Jeremias 10 - Ti Biblia (1973)

Ti pannacaidaduma dagiti barengbareng a didios ken Jehova. Ti pannacasaplit a kinalangalang ken ti panagdawat iti asi.

¹ Denggenyo ti sao a saoen ni Jehova cadacayo, O balay ti Israel;

² Castoy ti cuna ni Jehova, Saanyo nga adalen ti dalan dagiti nacion, ket dicayo agcullayaw cadagiti pagilasinan iti langit; ta dagiti nacion agcullayawda gapu cadacuada.

³ Ta dagiti cadcadawyan dagiti il-ili barengbarengda; ta adda mangpucan ti maysa a cayo iti bakir, gapuanan dagiti im-ima ti agwaswasay a lalaki.

⁴ Isu arcosanda iti balitoc ken pirac; isu ipacapetda cadagiti lanlansa babaen ti martillo, tapno isu saan nga aggaraw.

⁵ Isu cas maysa a cayo ti palma a naturno, ket saan nga agsao: masapul a maawitda ta saanda a macapagna. Dicayo agbuteng cadacuada; ta saanda a macaaramid ti dakes, awan met cadacuada ti macaaramid ti naimbag.

⁶ Awan ti siasinoman a cas kenca, O Jehova; sica dackelca, ket ti naganmo dackel ti pannacabalinna.

⁷ Siasino ti saan nga agbuteng kenca, O Ari dagiti nasnacion? ta kenca maiparbeng daytoy; agsipud ta cadagiti amin a mamasirib cadagiti nasnacion, ken cadagiti amin a naarian a casasaadda, awan ti siasinoman a cas kenca.

⁸ Ngem isuda amin nacunengda ken maagda; ti pannursuro dagiti didios maysa laeng a puon ti cayo.

⁹ Adda pirac a napitpit a napaingpis isu a naiyeg manipud Tarsis, ken balitoc manipud Ufas, gapuanan ti mammaday ken dagiti im-ima ti agpanpanday ti balitoc; azul ken purpura ti cawesda; isuda amin aramid ida dagiti lallaki a nalaing.

¹⁰ Ngem ni Jehova isu ti pudno a Dios; isu ti sibibiag a Dios, ken agnanayon nga Ari; gapu iti pungtotna ti daga agkintayeg, ket dagiti nasnacion saanda a maibturan ti ungetna.

¹¹ Daytoy ti saoenyonto cadacuada, dagiti didios a dida inaramid ti langlangit ken ti daga, dagitoy mapucawdanto ditoy daga ken iti baba dagiti langlangit.

¹² Inaramidna ti daga babaen ti pannacabalinna, imbangonna ti lubong babaen ti siribna, ken gapu iti pannacaawatna inyucradna dagiti langlangit.

¹³ No isu agtimec, agkibur dagiti dandanum cadagiti langlangit, ket paulienna dagiti alingasaw manipud cadagiti pungto ti daga; isu aramidenna dagiti kimkimat iti tudo, ket paruarenna dagiti anginna cadagiti pagidulinanna.

¹⁴ Tunggal lalaki nagbalin a nacuneng ken awan pannacaammona; tunggal agpanpanday iti balitoc maibabain gapu iti kinitikitanna a ladawan; ta ti sinucogna a ladawan isu ti ulbod, ket awan ti anges cadacuada.

¹⁵ Barengbarengda, aramid nga allilaw: iti pannawen a pannacasarungcarda mapucawdanto.

¹⁶ Ti bingay ni Jacob saan a cas cadagidiay; ta isu binukelna dagiti amin a banbanag; ket ni Israel ti caputotan ti tawidna: Jehova dagiti buybuyot ti naganna.

¹⁷ Ornongenyo dagiti gargaretyo nga iruar iti dagayo, O sica nga agtaeng iti pannacalacub.

¹⁸ Ta castoy ti cuna ni Jehova, Adtoy, ipallatibungconto dagiti agnaed ti daga iti daytoy a pannawen, ket paglidayecto ida, tapno maricnada.

¹⁹ Asiac pay gapu iti dunorco! ti sugatco naut-ut: ngem kinunac, Pudno a daytoy ti leddaangco, ket isu ti rebbengco nga itured.

²⁰ Ti toldac nadadael, ket amin dagiti singdanco napugsatda: dagiti annacco pinanawandac, ket awandan: awanen ti mangyucrad iti toldac, ken mangicabil cadagiti bengbengco.

²¹ Ta dagiti paspastor nagbalinda a nacuneng, ket saanda nga immuman ken Jehova: gapuna a saanda a rimmang-ay, ket amin dagiti pangpangenda naiwarisda.

²² Ti timec ti damdamag, adtoy, nga umay, ket maysa a dackel a riribuc nga aggapu iti makinamianan a daga, tapno pagbalinenna dagiti il-ili ti Juda a langalang, rukib dagiti aso ti let-ang.

²³ O Jehova, ammoc a ti dalan ti tao saan nga agtaud kencuana met laeng; saan nga agtaud iti tao a magna ti panangiturong cadagiti addangna.

²⁴ O Jehova, dusaennac, ngem iti natimbeng; saan a ti ungetmo di la ket ta paawanennac.

²⁵ Ibuyatmo ti pungtotmo cadagiti nacion a di macaamo kenca, ken cadagiti familia a di umawag iti naganmo; ta inalun-onda ni Jacob, wen, isu inalun-onda ken inibusda, ket rinacracda ti pagtaenganna.