Jeremias 11 - Ti Biblia (1973)

Ti panangsalungasing ni Juda iti tulag ti Dios matubngar, ket ti dusa maipadto. Maysa a gandat a maibusor ken Jeremias.

¹ Ti sao a dimteng ken Jeremias a naggapu ken Jehova, a kinunana,

² Denggenyo dagiti sasao daytoy a tulag, ket saoenyo cadagiti lallaki ti Juda, ken cadagiti agnaed iti Jerusalem;

³ Ket cunaem cadacuada, Castoy ti cuna ni Jehova, ti Dios ti Israel: Mailunod coma ti tao a saan a mangipangag cadagiti sasao daytoy a tulag,

⁴ Nga imbilinco cadagiti ammayo idi aldaw nga inaonco ida iti daga ti Egipto, iti ruar ti landoc a horno, a kinunac, Tungpalenyo ti timecco, ket aramidenyo ida, cas mainugot cadagiti amin nga ibilinco cadacayo; iti casta dacayto ti ilic, ket siacto ti Diosyo;

⁵ Tapno patibkerec ti sapata, nga insapatac cadagiti ammayo, nga iccac ida iti daga a pagayayusan ti gatas ken diro, cas iti daytoy nga aldaw. Idin simmungbatac, ket kinunac, Sapay coma ta casta, O Jehova.

⁶ Ket ni Jehova kinunana caniac, Iwarragawagmo amin dagitoy a sao cadagiti il-ili ti Juda, ken cadagiti lanlansangan ti Jerusalem, a cunam, Denggenyo dagiti sasao daytoy a tulag, ket aramidenyo ida.

⁷ Ta simmuppiatac a siaanep cadagiti ammayo idi aldaw nga inaonco ida iti daga ti Egipto, agingga met laeng iti daytoy nga aldaw, a bimmangonac a nasapa ket simmuppiatac, a kinunac, Tungpalenyo ti timecco.

⁸ Ngem saanda a nagtungpal, dida met inyallingag ti lapayagda, no di ket nagnada tunggal maysa iti kinabangad ti dakes a pusoda: gapuna nga inyegco cadacuada amin dagiti sasao daytoy a tulag, isu nga imbilinco cadacuada nga aramiden, ngem saanda ida nga inaramid.

⁹ Ket ni Jehova kinunana caniac, maysa a yaalsa ti nasaracan iti nagtengngaan dagiti lallaki ti Juda, ken cadagiti agnaed iti Jerusalem.

¹⁰ Nagsublida cadagiti kinadakes dagiti appoda a lallacay, isuda a nagmadi a dumngeg cadagiti sasaoc; ket simmurotda cadagiti sabali a diosen nga agservi cadacuada: ti balay ti Israel ken ti balay ti Juda dinadaelda ti tulagco isu nga inaramidco cadagiti ammada.

¹¹ Gapuna castoy ti cuna ni Jehova, Adtoy, iyegconto ti dakes cadacuada, isu a saandanto a maliclican; ket umawagdanto caniac, ngem diacto ipangag ida.

¹² Iti casta dagiti il-ili ti Juda ken dagiti agnaed iti Jerusalem mapandanto nga umawag cadagiti didiosen isuda a pangidatonanda iti incienso: ngem didanto ida isalacan a pulos iti pannawen ti rigatda.

¹³ Ta cas mayalubog iti dagup dagiti il-ilim adda dagiti didiosmo, O Juda; ken cas mainugot iti dagup dagiti lanlansangan ti Jerusalem, impatacderyo dagiti al-altar iti nacababain a banag, dagiti met laeng alaltar a pagpuuran iti incienso a maipaay ken Baal.

¹⁴ Gapuna saanmo nga idawatan daytoy nga ili, dica met umasug wenno agcararag a maipaay cadacuada; ta saanconto a timuden ida intono umawagda caniac, a gapu iti pacarigatanda.

¹⁵ Ania ti bibiang ti ay-ayatec iti balayco, idinto nga isu nagaramid iti kinaderrep cadagiti adu, ken ti nasantoan a lasag napucaw kenca? intono agaramidca iti dakes, isu ti panagragsacmo.

¹⁶ Ni Jehova ingaladna ti naganmo, Maysa a nalasbang a cayo nga olivo, naimnas agraman nasayaat a bunga: ngem babaen ti daranudor ti dackel a gulogulo pinasgedanna ti apuy iti rabawna, ken dagiti sangana natuccolda.

¹⁷ Ta ni Jehova dagiti buybuyot, a nangimula kenca, imbalicasna ti dakes a maibusor kenca, a gapu iti kinadakes iti balay ti Israel ken iti balay ti Juda, isu a nagaramidda a maipaay cadacuada met laeng iti pananggargari caniac nga agpungtot iti panangidatonda iti incienso ken Baal.

¹⁸ Ket ni Jehova impacaammona caniac daytoy, ket isu naamammoc: idin imparangmo caniac dagiti gapuananda.

¹⁹ Ngem caslaac idi maysa a naamo a cordero a maiturong iti pagpartian; ket diac naammoan nga isuda insicatda dagiti panagem a maibusor caniac, a kinunada, Dadaelentayo coma ti cayo agraman ti bungana, ket isu keltayentayo iti daga dagiti nabiag, tapno ti naganna saanen a malagip.

²⁰ Ngem, O Jehova dagiti buybuyot, a mangocom a sililinteg, a mangsuut iti puso ken ti isip, makitacto ti pammalesmo cadacuada; ta kenca impacaammoc ti banagco.

²¹ Gapuna castoy ti cuna ni Jehova a maipanggep cadagiti lallaki ti Anatot, a sumapul dita biagmo, a cunada, Saancanto nga agipadto iti nagan ni Jehova, tapno saanca a matay babaen iti imami;

²² Gapuna castoy ti cuna ni Jehova dagiti buybuyot, Adtoy, dusaecto ida: dagiti agtutubo a lallaki mataydanto iti campilan; dagiti annacda a lallaki ken babbai mataydanto iti bisin;

²³ Ket awanto ti matda cadacuada: ta iyegconto ti dakes cadagiti lallaki ti Anatot, iti tawen a panangsarungcarco cadacuada.