Jeremias 25 - Ti Biblia (1973)

Ti pannacacayaw ti Juda, ken pannacarba ti Babilonia maipadto. Ti copa ti pungtot maiparang cadagiti amin a nacion. Ti dakes a maibusor cadagiti amin a nacion maipadto.

¹ Ti sao a dimteng ken Jeremias maipapan iti amin nga umili ti Juda, idi maicapat a tawen ni Joakim nga anac a lalaki ni Josias, ari ti Juda, (isu met laeng idi ti damo a tawen ni Nabucodonosor nga ari ti Babilonia.)

² Nga sinao ni Jeremias a mammadto iti amin nga umili ti Juda, ken cadagiti amin a agnaed ti Jerusalem, a kinunana:

³ Nanipud idi maicasangapulo ket tallo a tawen ni Josias nga anac ni Amon, ari ti Juda, agingga met laeng iti daytoy nga aldaw, dagitoy a duapulo ket tallo a tawen, ti sao ni Jehova dimteng caniac, ket insaoc cadacayo, a bimmangonac a masapa ket nagsaoac; ngem dicayo impangag.

⁴ Ket ni Jehova imbaonna cadacayo dagiti amin nga adipenna a mammadto, a bimmangon a masapa ket imbaonna ida, (ngem dicayo impangag, wenno inyallingag ti lapayagyo a dumngeg),

⁵ A kinunana, Agsublicayo ita tunggal maysa manipud iti dakes a dalanna, ken manipud iti kinadakes dagiti aramidyo, ket agnaedcayo iti daga nga inted ni Jehova cadacayo ken cadagiti ammayo, nanipud idi ugma agingga met laeng iti agnanayon;

⁶ Ket dicayo sumurot cadagiti sabali a diosen nga agservi cadacuada, ken agrucbab cadacuada, ket didac gargarien nga agpungtot babaen ti gapuanan dagiti im-imayo; ket diacto mangaramid cadacayo iti ranggas.

⁷ Nupay casta saandac nga impangag, cuna ni Jehova; tapno magargaridac nga agpungtot babaen ti gapuanan dagiti im-imayo iti bucodyo a pacaranggasan.

⁸ Gapuna a castoy ti cuna ni Jehova dagiti buybuyot: Agsipud ta dicayo dinengngeg dagiti sasaoc.

⁹ Adtoy, mangibaonacto ket alaec amin dagiti familia manipud iti amianan, cuna ni Jehova, castamet ken Nabucodonosor nga, ari ti Babilonia, nga adipenco, ket iyegconto ida a maibusor ditoy a daga ken maibusor, cadagiti agnaed kencuana, ken maibusor cadagiti amin a nacion iti aglicmut, ket pucawecto ida a maikisap ket aramidecto ida a pagsiddaawan, ken pagsanamtican, ken agnanayon a langalang.

¹⁰ Castamet iccatecto cadacuada ti timec ti rag-o ken ti timec ti ragsac, ti timec ti novio, ken ti timec ti novia, ti uni dagiti paggilingan, ken ti lawag ti pagsilawan.

¹¹ Ket amin daytoy a daga agbalinto a langalang, ken pagsiddaawan; ket dagitoy a nacion agservidanto iti ari ti Babilonia iti pitopulo a tawen.

¹² Ket mapasamacto intono matungpal ti pitopulo a tawen, a dusaecto ti ari ti Babilonia, ken dayta a nacion, cuna ni Jehova, gapu iti kinadakesda, ken ti daga dagiti Caldeos; ket isu pagbalinecto a langalang iti agnanayon.

¹³ Ket iyegconto iti dayta a daga amin dagiti sasaoc isuda a binalicasco a maibusor kencuana, wen, isu-amin met laeng a naisurat ditoy a libro, isu nga impadto ni Jeremias a maibusor cadagitoy amin a nacion.

¹⁴ Ta adu a nacion ken nabileg nga ar-ari aramidendanto ida, a tagabu, dagidiay met laeng, ket supapacacto ida cas mayannurot cadagiti aramidda, ken cas mainugot cadagiti gapuanan dagiti imada.

¹⁵ Ta castoy ti cunana caniac, ni Jehova, a Dios ti Israel, Alaem daytoy a copa ti arac ti pungtot iti imac, ket painumen amin dagiti nacion a pangibaonac kenca.

¹⁶ Ket isuda uminumdanto, ket agibaribarda, ket agmauyongda gapu iti campilan nga ibaonconto iti nagtengngaanda.

¹⁷ Idin innalac ti copa iti ima ni Jehova, ket pinainumco amin dagiti nacion, isuda a nangibaonan caniac ni Jehova;

¹⁸ Nga isuda, ti Jerusalem ken dagiti il-ili ti Juda, ken dagiti ar-arida, ken dagiti piprincipeda, tapno aramiden ida a langalang, a pagsidsiddaawan, a pagsanamtican, ken lunod, cas iti daytoy nga aldaw;

¹⁹ Ni Faraon nga ari ti Egipto, ken dagiti adipenna ken dagiti piprincipena, ken amin ti ilina;

²⁰ Ken amin dagiti samusam a tattao, ken amin nga ari ti daga ti Us, ken amin dagiti ar-ari ti daga dagiti Filisteos, ken Ascalon, ken Gaza, ken Ekron, ken ti mabati ti Asdod;

²¹ Edom, ken Moab, ken dagiti annac ti Ammon;

²² Ken amin dagiti ari tiTiro, ken amin dagiti ari ti Sidon, ken dagiti ari ti puro isu nga adda iti ballasiw ti baybay;

²³ Dedan, ken Tema, ken Buz, ken amin dagiti napukisan ti ngarab ti buocda;

²⁴ Ken amin dagiti ari ti Arabia, ken amin dagiti ari dagiti samusam nga umili nga agnaed iti let-ang;

²⁵ Ken amin dagiti ari ti Zimri, ken amin dagiti ari ti Elam, ken amin dagiti ari ti Medos;

²⁶ Ken amin dagiti ari ti amianan, adayu ken asideg, iti maysa ken iti sabali; ken amin dagiti pagarian ti lubong, nga adda iti rabaw ti daga: ket ti ari ti Sesac uminumto iti calpasanda.

²⁷ Ket cunaemto cadacuada, Castoy ti cuna ni Jehova dagiti buybuyot, a Dios ti Israel: Uminumcayo, ket mabarteccayo, ken agbaccuarcayo ket matuangcayo, ket saancayon a bumangon, gapu iti campilan nga ibaonconto cadacayo.

²⁸ Ket no cas didanto cayat nga alaen ti copa iti imam tapno uminumda, iti casta cunaemto cadacuada, Castoy ti cuna ni Jehova dagiti buybuyot; Pudno unay nga uminumcayto.

²⁹ Ta adtoy, irugic ti agaramid ti dakes iti ili a managan iti naganco; ket dacayo pulos a saancayo coma aya a madusa? Saancayto a di madusa; ta mangayabacto ti campilan cadagiti amin nga agnaed ti daga, cuna ni Jehova dagiti buybuyot.

³⁰ Gapuna nga ipadtom a maibusor cadacuada amin dagitoy a sasao, ket cunam cadacuada, Ni Jehova agungorto manipud iti ngato, ket iyebcasnanto ti timecna manipud iti nasantoan a taengna; agungorto a sibibileg a maibusor iti pagtaenganna; isu umkisto, a cas cadagiti agbaddec cadagiti uvas, a maicaniwas cadagiti amin nga agnaed iti daga.

³¹ Maysa nga anabaab umayto agingga met laeng iti pungto ti daga, ta ni Jehova addaan suppiat cadagiti nasnacion: isu sumrecto iti panangocom iti amin a lasag: no maipapan cadagiti nadangcoc yawatnanto ida iti campilan, cuna ni Jehova.

³² Castoy ti cuna ni Jehova dagiti buybuyot, Adtoy, ti dakes rumuarto manipud iti nacion agingga iti nacion ket maysa a dackel a bagio maibangonto manipud caadaywan a pungto ti daga.

³³ Ket dagiti napapatay gapu ken ni Jehova iti dayta nga aldaw addadanto manipud iti maysa a pungto ti daga agingga met laeng iti sabali a pungto ti daga saandanto a masangitan, ket dida met maurnong, uray maitanem; isudanto ti rugit iti rabaw ti daga.

³⁴ Agdung-awcayo, dacayo a paspastor, ken agsangitcayo; ket lumumlumcayo iti dapo, dacayo cangronaan ti arban; ta dagiti al-aldaw ti pannacapapatayyo ken ti pannacaiwarayo dimtengen, ket matnagcayto a cas nacaayayo a dinamili.

³⁵ Ket dagiti paspastor awanto ti dalanda nga agtalaw; uray ti cangronaan ti arban a lumisi.

³⁶ Maysa a timec ti riaw dagiti paspastor, ken dung-aw ti cangronaan ti arban! ta ni Jehova racrakenna ti pagarabanda.

³⁷ Ket dagiti natalna a pagyaponan mapaulimecda gapu iti narungsot nga unget ni Jehova.

³⁸ Pinanawanna ti paglemmenganna, a cas ti leon; ta ti daga nagbalin a langalang a gapu iti rungsot ti mangirurumen a campilan, ken gapu iti narungsot nga ungetna.