Jeremias 16 - Ti Biblia (1973)

Nasaem a ladinget maipadto. Ti pannacasubli mapasarunuanto iti dusa.

¹ Ti sao ni Jehova dimteng met caniac, a kinunana,

² Saanca a mangasawa iti babai ditoy a disso ket awanto met dagiti annacmo a lallaki wenno annac a babbai.

³ Ta castoy ti cuna ni Jehova maipanggep cadagiti annac a lallaki ken maipapan cadagiti annac a babbai a mayanac ditoy a disso, ken maipanggep cadagiti innada a nangipasngay cadacuada, ken maipapan cadagiti ammada a nagputot cadacuada ditoy a daga:

⁴ Mataydanto iti nasaem nga ipapatay: saandanto a madung-awan, ket didanto met maiponpon; isudanto dagiti cas rugit iti rabaw ti daga; ket maibusdanto iti campilan ken it bisin; ket dagiti bangcayda pagtaraonto a maipaay cadagiti tumatayab ti langit ken cadagiti animal ti daga.

⁵ Ta castoy ti cuna ni Jehova, Saanca a sumrec iti balay a nagpanes, ket dica met mapan nga agunnoy, ket dica met sangitan ida; ta siac iniccatco ti talnac iti daytoy nga umili, cuna ni Jehova, ti met laeng kinamanagayat ken caasi a naalumamay.

⁶ Ti dackel ken castamet ti bassit agpadpada mataydanto ditoy a daga, saandanto a maiponpon, ket dagiti tattao didanto met agunnoy gapu cadacuada wenno sugatenda met laeng, dagiti bagbagida wenno kiskisan ti oloda gapu cadacuada;

⁷ Ket dagiti tattao saandanto met nga agpisi iti tinapay iti panagladingit gapu cadacuada, tapno liwliwaenda ida gapu cadagiti natnatay; ket dagiti tattao didanto met ited ti copa ti pangliwliwa tapno uminumda gapu iti amada wenno gapu iti inada.

⁸ Ket saancanto a sumrec iti balay ti rambac a makitugawca cadacuada, a mangan ken uminum.

⁹ Ta castoy ti cuna ni Jehova dagiti buybuyot, a Dios ti Israel: Adtoy, pagsardengecto ditoy a disso, iti sangoanan dagiti matayo ken cadagiti aldawyo, ti timec ti rag-o ken ti timec ti ragsac, ti timec ti novio ken ti novia.

¹⁰ Ket maaramidto, no iparangmonto iti daytoy nga umili amin dagitoy a sasao, ket cunadanto kenca, Apay binalicas ni Jehova amin daytoy dackel a kinadakes a maibusor cadacami? wenno ania ti kinadakesmi? wenno ania ti basolmi nga inaramidmi a maicaniwas ken Jehova a Diostayo?

¹¹ Cunamto ngarud cadacuada, Agsipud ta dagiti ammayo naglicudandac, cuna ni Jehova, ket simmurotda cadagiti sabali a diosen, ket nagservida cadacuada ken nagrucbabda cadacuada, ket naglicudandac, ket dida inannurot ti lintegco;

¹² Ket dacayo nagaramidcayo iti kinadakes a nacarcaro ngem dagiti ammayo; ta adtoy, dacayo magnacayo tunggal maysa iti kinatangken ti dakes a pusona, iti casta dacayo didac impangag:

¹³ Ibellengcayto ngarud iti ruar daytoy a daga iti daga a dicayo naam-ammo, uray dacayo uray dagiti ammayo; ket idiay agservicayto cadagiti sabali a diosen iti aldaw ken rabii; ta awanto ti parabur nga iparangco cadacayo.

¹⁴ Gapuna, adtoy, dagiti al-aldaw dumtengda, cuna ni Jehova, a saanto a masaon, Cas sibibiag ni Jehova, a nangiruar cadagiti annac ti Israel nanipud iti daga ti Egipto;

¹⁵ No di ket, Cas sibibiag ni Jehova, a nangiruar cadagiti annac ti Israel nanipud iti daga ti amianan, ken nanipud cadagiti amin a dagdaga a nangipaturonganna cadacuada. Ket iyegconto manen ida iti dagada nga intedco cadagiti ammada.

¹⁶ Adtoy, agpaayabacto cadagiti adu a mangngalap, cuna ni Jehova, ket calapendanto ida; ket calpasanna ibaonconto dagiti adu a mangnganup, ket anupendanto ida manipud iti tunggal bantay, ken manipud iti tunggal turod, ken cadagiti rengngat dagiti batbato.

¹⁷ Ta dagiti matac mamatmatanda dagiti amin a dalanda; saanda a nailinged iti rupac, ket dagiti kinadakesda saanda met a nailinged cadagiti matac.

¹⁸ Ket umuna supapacacto ti kinadakesda ken ti basolda iti mamindua, agsipud ta tinulawanda ti dagac cadagiti bangcay dagiti nacarurrurud a banbanagda, ken pinunnoda ti tawidco cadagiti kinarimonda.

¹⁹ O Jehova, a pigsac, ken pagsalingdac, ken camangco iti aldaw ti ladingit, dagiti nasnacion umaydanto kenca manipud cadagiti pungto ti daga, ket cunadanto, Dagidi ammami awan ti tinawidda no di ul-ulbod, kinaubbaw met laeng, ken cucua nga awan ti malac-am.

²⁰ Maysa a tao mangaramidto aya cadagiti diosen a maipaay kencuana met laeng, nupay dagidiay saanda a dios?

²¹ Gapuna, adtoy, ipabigbigconto cadacuada, iti daytoy a daras ipabigbigconto cadacuada ti imac ken ti bilegco; ket maammoandanto a ti naganco Jehova.