Jeremias 1 - Ti Biblia (1973)

Pacaawisan ken dagiti immuna a sirmata daytoy mammadto.

¹ Dagiti sasao ni Jeremias, nga anac ni Helcias, cadagiti papadi nga addada idi idiay Anatot iti daga ti Benjamin:

² A kencuana dimteng ti sao ni Jehova cadagidi al-aldaw ni Josias, nga anac ni Amon, ari ti Juda, idi tawen a maicasangapulo ket tallo a panagturayna.

³ Casta met a dimteng cadagidi al-aldaw ni Joakim, anac ni Josias, nga ari ti Juda, agingga iti camaudianan ti tawen a maicasangapulo ket maysa ni Sedekias, anac ni Josias, nga ari ti Juda, agtungpal idi pannacacayaw ti Jerusalem idi bulan a maicalima.

⁴ Dimteng ngarud ti sao ni Jehova caniac, a kinunana,

⁵ Casacbayan ti panangbukelco kenca iti tian nabigbigancan, ket idi casangoanan ti pannacaipasngaymo sinantificarca; tinudinganca a mammadto cadagiti nasnacion.

⁶ Iti casta kinunac, O, Apo Jehova! Adtoy, saanco nga ammo ti agsao; ta ubingac.

⁷ Ngem ni Jehova kinunana caniac, Saanmo a saoen, Siac ubingac; ta amin cadagiti pangibaonacto kenca incanto, ket saritaemto amin nga ibilinconto kenca.

⁸ Saanca nga agbuteng iti saclang dagidiay; ta addaac kenca tapno isalacanca, cuna ni Jehova.

⁹ Idin ni Jehova inyunnatna ti imana ket sinagidna ti ngiwatco; ket ni Jehova sinaona caniac: Adtoy, incabilco dagiti sasaoc dita ngiwatmo:

¹⁰ Kitaem, ta insaadca iti daytoy nga aldaw cadagiti nasnacion ken cadagiti pagpagarian, a mangparut ken mangrebba a mangdadael ken mangparmec, a mangbangon ken mangimula.

¹¹ Ket dimteng manen caniac, ti sao ni Jehova, a kinunana, Ania ti makitam, Jeremias? Ket kinunac, Makitac ti maysa a sanga ti almendro.

¹² Idin sinao caniac ni Jehova, Nakitam a nalaing: ta siac salucagac toy saoc tapno aramidec.

¹³ Ket ti sao ni Jehova dimteng caniac ti maicadua a daras, a kinunana, Ania ti makitam? Ket kinunac, Makitac ti maysa a caldero a bumurburec; ket iti ngiwatna aggapu iti amianan.

¹⁴ Idin kinuna caniac ni Jehova, Manipud iti amianan ti dakes agsacnapto cadagiti isu-amin nga agnaed iti daga.

¹⁵ Ta adtoy, mangayabacto cadagiti isu-amin a familia dagiti pagpagarian ti amianan, cuna ni Jehova; ket umaydanto, ket tunggal maysa icabilnanto ti tronona iti pagsercan cadagiti ruangan ti Jerusalem, ket maibusor cadagiti bacudna nga aglicmut, ken maibusorto cadagiti isu-amin nga il-ili ti Juda.

¹⁶ Ket ibatadconto ti panangocomco cadacuada maipapan iti amin a kinadakesda agsipud ta naglicudandac, ken nagpuurda iti incienso cadagiti didios a sabali, ken nagcararagda cadagiti ar-aramid dagiti imada met laeng.

¹⁷ Sica ngarud baricsam dagita lomom, ket tumacderca, ket isaom cadacuada dagiti isu-amin nga ibilinco kenca: saanca nga agcullayaw cadacuada, di la ket ta upayenca iti saclangda.

¹⁸ Ta adtoy, impasdecca iti daytoy nga aldaw a cas la ciudad a nasarikedkedan, ken cas la adigi a landoc, ken cas la bacud a gambang a maibusor iti isu-amin a daga, a maibusor cadagiti ar-ari ti Juda, a maibusor cadagiti principena, a maibusor cadagiti papadina, ken maibusor cadagiti tattao ti daga.

¹⁹ Ket makibacaldanto kenca; ngem saandacanto nga atiwen; ta siac addaac kenca, tapno isalacanca, cuna ni Jehova.