Jeremias 19 - Ti Biblia (1973)

Ti pannacarbec ti Jerusalem mayarig iti maysa a gogorita a naboong.

¹ Castoy ti cuna ni Jehova, Inca ket gumatangca iti gorgorita ti agdamdamili, ket mangalaca cadagiti panglacayen ti umili, ken cadagiti panglacayen dagiti papadi.

² Ket mapanca iti lobong ti anac a lalaki ni Hinnom, nga adda iti pagsercan ti ruangan nga Harsit, ket iwarragawagmo idiay dagiti sasao nga ibagacto kenca;

³ Ket cunam, Denggenyo ti sao ni Jehova, O ar-ari ti Juda, ken agnaed ti Jerusalem: Castoy ti cuna ni Jehova dagiti buybuyot, a Dios ti Israel, Adtoy, iyegconto ti dakes ditoy a disso, isu a siasinoman a macangngeg, dagiti lapayagna agpipikeldanto.

⁴ Agsipud ta binaybay-andac, ken insabalida daytoy a disso, ken nangpuurda iti incienso kencuana cadagiti sabali a diosen a dida naammoan, isuda ken dagiti ammada ken dagiti ar-ari ti Juda, ket pinunnoda daytoy a disso iti dara dagiti awan basolda,

⁵ Ket binangonda dagiti nangato a disdisso ni Baal, tapno puuranda dagiti annacda a lallaki iti apuy a maipaay a datdaton a mapuuran ken Baal; isu a diac imbilin, wenno insaoc, ket diac met pinanunot:

⁶ Gapuna, adtoy, dagiti al-aldaw dumtengda, cuna ni Jehova, a daytoy a disso saanton a managanan Tofet, wenno ti lobong ti anac a lalaki ni Hinnon, no di ket ti lobong a Pagpapatayan.

⁷ Ket paubbawecto ti pammagbaga ti Juda ken Jerusalem ditoy a disso; ket pagpasagecto ida iti campilan iti sangoanan dagiti cabusorda, ken iti ima dagidiay agsapul iti biagda: ket dagiti bangcayda itedconto a pagtaraon cadagiti tumatayab ti langit ken cadagiti animal ti daga.

⁸ Ket aramidecto daytoy nga ili a maysa a pagsiddaawan, ken maysa a pagsanamtican; tunggal maysa a lumabas kencuana masdaawto ken agsanamticto gapu cadagiti amin a saplitna.

⁹ Ket pagtaraonecto ida iti lasag dagiti annacda a lallaki ken lasag dagiti annacda a babbai; ket canendanto tunggal maysa ti lasag ti gayyemna, iti pannacalacub ken iti rigat, isu a pangtutuocto cadacuada dagiti cabusorda ken dagiti agsapul iti biagda.

¹⁰ Calpasanna buongemto ti gorgorita iti imatang dagiti lallaki a makicuyog kenca,

¹¹ Ket cunaemto cadacuada, Castoy ti cuna ni Jehova dagiti buybuyot: Castanto ti panangburacco iti daytoy nga umili ken daytoy nga ili, cas iti panangbuong iti dinamili ti agdamdamili, a saan a mabalinen a tarimaanen, ket agitanemdanto idiay Tofet agingga iti awan ti disso a pagicalian.

¹² Castoy ti panangaramidconto ditoy a disso, ken cadagiti agnaed kencuana, cuna ni Jehova nga aramidec met laeng daytoy nga ili a cas iti Tofet;

¹³ Ket dagiti balbalay ti Jerusalem, ken dagiti balbalay dagiti ar-ari ti Juda, isuda a natulawan, isudanto dagiti cas iti disso ti Tofet, dagiti amin met laeng balbalay nga iti rabaw dagiti at-atepda nagpuurda iti incienso cadagiti amin a buyot ti langit, ket nangibucbocda cadagiti datdaton a mainum cadagiti sabali a diosen.

¹⁴ Idin immay ni Jeremias a naggapu iti Tofet, a nangibaonan kencuana ni Jehova nga agipadto; ket isu nagtacder iti paraangan ti balay ni Jehova, ket kinunana iti amin nga umili:

¹⁵ Castoy ti cuna ni Jehova dagiti buybuyot, a Dios ti Israel, Adtoy, iyegconto ditoy nga ili ken iti amin nga il-ilina ti amin a dakes a binalicasco a maibusor kencuana; agsipud ta pinatangkenda ti teltelda, tapno saanda a mangngeg dagiti sasaoc.