Jeremias 24 - Ti Biblia (1973)

Ti leccion a maipapan iti dua a curibut nga higos.

¹ Ni Jehova impakitana caniac, ket adtoy, dua a curibut dagiti higos naisaadda iti sangoanan ti templo ni Jehova, calpasan a ni Nabucodonosor nga ari ti Babilonia impanawna a nacayawan ni Jeconias nga anac a lalaki ni Joakim, ari ti Juda, ken dagiti piprincipe ti Juda, agraman cadagiti nalaing nga agaramid ken mammanday a taga Jerusalem, ket impanda ida idiay Babilonia.

² Maysa a curibut linaonna dagiti nasayaat unay nga higos, cas cadagiti higos nga umuna a maluom; ket daydi maysa a curibut linaonna dagiti dakes unay nga higos, a saan a mabalin a canen ta dakesda unay.

³ Idin kinuna ni Jehova caniac, Ania ti makitam, Jeremias? Ket kinunac, Dagiti higos; dagiti nasayaat nga higos, nasayaat unay; ket daigiti dakes dakesda unay; kot dagiti dakes dakesda unay, a saan a mabalin a canen, ta dakesda unay.

⁴ Ket ti sao ni Jehova dimteng caniac, a kinunana,

⁵ Castoy ti cuna ni Jehova, a Dios ti Israel: Cas cadagitoy nasayaat nga higos, casta ti panangibilangconto cadagiti nacayawan iti Juda, dagidiay pinaruarco ditoy a disso nga impan iti daga dagiti Caldeos a maipaay iti pagimbagan.

⁶ Ta ikitacto dagiti matac cadacuada a maipaay iti imbag, ket iyegconto ida manen ditoy a daga: ket bangonecto ida, a diac ida ipababa; ket imulacto ida, a diacto ida paruten.

⁷ Ket iccacto ida iti puso a mangbigbig caniac, a siac ni Jehova: ket isudanto ti ilic, ket siacto ti Diosda; ta agsublidanto caniac iti amin a pusoda.

⁸ Ket cas cadagiti dakes nga higos a saan a mabalin a canen, ta dakesda, unay, pudno castoy ti cuna ni Jehova, Casta ti panangbaybay-acto ken Sedekias nga ari ti Juda, ken dagiti piprincipena, ken ti matda ti Jerusalem, nga agbati ditoy a daga, ken dagidiay nga agnaed iti daga nga Egipto,

⁹ Baybay-acto ida a maipalladaw nga agal-laal-la iti nagtengngaan dagiti amin a pagarian ti lubong a maipaay iti pagdacsan; tapno agbalin a maysa nga umsi ken maysa a proverbio, maysa a pagrabacan ken maysa a lunod, cadagiti amin a diso a pangipaturongacto cadacuada.

¹⁰ Ket ibaonconto ti campilan, ti bisin, ken ti angol, iti nagtengngaanda, agingga iti maibusda iti daga nga intedco cadacuada ken cadagiti ammada.