Jeremias 13 - Ti Biblia (1973)

Ti barikes a nalungtot. Ti tanda ti napno a gorgorita. Ti pannacaipadto ti pannacacayaw gapu iti kinadakes ti Juda.

¹ Castoy ti kinuna ni Jehova caniac, Inca, ket gumatangca iti maysa a barikes a lienzo, ket ibarikesmo cadagiti lomom, ket isu dica isawsaw iti danum.

² Gapuna a gimmatangac iti barikes cas mayalubog iti sao ni Jehova, ket imbarikesco cadagiti lomoc.

³ Ket ti sao ni Jehova dimteng caniac iti maicadua a daras, a kinunana,

⁴ Alaem ti barikes a ginatangmo, nga adda cadagiti lomom, ket bumangonca, inca idiay Eufrates, ket isu ilemmengmo idiay iti maysa a rengngat ti bato.

⁵ Gapuna a napanac, ket isu inlemmengco iti denna ti Eufrates, cas imbilin caniac ni Jehova.

⁶ Ket naaramid iti calpasan dagiti adu nga aldaw, a ni Jehova kinunana caniac, Bumangonca, inca idiay Eufrates, ket alaem ti barikes manipud idiay, isu nga imbilinco kenca nga ilemmengmo idiay.

⁷ Idin napanac idiay Eufrates, ket nagcaliac, ket innalac ti barikes manipud iti disso a nangilemmengac kencuana; ket, adtoy, ti barikes nadadael, isu awanen ti capapaayanna.

⁸ Idin ti sao ni Jehova dimteng caniac, a kinunana,

⁹ Castoy ti cuna ni Jehova, casta ti panangdadaelconto iti tangsit ti Juda, ken ti dackel a tangsit ti Jerusalem.

¹⁰ Daytoy dakes nga umili, a dina cayat nga ipangag dagiti sasaoc, a magna iti kinabangad ti pusoda, ken simmurot cadagiti sabali a diosen tapno agservi, ken agrucbab cadacuada, agbalinto a cas iti daytoy a barikes, isu awanen ti capapaayanna.

¹¹ Ta cas ti barikes cumpet cadagiti lomo ti maysa a lalaki, casta ti panangpacapetco caniac iti amin a balay ti Israel ken iti amin a balay ti Juda, cuna ni Jehova; tapno agbalinda coma caniac a maysa nga umili, kenmaysa a nagan, ken maysa a dayaw, ken maysa a dayag; ngem saanda a nangipangag.

¹² Gapuna saoemto cadacuada daytoy a sao: Castoy ti cuna ni Jehova, ti Dios ti Israel, Isu-amin a gorgorita mapnonto iti arac: ket cunaendanto kenca, Saanmi aya nga ammo a pudno nga amin a gorgorita mapnonto iti arac?

¹³ Iti casta cunaemto cadacuada, Castoy ti cuna ni Jehova, Adtoy, punnoecto ti amin nga agnaed ditoy a daga iti panagbartec, dagiti met laeng ar-ari nga agtugaw iti trono ni David, ken dagiti papadi, ken dagiti mammadto, ken amin dagiti agnaed iti Jerusalem.

¹⁴ Ket itupacconto ida ti maysa iti sabali, dagiti met laeng amma agraman cadagiti annac a lallaki, cuna ni Jehova: diacto mangngaasi, wenno mangicanawa, wenno mangisakit, tapno pucawen ida.

¹⁵ Denggenyo, ket timudenyo; dicayo agtangsit, ta ni Jehova nagsao.

¹⁶ Padayawanyo ni Jehova a Diosyo, casangoanan ti panangpasipngetna, ken casangoanan ti pannacaitibcol dagiti sacsacayo iti rabaw dagiti nasipnget a banbantay, ken bayat ti panagsapulyo iti silaw, isu pagbalinenna nga aniniwan ni patay, ket isu aramidenna a napuscol a sipnget.

¹⁷ Ngem no isu dicay denggen, ti cararuac agsangitto a sililimed gapu iti kinatangsityo; ket ti matac agsangitto iti nasaem, ken pagayusanto dagiti lulua, ta ti pangen ni Jehova nacayawan.

¹⁸ Sica cunaem iti ari ken iti reina nga ina, Agpacumbabacayo, agtugawcayo; ta dagiti bonete ti oloyo bimmabada, wen, ti balangat ti dayagyo.

¹⁹ Dagiti il-ili ti Abagatan naripcanda ket awan ti manglucat cadacuada, ti Juda maipanaw a cayaw, isu-amin; naikisap ti pannacaipanawna a cayaw.

²⁰ Itangadmo dagita matam, ket kitaem ida nga aggapu iti amianan: sadino ti yan ti pangen a naited kenca, ti napintas a pangenmo?

²¹ Ania ti cunamto no isaadnanto iti ngatoem no icabilnanto a cas pangulo dagidiay a sica met laeng insurom tapno agbalinda a gagayyemmo? saan aya nga ut-ut ti umapay kenca a cas maysa a babai nga agpasical?

²² Ket no cunaem dita pusom, Apay a dagitoy a banbanag dimtengda caniac? gapu iti kinadackel ti kinadakesmo nalucasan dagiti cainmo, ket dagiti mucodmo aglacamda iti ranggas.

²³ Mabalin aya a ti taga Etiopia suctanna ti cudilna, wenno ti leopardo dagiti labangna? no casta mabalinyo met coma ti agaramid iti naimbag, dacayo a mairuam nga agaramid iti dakes.

²⁴ Gapuna iwarisconto ida a cas ti puon ti garami a maawan babaen ti angin ti let-ang.

²⁵ Daytoy ti gasatmo, ti apag a naituding kenca a naggapu caniac, cuna ni Jehova; agsipud ta linipatannac, ken nagtalecca iti kinaulbod.

²⁶ Gapuna met a lucasacto dagiti cainmo iti sangoanan ti rupam, ket ti bainmo agparangto.

²⁷ Nakitac dagiti kinarimonmo, dagiti met laeng pannakicamalalam, ken dagiti garaigem, ti kinaderrep ti pannakicamalalam, cadagiti turturod ti away. Asica pay, O Jerusalem madica a madalusan; casano pay ti cabayagnanto?