amin nga umili a kinunana, Ni Jehova imbaonnac nga agipadto iti maicaniwas ditoy a balay ken maibusor ditoy nga ili cadagiti amin a sasao a nangngegyo.

¹³ Ita ngarud baliwanyo dagiti dalanyo ken dagiti aramidyo, ken agtulnogcayo iti timec ni Jehova a Diosyo; ket ni Jehova ibabawinanto ti dakes nga binalicasna a maibusor cadacayo.

¹⁴ Ngem no maipapan caniac, adtoy, addaac iti imayo: aramidenyo caniac ti cas nasayaat ken umiso cadagiti matayo.

¹⁵ Ammoenyo laeng nga awan duadua, a no patayendac, iyegyonto ti awan tulawna a dara cadacayo met laeng, ken iti daytoy nga ili, ken cadagiti agnaed kencuana; ta iti kinapudnona ni Jehova imbaonac cadacayo tapno isaoc dagitoy amin a sasao cadagiti lapayagyo.

¹⁶ Idin kinuna dagiti piprincipe ken amin nga umili cadagiti papadi ken cadagiti mammadto: daytoy a lalaki saan a maicari iti patay; ta isu nagsao cadatayo iti nagan ni Jehova a Diostayo.

¹⁷ Idin timmacder dagiti dadduma cadagiti panglacayen ti daga, ket nagsaoda iti amin a gimong ti umili, a kinunada,

¹⁸ NI Mikeas a Morastita nagipadto cadagiti aldaw ni Ezekias nga ari ti Juda; ket isu nagsao iti amin nga umili ti Juda, a kinunana, Castoy ti cuna ni Jehova dagiti buybuyot; Ti Zion maaradonto a cas maysa a talon, ket ti Jerusalem agbalinto a bonbontoon, ket ti bantay ti balay cas cadagiti nangato a disso ti cabakiran.

¹⁹ Isu pinatay aya ni Ezekias nga ari ti Juda ken amin ti Juda? saan aya a nagbuteng ken Jehova, ket nagdawat iti parabur ni Jehova, ket ni Jehova imbabawina ti dakes nga imbalicasna a maibusor cadacuada? No cas aramidentayo coma ti casta, dackel a pagdacsan a maicaniwas cadagiti cararuatayo met laeng.

²⁰ Ket adda met idi maysa a lalaki a nagipadto iti nagan ni Jehova, ni Urias nga anac a lalaki ni Semaias a taga Kiriat-jearim; ket isu nagitpadto a maibusor ditoy nga ili ken maicaniwas ditoy a daga cas mayalubog cadagiti amin a sasao ni Jeremias.

²¹ Ket idi ni Joakim nga ari, agraman cadagiti amin a nabileg a lallakina, ken amin dagiti piprincipe, nangngegda dagiti sasaona, ti ari pinanggepna ti panangpapatayna kencuana; ngem idi nangngeg ni Urias, nagbuteng, ket nagtalaw, ket napan idiay Egipto.

²² Ket ni Joakim nga ari nagbaon cadagiti lallaki idiay Egipto, nga isuda da Elnatan nga anac a lalaki ni Acbor, ken dadduma a lallaki a naicuyog kencuana, idiay Egipto;

²³ Ket innalada ni Urias manipud Egipto ken inyegda ken Joakim nga ari, isu a nangpapatay kencuana iti campilan, ket impurruacna ti bangcayna cadagiti tanem dagiti nanumo a tattao.

²⁴ Ngem ti ima ni Ahicam nga anac a lalaki ni Safan adda idi ken Jeremias, tapno isu saanda coma nga iyawat iti ima ti umili a mangpapatay kencuana.