Jeremias 23 - Ti Biblia (1973)

Dagiti nadangcoc a paspastor ken ti nalinteg a sanga. Dagiti natiri a mammadto ti Juda ken ti Samaria maidarumda. Dagiti mangrabrabac cadagiti pudno a mammadto matubngarda.

¹ Asi pay dagiti paspastor nga agdadael ken agiwara cadagiti carcarnero ti pagpaarabac! cuna ni Jehova.

² Gapuna a castoy ti cuna ni Jehova, a Dios ti Israel, a maibusor cadagiti paspastor a mangpacan iti ilic: Inwarayo ti pangenco, ken inabugyo ida, ken saanyo ida a sinarungcaran; adtoy, ipasarungcarconto cadacayo ti kinadakes dagiti gapuananyo, cuna ni Jehova.

³ Ket urnongecto ti natda iti pangenco cadagiti amin a dagdaga a nangipaturongac cadacuada, ket iyegconto manen ida cadagiti pagaponanda; ket isuda dagiti nabunga nabungadanto ket umaduda.

⁴ Ket mangipasdecacto cadagiti paspastor cadacuada; isuda a mangtaraon cadacuada; ket saandanto nga agbutengen, wenno agcullayaw, ket awanto met ti agcurang, cuna ni Jehova.

⁵ Adtoy, dagiti al-aldaw dumtengda, cuna ni Jehova, a bangonecto ken David ti maysa a nalinteg a Sanga, ket isu agturayto a cas ari ken agaramid a sisisirib, ket agaramidto iti kinajusticia ken kinalinteg iti daga.

⁶ Cadagiti al-aldawna ti Juda maisalacanto, ket ti Israel agnaedto nga awan peggad; ket daytoy ti naganna a pangawagto kencuana: Jehova a kinalintegtayo.

⁷ Gapuna, adtoy, dagiti al-aldaw dumtengda, cuna ni Jehova, a saandanto a saoenen, Cas sibibiag ni Jehova, isu a nangaon cadagiti annac ni Israel iti daga nga Egipto;

⁸ No di ket, Cas sibibiag ni Jehova, isu a nangaon ken nangidalan iti capuonan ti balay ti Israel manipud iti makinamianan a daga, ken manipud iti isu-amin a daga a nangipaturongac cadacuada. Ket isuda agnaeddanto iti dagada met laeng.

⁹ Maipapan cadagiti mammadto. Ti pusoc narunaw iti unegco, amin dagiti tulangco aggungunda, caslaac iti maysa a tao a nabartec, ken maysa a tao nga inabac ti arac, gapu ken Jehova ken gapu cadagiti nasantoan a saona.

¹⁰ Ta ti daga napno cadagitimannakicamalala; ta maipuon iti lunod ti daga agdung-aw; dagiti pagaraban ti let-ang agmagada. Ket ti pannagnada dakes, ken ti bilegda saan a nalinteg;

¹¹ Ta agpadpada ti mammadto ken ti padi nabassawangda; wen, iti bulayco masaracac ti kinadangcocda, cuna ni Jehova.

¹² Gapuna nga iti dalanda agbalinto cadacuada a cas nagalis a disdisso iti sipnget: isuda maiturongdanto ket matnagda idiay; ta iyegconto ti dakes cadacuada, nga isu ti tawen ti pannacasucnalda, cuna ni Jehova.

¹³ Ket nacakitaac iti minamaag cadagiti mammadto ti Samaria; nagipadtoda gapu ken Baal, ket pinabiddutda ti ilic nga Israel.

¹⁴ Cadagiti mammadto ti Jerusalem nacakitaac met iti nacaalalinggec a banag: isuda makicamalalada, ket magnada cadagiti tiri; ket papigsaenda dagiti im-ima dagiti agaramid ti dakes, ta tapno awan ti agsubli manipud iti kinadakesna: isuda amin agbalinda caniac a cas iti Sodoma, ket dagiti agnaed kencuana cas iti Gomorra.

¹⁵ Gapuna castoy ti cuna ni Jehova dagiti buybuyot a maipapan cadagiti mammadto: Adtoy, pacanecto ida iti ajenjo, ket painumecto ida iti danum ti apro; ta nanipud cadagiti mammadto ti Jerusalem rimmuar ti saan a dinidios a mapan cadagiti amin a daga.

¹⁶ Castoy ti cuna ni Jehova dagiti buybuyot, Dicayo ipangag dagiti sasao dagiti mammadto nga agipadto cadacayo: isurodacayo iti kinaubbaw, agsaoda iti maysa a parparmata ti bucodda a puso, a saan nga aggapu iti ngiwat ni Jehova.

¹⁷ Cunaenda a di agsarday cadagidiay a manguyaw caniac, Ni Jehova kinunana, Addanto talnayo; ket cunada iti tunggal maysa a magna iti kinabangad ti bucodna a pusona, Awan ti dakes nga umayto cadacayo.

¹⁸ Ta siasino ti nagtacder iti pammagbagaan ni Jehova isu a macakita coma ken macangngeg iti saona? siasino ti nangtandaan iti saoc ken nacangngeg kencuana?

¹⁹ Adtoy, ti bagio ni Jehova, nga isu ti pungtotna, rimmuar, wen maysa nga alipugpug a bagio: isu agtinnagto iti rabaw ti olo ti nadangcoc.

²⁰ Ti unget ni Jehova saanto nga agsubli, agingga iti maaramidna, ken matungpalna dagiti panggep ti pusona: cadagiti maudi nga al-aldaw maawatanyonto a naananay.

²¹ Saanco nga imbaon dagitoy a mammadto, nupay casta nagtarayda: saanac a nagsao cadacuada, nupay casta nagipadtoda.

²² Ngem no nagtacderda coma iti pammagbagac, iti casta pinagdengngegda coma ti ilic cadagiti sasaoc, ket insublida ida manipud iti dakes a dalanda, ken manipud iti kinadakes dagiti gapuananda.

²³ Siac aya ti Dios iti asideg, cuna ni Jehova, ket saan a siac met ti Dios iti adayu?

²⁴ Mabalin aya ti siasinoman ti aglinged cadagiti nalmeng a disso tapno isu saanco a makita? cuna ni Jehova. Saanco aya a punnoen ti langit ken daga? cuna ni Jehova.

²⁵ Nangngegco ti sao dagiti mammadto nga agipadto cadagiti ulbod iti naganco, a cunada, Nagtagtagainepac, nagtagtagainepac.

²⁶ Casanonto ti cabayag daytoy iti puso dagiti mammadto nga agipadto cadagiti ulbod, nga isu dagiti mammadto ti allilaw nga aggapu iti pusoda met laeng?

²⁷ A panggependa a panglipaten ti ilic iti naganco gapu cadagiti tagtagainepda nga ibagada tunggal tao iti caarrubana, a cas cadagiti ammada linipatanda ti naganco gapu ken Baal.

²⁸ Ti mammadto nga addaan tagtagainepna, ibagana coma a tagtagainep; ket dayta nga addaan iti saoc, saoenna coma iti saoc a sipupudno. Ania aya ti garami iti trigo? cuna ni Jehova.

²⁹ Saan aya a ti saoc cas la apuy? cuna ni Jehova; ken cas martillo a burakenna ti bato?

³⁰ Gapuna, adtoy, bumusorac cadagiti mammadto, cuna ni Jehova, daydiay tacawenna dagiti sasaoc tunggal maysa iti caarrubana.

³¹ Adtoy, bumusorac cadagiti mammadto, cuna ni Jehova, nga aramatenda dagiti dilada, a cunada, Isu cunana.

³² Adtoy, bumusorac cadagidiay nga agipadto cadagiti ulbod a tagtagainep, cuna ni Jehova, ket ibagada cadacuada, ket pabiddutenda ti ilic gapu cadagiti ulbodda, ken gapu cadagiti ubbaw a panagpasindayag: nupay casta diac ida imbaon, diac met binilin ida; ket saanda met a paggungonaen a pulos daytoy nga umili, cuna ni Jehova.

³³ Ket no daytoy nga umili, wenno ti mammadto, wenno ti padi damagenna kenca a cunana, Ania ti aw-awiten ni Jehova? Cunamto ngarud cadacuada, Ania nga aw-awiten! Ipalladawcayto, cuna ni Jehova.

³⁴ Ket no maipapan iti mammadto, ken iti padi, ken iti umili, nga agcunanto, Ti aw-awiten ni Jehova, siac dusaecto met dayta a tao ken ti balayna.

³⁵ Castoy ti cunaenyonto tunggal maysa iti caarrubana, ken tunggal maysa iti cabsatna a lalaki, Ania ti insungbat ni Jehova? ken, ania ti sinao ni Jehova?

³⁶ Ket ti aw-awiten ni Jehova saanyonto a dacawatenen: ta ti sao met laeng ti tunggal tao isunto ti awitna, ta tiniritiryo dagiti sasao ti Dios a sibibiag, a ni Jehova dagiti buybuyot a Diostayo.

³⁷ Castoy ti cunamto iti mammadto, Ania ti insungbat ni Jehova kenca? ken, ania ti sinao ni Jehova?

³⁸ Ngem no cunayo, Ti aw-awiten ni Jehova, castoy ngarud ti cuna ni Jehova: Agsipud ta saoenyo daytoy a sao, Ti aw-awiten ni Jehova, ket nagbaonac cadacayo, a kinunac, Saanyonto a cunaen, Ti aw-awiten ni Jehova;

³⁹ Adtoy ngarud, lipatancayto a naananay, ket ibellengcayto, ken ti ili nga intedco cadacayo ken cadagiti ammayo, iti adayu caniac:

⁴⁰ Ket iyegconto ti agnanayon a pannacaumsi cadacayo, ken awan inggana a pannacaibabain, isu a saanto a malipatan.