Jeremias 17 - Ti Biblia (1973)

Ti basol ti Juda saan a mapunas. Ni Jehova maymaysa ti pagcammatalcan. Ti mammadto agcararag gapu iti salacnib. Ti aldaw a panaginana rebbengna ti mangilin.

¹ Ti basol ti Juda naisurat babaen ti pluma a landoc, ken iti ngudo ti diamante: naibutac iti tapi ti pusoda, ken cadagiti sara dagiti altaryo;

² Bayat ti pannacalaglagip dagiti annacda cadagiti altarda ken ti Asherimda iti arpad dagiti narucbos a caycayo iti rabaw dagiti nangato a turturod.

³ O bantayco iti away, itedconto ti sanicuam ken amin dagiti gamengmo a maysa a samsam, ken dagiti nangato a dissom gapu iti basol cadagiti amin a beddengmo.

⁴ Ket sica, uray pay sica met laeng, saancanto nga agtuloy iti tawidmo nga intedco kenca; ket pagserviencanto cadagiti cabusormo, iti daga a dica ammo; ta pinasgedanyo ti maysa nga apuy iti pungtotco isu nga sumgedto iti agnanayon.

⁵ Castoy ti cuna ni Jehova: Mailunod ti tao nga agcammatalec iti tao, ken pagbalinenna ti lasag a tackiagna, ket ti pusona sumina ken Jehova.

⁶ Ta isunto cas iti caruotan iti langalang, ket saan a macakita no umay ti imbag, no di ket agnaedto cadagiti naticag a disso iti let-ang, maysa a caapayaan ken saan a mapagnaedan.

⁷ Nagasat ti tao nga agcammatalec ken Jehova, ket ti talgedna ni met laeng Jehova.

⁸ Ta isunto ti cas cayo a naimula iti arpad dagiti danum, nga isacnapna dagiti ramutna iti arpad ti carayan, ket saan nga agbuteng no umay ti pudot, no di ket ti bulongna nalangtonto; ket saanto a madanagan iti tawen ti ticag, ket dinto met sumardeng iti panagbungana.

⁹ Ti puso manangallilaw a nacarcaro ngem dagiti amin a banag, ket isu napalalo a nagdakes; asino ti macaamo kencuana?

¹⁰ Siac, ni Jehova, sukisukec ti isip, suutec ti puso, tapno itedco met laeng iti tunggal tao ti cas mainugot cadagiti dalanna, ti cas maiyalubog iti bunga dagiti gapuananna.

¹¹ Cas ti tucling a mangocop cadagiti iclog a saanna nga inyeclog, casta ti agala iti kinabacnang, ket saan a naincalintegan; iti tengnga dagiti aldawna isu panawandanto, ket iti panungpalanna isunto ti maysa a maag.

¹² Maysa a nadayag a trono, a naisaad iti ngato nanipud idi punganay, isu ti disso ti santuariotayo.

¹³ O Jehova, a namnama ti Israel, amin dagiti aglicud kenca maibabaindanto. Dagidiay sumina caniac maisuratdanto iti daga, agsipud ta naglicudanda ni Jehova, ti ubbug dagiti sibibiag a danum.

¹⁴ Agasannac, O Jehova, ket maimbaganacto; isalacannac, ket maisalacanacto: ta sica ti dayawco.

¹⁵ Adtoy, cunaenda caniac, Sadino ti yan ti sao ni Jehova? isu umay coma ita.

¹⁶ No maipapan caniac, saanac a nagdarasudos a pimmanaw iti panagpastor iti licudam; ket diac met tinarigagayan ti nacaay-ay-ay nga aldaw, sica ammom: dagiti rimmuar cadagiti bibigco adda iti sangoanam.

¹⁷ Saanca coma a macapabuteng caniac; sica ti camangco iti aldaw ti dakes.

¹⁸ Maibabainda coma dagiti mangidadanes caniac, ngem saanac coma, a maibabain; agcullayawda coma, ngem saanac nga agcullayaw; iyegmo cadacuada ti aldaw ti dakes, ket dadaelem ida iti mamindua a pannacadadael.

¹⁹ Castoy ti kinuna ni Jehova caniac: Inca, ket agtacderca iti ruangan dagiti annac ti umili, isu a sercan dagiti ar-ari ti Juda, ken daydiay pagruruaranda, ken cadagiti amin a ruruangan ti Jerusalem;

²⁰ Ket cunam cadacuada, Denggenyo ti sao ni Jehova, dacayo ar-ari ti Juda, ken ti amin a Juda, ken amin ti agnaed iti Jerusalem, a sumrec cadagitoy a ruruangan:

²¹ Castoy ti cuna ni Jehova, Agannadcayo cadagiti bagiyo met laeng, ket dicayo agawit iti awiten iti aldaw a panaginana, ket dicay met iserrec cadagiti ruangan ti Jerusalem;

²² Castamet a dicay mangiruar iti maysa nga awiten cadagiti balbalayyo cadagiti aldaw a panaginana, ket saancayo met nga agaramid iti aniaman a trabajo: ngem ngilinenyo ti aldaw a panaginana, cas imbilinco cadagiti ammayo.

²³ Ngem saanda nga impangag, ket dida met inyallingag ti lapayagda, no di ket pinatangkenda ti teltelda, tapno saanda a macangngeg ken dida maisuro.

²⁴ Ket maaramidto, no siaannadcayo a mangipangag caniac, cuna ni Jehova, a dicayo mangiserrec iti awiten, cadagiti ruangan daytoy nga ili iti aldaw a panaginana, no di ket ngilinenyo ti aldaw a panaginana, a dicayo agtrabajo kencuana;

²⁵ Sumrecdanto ngarud cadagiti ruangan daytoy nga ili dagiti ar-ari ken piprincipe a situtugaw iti trono ni David, a nacasacayda cadagiti lugan ken cabcabayo, isuda ken dagiti piprincipeda, dagiti lallaki ti Juda, ken dagiti agnaed ti Jerusalem, ket daytoy nga ili mataginayonto.

²⁶ Ket umaydanto nga aggapu cadagiti il-ili ti Juda, ken aggapu cadagiti aglicmut iti Jerusalem, ken aggapu iti daga ti Benjamin, ken aggapu iti nababa a daga, ken iti caturodan, ken aggapu iti Abagatan, a mangiyegda cadagiti datdaton a mapuuran, ken sacrificios ken datdaton a macan, ken incienso, ken mangiyegda cadagiti datdaton ti panagyaman, iti balay ni Jehova.

²⁷ Ngem no didac ipangag maipuon iti panagngilinyo ti aldaw a panaginana, ken iti saan a panagawit iti maysa nga awiten ken iseserrec cadagiti ruangan ti Jerusalem iti aldaw a panaginana; pasgedacto ngarud ti maysa nga apuy cadagiti ruanganna, ket alun-unennanto dagiti palacio ti Jerusalem, ket saanto a maiddep.