Jeremias 15 - Ti Biblia (1973)

Ni Jehova saan a mabalbaliwan. Ti panangibales maipacaammo a dakes. Ti tanabutob ni Jeremias ken dagiti sungbat ni Jehova.

¹ Idin kinuna ni Jehova caniac, Nupay da Moises ken ni Samuel nagtacderda iti sangoanac, uray casta ti isipco saan nga agturong iti daytoy nga umili: pagtalawem ida, iti sangoanac, ket bay-am ida a rumuar.

² Ket maaramidto, no cunaenda kenca, Sadino ti pagturonganmi? ibagamto ngarud cadacuada, Castoy ti cuna ni Jehova; Dagiti maipaay iti patay, iti patay; ket dagiti maipaay iti campilan, iti campilan; ket dagiti maipaay iti bisin, iti bisin; ket dagiti maipaay iti pannacacayaw, iti pannacacayaw.

³ Ket mangtudingacto iti ngatoda cadagiti uppat a kita, cuna ni Jehova: ti campilan nga agpapatay, ken dagiti aso nga agpisang, ken dagiti tumatayab ti langit, ken dagiti animal ti daga nga aglamut ken agdadael.

⁴ Ket paipalladawconto ida nga agallaalla cadagiti amin a pagarian iti daga, a gapu ken Manases, nga anac a lalaki ni Ezekias nga ari ti Juda, gapu iti inaramidna idiay Jerusalem.

⁵ Ta siasinonto ti adda asina kenca, O Jerusalem? wenno siasinonto ti agladingit gapu kenca? wenno siasinonto ti dumagas a mangdamag iti casasaadmo?

⁶ Sica binaybay-annac, cuna ni Jehova, nagsunodca: gapuna nga inyunnatco ti imac a maibusor kenca, ket dinadaelca; nabannogac nga agigawgawid.

⁷ Ket intaepco ida iti maysa a paypay cadagiti ruangan ti daga; iniccatac ida cadagiti annac, dinadaelco ti ilic; saanda a nagbabawian dagiti dalanda.

⁸ Dagiti baloda a babbai pinaaduc a nasursuroc ngem iti darat ti baybay; inyegco cadacuada a maibusor iti ina dagiti babbaro ti maysa a mangdadael iti matoon: pinaitinnagco kencuana a pettat ti tuoc ken butbuteng.

⁹ Ti naganac iti pito agdismaya; isu nagbugsot; ti initna limnec idinto nga aldaw pay laeng; isu naibabain ken nariribuc; ket ti tiddada yawatconto iti campilan iti sangoanan dagiti cabusorda, cuna ni Jehova.

¹⁰ Asiac pay, inac, ta impasngaynac a maysa a lalaki a mannakisusic ken maysa lalaki a mannakisuppiat iti isu-amin a daga! Saanac a nagpautang, ket dagiti tattao didac met pinautangan; nupay casta tunggal maysa cadacuada ilunoddac.

¹¹ Ni Jehova kinunana, Pudno papigsaennacanto a maipaay iti imbag; pudno ti cabusor pagdawatecto kenca iti pannawen ti dakes ken iti pannawen ti liday.

¹² Mabalinan aya ti asinoman a bongtolen ti landoc, ti met laeng landoc a naggapu iti amianan, ket gambang.

¹³ Ti sanicuam ken dagiti gamengmo itedconto a samsam nga awan bayadna, ket dayta gapu cadagiti amin a basolmo cadagiti met laeng amin a beddengmo.

¹⁴ Ket palasatecto ida agraman cadagiti cabusormo iti maysa a daga a dica ammo; ta maysa nga apuy napasgedan iti pungtotco, isu nga agpuurto cadacayo.

¹⁵ O Jehova, sica ammom; lagipennac, ket sarungcarannac, ket ibalesannac cadagiti mangidadanes caniac; dinac ipanaw iti mabayag a panagituredmo; ammon a gapu kenca nagsagabaac iti pannacaibabain.

¹⁶ Dagiti saom nasaracanda, ket kinnanco ida; ket dagiti saom nagbalinda caniac a ragsac ken rag-o ti pusoc: ta mainagananac iti naganmo O Jerova, Dios dagiti buybuyot.

¹⁷ Saanac a nagtugaw iti gimong dagidiay a nagragsac, ket diac met nagrag-o; nagtugawac a maymaysa gapu iti imam; ta pinunnonac iti pungtot.

¹⁸ Apay a ti ut-utco agnanayon, ket ti sugatco saan a maagasan, a dina cayat ti maimbagan? pudno aya a sicanto caniac ti cas maysa a waig a mangallilaw, cas dandanum a matianan?

¹⁹ Gapuna castoy ti cuna ni Jehova, No agsublica, iyegcanto ngarud manen, tapno mabalinmo ti agtacder iti sangoanac; ket no isinam ti napateg iti awan pategna, sicanto ti cas ngiwatco: agsublidanto kenca, ngem saancanto nga agsubli cadacuada.

²⁰ Ket aramidencanto iti daytoy nga umili a maysa a natalged a bacud a gambang; ket makigubatdanto a maibusor kenca, ngem didacanto pagballigian; ta addaac kenca a mangispal ken mangruc-at kenca, cuna ni Jehova.

²¹ Ket ruc-atancanto iti ima ti nadangcoc, ket subbotencanto iti ima ti nacaamamac.