Jeremias 12 - Ti Biblia (1973)

Ti tanabutob ni Jeremias, ken ti sungbat ni Jehova. Ti panangocom ni Jehova iti Juda ken cadagiti cabusorna.

¹ Sica nalintegca, O Jehova, no makisupiatac kenca, nupay casta makicalinteganac coma ti panggep kenca; ania ti gapuna a ti dalan ti nadangkes rumang-ay? ania ti gapuna nga addada a sitatalna dagiti agaramid a sigugulib unay?

² Sica immulam ida, wen, nagramutda; dumackelda, wen, agbungada; asidegca iti ngiwatda, ngem adayuca iti pusoda.

³ Ngem sica, O Jehova, ammonac; sica makitanac, ket suutem toy pusoc nga agpaay kenca; guyodem ida a cas carcarnero a maipaay iti pagpartian ken isaganam ida a maipaay iti aldaw ti pannacaparti.

⁴ Casano ti cabayag ti panagladingit ti daga, ken pannacagango dagiti mulmula iti amin a daga? gapu iti kinadangkes dagidiay nga agnaed kencuana, dagiti an-animal maibusda, ken dagiti tumatayab; agsipud ta kinunada, Isu saannanto a makita ti maud-udi a panungpalantayo.

⁵ No nagtarayca a naicuyog cadagiti lallaki a magmagna, ket binannogdaca, casano ngarud ti pannakisalisalmo cadagiti cabayo? ket nupay no natalgedca iti maysa a daga a natalna, ania ti aramidento iti kinapasindayag ti Jordan?

⁶ Ta dagiti met laeng cacabsatmo, ken ti balay ti amam, isuda met laeng nagaramidda a sigugulib kenca; nagpuccawda met laeng ti napigsa kenca: dica ida patien, uray agsaoda ti nasayaat a sasao kenca.

⁷ Pinanawac ti balayco, imbellengco ti tawidco; intedco dagiti ay-ayaten unay ti cararuac iti ima dagiti cabusorna.

⁸ Ti tawidco nagbalin caniac a cas maysa a leon iti bakir; inyebcasna ti timecna a maicaniwas caniac; gapuna nga isu ginurac.

⁹ Ti tawidco isu caniac aya ti cas maysa a tumatayab a turicturican a managsamsam? dagiti tumatayab a managsamsam bumusorda aya kencuana iti aglicmut? incayo tiptiponenyo amin dagiti an-animal ti away iyegyo ida tapno aglamutda.

¹⁰ Adu a paspastor dinadaelda ti cauvasac, impayatda ti bingayco, ti macaay-ayo a bingayco pinagbalinda a maysa a langalang a let-ang.

¹¹ Isu pinagbalinda a langalang; isu agasug caniac, idinto a langalang; ti amin a daga naaramid a langalang, agsipud ta awan ti tao a mangipapuso.

¹² Dagiti managdadael immayda iti rabaw dagiti amin a nalucasan a panpantoc iti let-ang; ta ti campilan ni Jehova aglamut manipud iti maysa pungto ti daga agingga met laeng iti sabali a pungto ti daga: awan ti lasag nga addaan talna.

¹³ Isuda nagmulada iti trigo, ket nagapitda cadagiti sisiit; pinagrigatda dagiti bagbagida met laeng, ket awan ti nagun-odda: ket mabainancayto maipuon cadagiti bungayo, gapu iti narungsot a pungtot ni Jehova.

¹⁴ Castoy ti cuna ni Jehova a maicaniwas cadagiti amin a dakes a cacaarrubac, a mangtignay iti tawid nga impatawidco iti ilic nga Israel: Adtoy, parutecto ida iti dagada, ket parutecto ti balay ti Juda manipud iti nagtengngaanda.

¹⁵ Ket maaramidto, calpasan ti panangparutco cadacuada, nga agsubliacto ken caasiacto ida, ket iyegconto ida manen, tunggal tao iti tawidna, ken tunggal tao iti dagana.

¹⁶ Ket maaramidto, no sireregtadanto nga adalen dagiti daldalan ti ilic, nga isapatada gapu iti naganco, Cas sibibiag ni Jehova; cas met laeng iti panangisuroda iti ilic nga agsapata gapu ken Baal; iti casta mabangondanto iti tengnga ti ilic.

¹⁷ Ngem no didanto mangipangag, iti casta parutecto dayta a nacion, isu parutec ken dadaelec, cuna ni Jehova.