Jeremias 18 - Ti Biblia (1973)

Maysa a leccion iti alicamen ti agdamdamili. Ti Israel maiwaris. Ni Jeremias agcararag iti maicaniwas cadagiti cabusorna.

¹ Ti sao a dimteng ken Jeremias a naggapu ken Jehova kinunana,

² Tumacderca, ket sumalogca iti balay ti agdamdamili, ket idiay ipangngegconto kenca dagiti saoc.

³ Idin simmalogac iti balay ti agdamdamili, ket adtoy, isu agar-aramid idi iti maysa nga aramid cadagiti pilpilid.

⁴ Ket idi a ti vaso nga inaramidna iti pila nadadael iti ima ti agdamdamili, isu inaramidna manen a sabali nga vaso, cas pagayatan nga aramiden daydi agdamdamili.

⁵ Idin ti sao ni Jehova dimteng caniac, a kinunana,

⁶ O balay ti Israel, diac mabalin aya ti agaramid kenca a cas daytoy nga agdamdamili? cuna ni Jehova. Adtoy, cas ti pila iti ima ti agdamdamili, castacayo iti imac, O balay ti Israel.

⁷ Iti aniaman a canito a panagsaocto maipapan iti maysa a nacion, ken maipapan iti maysa a pagarian, tapno parutec ken burakec ken isu dadaelec,

⁸ No dayta a nacion, a maipapan kencuana, nagsaoac, pagbabawianda ti kinadakesda, ibabawicto ti dakes, a pinanunotco nga aramiden cadacuada.

⁹ Aniaman a canito a panagsaocto a maipapan iti maysa a nacion, ken maipapan iti maysa a pagarian, tapno bangonec ken isu imulac.

¹⁰ No aramidenda daydiay dakes iti imatangco, a dida annuruten ti timecco, iti casta agbabawiacto ibabawicto iti imbag, isu a sinaoc a pangpaimbagco cadacuada.

¹¹ Ita ngarud, agsaoca cadagiti lallaki ti Juda, ken cadagiti agnaed ti Jerusalem, a cunam, Castoy ti cuna ni Jehova: Adtoy, mangsangalac iti dakes a maicaniwas cadacayo, ken isicatco iti maysa a gandat a maibusor cadacayo: agsublicayo ita tunggal maysa nga aggapu iti dakes a dalanna, ket tarimaanenyo dagiti dalanyo ken dagiti gapuananyo.

¹² Ngem isuda cunada, Isu awan capapay-anna, ta magnacaminto cadagiti bucodmi a gandat, ket agaramidcamto tunggal maysa iti kinabangad ti dakes a pusona.

¹³ Gapuna castoy ti cuna ni Jehova; Damagenyo ita iti nagtengngaan dagiti nasnacion, isuda a nacangngeg cadagiti casta a banbanag; ti virgen ti Israel nagaramid iti maysa a nacaal-alinggec a banag.

¹⁴ Agcurangto aya ti nieve ti Libano iti bato ti tanap, wenno mamagaanto aya dagiti nalamiis a dandanum nga agayus manipud iti adayu?

¹⁵ Ta ti ilic linipatannac, nagpuurda ti incienso cadagiti saan a pudno a dios; ket pinaitibcolda cadagiti dalanda, cadagiti daan a dandana, tapno magnada cadagiti dandana, iti maysa a dalan a saan a nagaburan;

¹⁶ Tapno maaramid ti dagada a maysa a pagsiddaawan, ken maysa nga agnanayon a pagsanamtican; isu-amin a lumasat idiay masdaawto, ket iwingiwingna ti olona.

¹⁷ Cas babaen ti maysa a casaor iwarisconto ida iti sangoanan ti cabusor; iparangconto cadacuada ti bucot a saan a ti rupa, iti aldaw ti kinadacsangasatda.

¹⁸ Idin kinunada, Umaycayo, ket isicattayo dagiti gandat a maibusor ken Jeremias; ta ti linteg iti padi saanto a mapucaw, wenno pammagbaga iti masirib, wenno ti sao iti mammadto. Umaycayo, ket isu pagsasaoantayo, ket saantayo nga ipangag dagiti aniaman cadagiti saona.

¹⁹ Ipangagnac, O Jehova, ket timudem ti timec dagidiay a makisuppiat caniac.

²⁰ Maisupapacto aya ti dakes iti naimbag? ta isuda nagcalida iti maysa nga abut a maipaay itoy cararuac. Lagipem no casano ti panagtacderco iti sangoanam a nangisao iti naimbag a maipaay cadacuada, tapno iyadayum ti pungtotmo cadacuada.

²¹ Ngarud iyawatmo dagiti annacda iti bisin, ket itedmo ida iti bileg ti campilan; ket agbalin coma dagiti assawada a babbai nga awanan annac, ken babbalo; ket dagiti lallakida mapapatayda coma iti patay, ket dagiti agtutuboda a lallaki macabilda iti campilan iti dangadang.

²² Mangngegan coma ti maysa a riaw manipud cadagiti balbalayda, no iyegmon a pettat ti maysa a buyot cadacuada; ta nagcalida iti maysa nga abut tapno alaendac, ken nangilemmengda cadagiti silo a maipaay cadagiti sacac.

²³ Nupay casta, Jehova, ammom amin ti panagemda a maicaniwas caniac a pangpapatay caniac; dica pacawanen ti kinadakesda, ket dica met punasen ti basolda iti imatangmo; no di ket bay-am ida a marbec iti sangoanam; pagbanagem ida iti pannawen ti pungtotmo.