Jeremias 2 - Ti Biblia (1973)

Ni Jeremias maibaon idiay Jerusalem a mamagbabawi kencuana gapu iti kinasukirna.

¹ Ket dimteng caniac ti sao ni Jehova, a kinunana.

² Inca, ket ipuccawmo cadagiti lapayag ti Jerusalem, a cunam, Castoy ti cunana ni Jehova, Malagipca gapu iti kinaimbag ti kinaubingmo, ken gapu iti ayat dagiti pannakisinggalutmo; no casano ti isusurotmo iti licudac idiay let-ang, iti daga a saan a namulaan.

³ Ti Israel nasantoan idi ken Jehova, dagiti damo a bungbunga ti yaaduna: amin dagiti mangalun-un kencuana macabasoldanto; ti dakes dumtengto cadacuada, cuna ni Jehova.

⁴ Denggenyo ti sao ni Jehova, O balay ni Jacob, ken isu-amin a familia iti balay ni Israel:

⁵ Castoy ti cuna ni Jehova, Ania a kinadakes ti nasaracanda caniac dagiti ammayo a simmiasida caniac, ket sinurotda ti kinaubbaw, ket nagbalinda nga ubbaw?

⁶ Ket saanda met a kinuna, Sadino ti yan ni Jehova nga inaonnacami iti daga ti Egipto, a nangidalan cadacami itilet-ang iti maysa a daga dagiti langalang ken bitbito, iti maysa a daga a namaga ken ti aniniwan ni patay, iti daga a saan a nagnaan, ken awan tinagnaed a tao.

⁷ Ket inserreccayo iti daga a nabacnang, tapno canenyo ti bungana ken imbagna; ngem idi simreccayo, tinulawanyo ti dagac, ket inaramidyo ti tawidco a kinarimon.

⁸ Dagiti papadi saanda a kinuna, Sadino ti yan ni Jehova? Ket dagiti agaywan ti linteg saandac a binigbig: ket casta met dagiti agturay simmalungasingda a maibusor caniac; ket dagiti mammadto nagpadtoda gapu ken Baal, ket sinurotda iti awan malac-am.

⁹ Ngarud, makisusicacto pay cadacayo, cuna ni Jehova, ken cadagiti annac dagiti annacyo makisusicacto.

¹⁰ Ta incayo cadagiti purpuro idiay Kitim, ket kitaenyo; ket ibaonyo idiay Cedar, ket utobenyo a sireregta, ket imutectecanyo no adda idi ti castoy a banag.

¹¹ Adda maysa a nacion a binalbaliwanna dagiti didiosna, idinto nga isuda saanda a didios? Ngem ti ilic insucatna ti dayagda iti awan magungunana.

¹² Masdaawcayo, O dacayo langlangit, iti daytoy, ket agamaccayo iti napalalo unay, agladingitcayo iti nasaem, cuna ni Jehova.

¹³ Ta dua a kinadakes ti inaramid ti ilic: naglicudandac nga ubbog dagiti dandanum a sibibiag, ket nagcalida cadagiti bubbubon nga agpaay cadacuada, bubbubon a narengngat a saan a mabatian iti danum.

¹⁴ Ni Israel aya maysa nga adipen? maysa a nayanac a tagabu? apay a nagbalin a samsam?

¹⁵ Dagiti urbon dagiti leon nagungorda kencuana ken nagugada; ket pinagbalinda ti dagana a langalang; nauram dagiti il-ilina, awan ti agnaed cadacuada.

¹⁶ Castamet dagiti annac ti Memfis ken Tafnes binoongda ti toctoc ti olom.

¹⁷ Saanmo aya a nagunodan daytoy kenca met laeng, idi naglicudam ni Jehova a Diosmo, idi iturturongnaca iti dalan?

¹⁸ Ita ngarud, ania ti bibiangmo iti dalan a mapan idiay Egipto, ta uminumca cadagiti danum ti Nilo? wenno ania ti bibiangmo iti dalan ti Asiria, tapno uminumca iti danum ti Carayan?

¹⁹ Ta kinadakesmo met laeng bagbagaandacanto, ket dagiti panaglicudmo tubngarennacanto: ammoem ngarud ket kitaem nga isu dakes a banag ken napait ta naglicudca ken Jehova a Diosmo, ken awan kenca ti panagraem caniac, cuna ti Apo, ni Jehova dagiti buybuyot.

²⁰ Ta nanipud ugma dinadaelco ti sangolmo, ket binucaac dagiti reppetmo; ket kinunam, Saanacto nga agservi; ta iti rabaw ti tumunggal bantay a nangato ken siroc ti tumunggal cayo a narucbus nagrucbabam a nagbalangcantisca.

²¹ Nupay casta immulac kenca ti natan-oc nga uvas, pulos a naimbag a bukel: casano ngarud ti panagbalinmo a dakes a sangsanga ti uvas a gangannaet caniac?

²² Ta uray agbuggoca coma iti tinoro, ket aramatem ti adu a sabon, ti kinadakesmo adda pay laeng a naimaldit iti saclangco, cuna ni Apo Jehova.

²³ Casano ti panagcunam, Saanac a natulawan saanac a simmurot ken Baal? kitaem ti dalanmo iti lobong; ammoem ti inaramidmo: camelloca a nasiglat a magmagna cadagiti daldalanna;

²⁴ Maysa nga asno a naatap a mairuam iti let-ang, nga agsaep iti angin iti calicagumna; iti gundawayna asino ti macatiped kencuana? amin dagiti agsapul kencuana saandanto a mabannog; ta masaracandanto iti pannawenna.

²⁵ Igagam ta sacam iti pannagnana nga awan zapatosna, ken dayta carabucobmo iti waw. Ngem kinunam, Awan capapayanna; saan, ta inayatco dagiti gangannaet ket surotecto ida.

²⁶ Cas iti pannacabain ti mannanacaw no masucalan, castamet ti pannacabain ti balay ti Israel; isuda, dagiti ar-arida, piprincipeda, papadida, ken dagiti mammadtoda;

²⁷ Nga agcuna itipuon ti cayo, Sica ti amac; ket iti bato, Sica ti nangputot caniac; ta tinallicudandac a dida insango, ti rupada caniac; ngem iti panagtuocda cunaendanto, Bumangonca, ket isalacannacami.

²⁸ Ket sadino ti yanda dagiti didiosemo a binangonmo a maipaay kenca? Bumangonda coma, ta bareng maisalacandaca iti pacatutuocam: ta no casano ti bilang dagiti il-ilim, O Juda, castamet ti bilang dagiti didiosmo.

²⁹ Apay a makisuppiatcayo caniac? dacayo amin simmalungasingcayo caniac, cuna ni Jehova.

³⁰ Awan capapayan ti panangdusac cadagiti annacyo; saanda nga inawat ti panangtubngar, ti igamyo met laeng inalun-unna dagiti mammadtoyo a cas maysa a leon a naranggas.

³¹ O caputotan, kitaenyo ti sao ni Jehova. Caslaac aya maysa a let-ang iti Israel? wenno maysa a daga ti nacaro a sipnget? Apay a saoen ti ilic, Nawayaancami, saancamto nga umayen kenca?

³² Malipatan aya ti maysa a virgen dagiti arcosna, wenno ti maysa a novia ti cawesna? Ngem ti ilic naglipat caniac cadagiti di mabilang nga al-aldaw.

³³ Anian ti panangpasayaatmo iti dalanmo tapno birukem ti ayat! Iti casta uray pay cadagiti babbai a dakes insurom dagiti dalanmo.

³⁴ Castamet cadagita cawesmo masaracan ti dara dagiti nasingpet a napanglaw a cararua: Saanmo ida a nasucalan a mangaramid iti sercan; no di ket gapu amin cadagitoy basbasolmo.

³⁵ Ngem kinunam, Siac awan basolco; awan duadua a ti pungtotna nayadayu caniac. Adtoy, iserrecanto iti pangocoman agsipud, ta cunam, Saanac a nagbasol.

³⁶ Ania aya ti pagalla-allaam a mamalbaliw iti dalanmo? Maibaincanto met gapu iti Egipto a cas iti pannacabainmo idi iti Asiria.

³⁷ Manipud idiay rumuarcanto, a sibaballolong dagita im-imam iti olom: ta ni Jehova dina inawat dagiti pagtalcam, ket saancanto a rumang-ay a maicuyog cadacuada.