Jeremias 20 - Ti Biblia (1973)

Ni Jeremias ipadtona ti pannacacayaw ni Pasur. Isu sangitanna dagiti pannacasuutna ken ilunodna ti aldaw a pannacayanacna.

¹ Ket ni Pasur nga anac a lalaki ni Immer a padi, isu a pangolo nga agturay iti balay ni Jehova, nangngegna ni Jeremias nga agipadpadto cadagitoy a banbanag.

² Idin ni Pasur kinabilna ni Jeremias a mammadto, ket isu incabilna cadagiti tul-ong nga adda idi iti makinngato a ruangan ti Benjamin, nga adda iti balay ni Jehova.

³ Ket naaramid iti cabigatanna a ni Pasur iniccatna ni Jeremias cadagiti tul-ong. Idin kinuna ni Jeremias kencuana, Ni Jehova saanna nga inawagan dayta naganmo iti Pasur, no di Magor-missabid

⁴ Ta castoy ti cuna ni Jehova, Adtoy, aramidencanto a maysa a pagbutngan kenca met laeng, ken cadagiti amin a gagayyemmo; ket isuda mapasagdanto iti campilan dagiti cabusorda, ket dagita matam makitadanto; ket yawatconto ti amin a Juda iti ima ti ari ti Babilonia, ket alaennanto ida a cayaw idiay Babilonia, ket papatayennanto ida iti campilan.

⁵ Castamet itedconto amin a kinabacnang daytoy nga ili, ken amin a patubona ken amin dagiti napateg a banbanag, wen, amin a gamgameng dagiti ar-ari ti Juda yawatconto iti ima dagiti cabusorda; ket pagbalinendanto ida a samsam, ken alaenda ida, ket ipanda ida idiay Babilonia.

⁶ Ket sica, Pasur, ken amin nga agnaed iti balaymo mapancayto iti pannacacayaw; ket umaycanto, idiay Babilonia, ket idiay mataycanto, ket maitanemcanto, sica ken amin dagiti gagayyemmo, isuda a nagipadtoam a siuulbod.

⁷ O Jehova, sica inuyotannac ket nagtulnogac; sica napigpigsaca ngem siac, ket nagballigica: nagbalinac a maysa a pagcatawaan iti amin nga aldaw, tunggal maysa rabakennac.

⁸ Ta no maminano nga agsaoac, agickisac; yickisco ti, Panagpilit ken pannacarbec, ta ti sao ni Jehova naaramid a pangbabain caniac, ken maysa nga uyaw, iti amin nga aldaw.

⁹ Ket no cunac, Ti naganna saanconto a dacawaten, diacto met agsaon iti naganna, adda ngarud iti pusoc ti cas sumsumged nga apuy a naripcan cadagiti tultulangco, ket mautoyanac nga agitured, ket saanac a macaibtur.

¹⁰ Ta nangngegco ti panangumsi ti adu, ti pagbutngan iti tunggal sikigan. Agdarum cunada, ket isu idarumminto, cuna dagiti amin a caingongotco a gagayyem, isuda nga agururay iti pannacatuangco; nalabit isu mauyotanto, ket agbal-ligitayto a maibusor kencuana, ket datayo macabalestayto kencuana.

¹¹ Ngem ni Jehova adda caniac cas maysa a nabileg ken maysa a nacabutbuteng: gapuna a dagiti mangidadanes caniac maitibcoldanto; ket saandanto nga agbal-ligi: isuda maibabaindanto a naananay, agsipud ta saanda a nagaramid a sisisirib, castamet ti awan inggana a pannacababas a dinto uray caanoman.

¹² Nupay casta, O Jehova dagiti buybuyot, a mangpadas iti nalinteg, ken macakita iti puso ken isip, palubosannac a mangkita iti pammalesmo cadacuada: ta kenca impalawagco ti calintegac.

¹³ Agcantacayo ken Jehova, dayawenyo ni Jehova; ta isu inispalna ti cararua ti nacacaasi it ima dagiti agar-aramid iti dakes.

¹⁴ Mailunod coma ti aldaw a pannacayanacco: saan coma a mabendicionan ti aldaw a panangipasngay ni inac caniac.

¹⁵ Mailunod coma ti tao a nangyeg ti damag ken amac, a kinunana, Maysa nga ubing a lalaki nayanac kenca; isu a nangparagsac unay kencuana.

¹⁶ Ket dayta a tao agbalin coma a cas cadagiti il-ili a dinadael ni Jehova, ket dina nagbabawian: ket isu mangngegna coma ti maysa nga ariwawa iti gubat ti agsapa ken dir-i iti matoon:

¹⁷ Agsipud ta isu dinac pinapatay manipud iti aanacan; ket iti casta ni inac isu coma ti tanemco, ket ti aanacanna cancanayon coma a dackel.

¹⁸ Ania ti gapuna a rimmuarac iti aanacan tapno lac-amec ti bannog ken liday, ken tapno dagiti al-aldawco maibus coma iti bain?