Jeremias 14 - Ti Biblia (1973)

Maysa a ticag, ken maysa a cararag iti asi. Ni Jehova ipalawagna nga awan capapayan ti panangibabaet. Maysa a panangipudno iti basol.

¹ Ti sao ni Jehova a dimteng ken Jeremias maipapan iti ticag.

² Ti Juda agladingit, ket dagiti ruanganna agcapuyda, agtugawda a sipapanes iti daga, ket ti riaw ti Jerusalem pimmigsa.

³ Ket dagiti natan-ocda ibaonda dagiti babaonenda cadagiti dandanum: umayda cadagiti tangke, ket dida macasarac iti danum; agawidda nga awan agyan cadagiti alicamenda; nabainanda ken nariribucda ket abbonganda dagiti oloda.

⁴ Maipapan iti daga a nagrengngat, a gapu iti caawan ti tudo iti daga, dagiti agarado maibabainda, abbonganda dagiti oloda.

⁵ Wen, casta met ti ugsa iti tanap aganac, ket panawanna ti anacna, agsipud ta awan ti root.

⁶ Ket dagiti naatap nga asno agtacderda cadagiti nalucasan a panpantoc, agsay-opda iti angin a cas cadagiti aso ti let-ang; dagiti matada cumapuy agsipud ta awan ti root.

⁷ Nupay dagiti kinadakesmi panecnecanda ti maibusor cadacami, agaramidca a maipaay iti naganmo, O Jehova; ta dagiti kinamanaglicudmi aduda, nagbasolcami a maicaniwas kenca.

⁸ O sica ti inanama ti Israel, ti Mangisalacan kencuana itipannawen ti rigat, apay nga agbalinca coma a cas gangannaet iti daga, ken cas maysa nga agpagpagna nga agpacni nga aginana iti rabii?

⁹ Apay agbalinca coma a cas iti maysa a tao a nakigtot, cas ti maysa a nabileg a lalaki a di macaisalacan? Nupay casta sica, O Jehova, addaca iti nagtengngaanmi, ket mainaganancami iti naganmo; dinacami baybay-an.

¹⁰ Castoy ti cuna ni Jehova cadagitoy nga umili, castada laeng inayatda ti panagallaalla; saanda a ginawidan dagiti sacsacada: gapuna a ni Jehova saanna nga awaten ida; ita lagipennanto ti kinadakesda, ken sarungcaranna dagiti basbasolda.

¹¹ Ket ni Jehova kinunana caniac, Dica icararagan daytoy nga umili nga agpaay iti pagimbaganda.

¹² Intono agayunarda, saanconto a denggen ti ickisda, ket no mangidatagda ti daton a mapuuran ken ti daton a macan, diacto awaten ida; no di ket ibusecto ida iti campilan, ken iti bisin, ket iti angol.

¹³ Idin kinunac, O, Apo Jehova! adtoy, dagiti mammadto cunada cadacuada, Saanyonto a makita ti campilan; ket awanto met ti bisinyo; no di ket iccancayto iti natalged a talna iti daytoy a disso.

¹⁴ Idin ni Jehova kinunana caniac, Dagiti mammadto agipatoda cadagiti ulbod iti naganco; diac ida imbaon, ket diac met ida binilin, ket diac met nagsao cadacuada: isuda agipadtoda cadacayo iti maysa a naulbod a parparmata, ken padles, ken banag nga awan, ken ti allilaw ti pusoda met laeng.

¹⁵ Gapuna castoy ti cuna ni Jehova a maipanggep cadagit mammadto nga agipadto iti naganco, ket saanco ida nga imbaon, nupay isuda cunada, Ti campilan ken bisin awanto ditoy a daga: Babaen ti campilan ken bisin maibusto dagidiay a mammadto.

¹⁶ Ket ti umili a nangipadtoanda maibellengto cadagiti lanlansangan ti Jerusalem gapu iti bisin ken ti campilan; ket awanto ti mangicali cadacuada—isuda, dagiti assawada a babbai, wenno dagiti annacda a lallaki, wenno dagiti annacda a babbai: ta ibuyatconto ti kinadangkesda cadacuada.

¹⁷ Ket cunaemto daytoy a sao cadacuada, Dagiti matac pagayusan coma ti lulua iti rabii ken aldaw, ket saanda coma nga agsardeng; ta ti virgen nga anac ti ilic nadadael iti dackel a gutbaw, iti maysa a nasaem unay a sugat.

¹⁸ No rumuarac a mapan iti away; adtoy ngarud, dagiti napapatay iti campilan! ket no sumrecac iti ili, adtoy, ngarud, dagidiay masakit iti bisin! ta ti mammadto ken castamet ti padi mamagpagnada iti daga, ket awan ti pannacaammoda.

¹⁹ Naglictadam aya a sitatalipupus ti Juda ginura aya dayta cararuam ti Sion? apay a kinabilnacami, ket awan ti pannacaagas cadacami? Naguraycami iti talna, ngem awan ti imbag nga immay; ken maysa a pannawen ti pannacaagas, ket adtoy, panagcullayaw!

²⁰ Bigbigenmi, O Jehova, ti kinadangkesmi, ken ti kinadakes dagiti ammami; ta nagbasolcami iti maicaniwas kenca.

²¹ Dinacami guraen, gapu iti naganmo; dica ibabain ti trono ti dayagmo: lagipem, coma saanmo a dadaelen ti tulagmo cadacami.

²² Adda aya aniaman cadagiti kinaubbaw dagiti nasnacion a macapatudo? wenno mabalin aya dagiti langlangit ti mangted cadagiti ar-arbis? saan aya a sica dayta, O Jehova a Diosmi? gapuna dacami urayendacanto; ta sica inaramidmo amin dagitoy a banbanag.