Isaias 9 - Ti Biblia (1973)

Ti lawag ken rag-o idiay Galilea. Ti pannacayanac ken panagari ti Principe ti Cappia. Ti pungtot ti Dios maipapan ti cuspag ken kinadangkes ti Israel.

¹ Ngem awanton ti kinacudrep iti daydiay naaddaan idi iti ladingit. Idi unana a tiempo inyegna ti pannacauyuyaw iti daga ni Zabulon, iti daga ni Neftali; ngem idi naududi a tiempo inaramidna a nadayag, babaen iti dalan ti baybay, iti labes ti Jordan, Galilea dagiti nasnacion.

² Ti umili a nagnagna iti casipngetan nacakita iti maysa a dackel a lawag; dagiti nagtaeng iti daga ti aniniwan ni patay, naglawag ti silaw cadacuada.

³ Sica pinaadum ti nacion, sica pinadackelmo ti ragsacda; agragsacda iti sangoanam a cas iti ragsac ti panagapit, a cas iti ragsac dagiti tattao no bingayenda ti sinamsam.

⁴ Ta ti sangol ti awitna, ken ti sarucod ti abagana, ken ti pang-or ti mamarigat kencuana, binungtolmo a cas idi aldaw ti Madian.

⁵ Ta isu-amin a cabal ti tao a naigaman iti pannacariribuc, ken dagiti cawcawes a nayagsep iti dara, maipaayto iti pannacapuor, maipaay a sungrod ti apuy.

⁶ Ta nayanac ti maysa nga ubing cadatayo, maysa nga anac a lalaki ti naited cadatayo; ket ti panangituray maiparabawto iti abagana: ket ti naganna magaladanto iti Nacascasdaaw, Mamagbaga, Mannacabalin a Dios, Agnanayon nga Ama, Principe ti Cappia.

⁷ Ti idadackel ti panangiturayna ken ti cappia awanto ti inggana, iti trono ni David, ken iti pagarianna, tapno bangonenna, ken salimetmetanna babaen iti kinajusticia ken kinalinteg manipud ita ken iti agnanayon. Ti regta ni Jehova dagiti buybuyot ti mangaramidto iti daytoy.

⁸ Ti Apo nangipawit ti sao ken Jacob, ket isu ti nagdisso iti Israel.

⁹ Ket isu-amin nga umili maammoannanto, uray pay ti Efraim ken ti agnaed ti Samaria, nga agcuna a sitatangsit ken sisusukir ti pusoda,

¹⁰ Dagiti ladrillo narbada, ngem mangpatacdercaminto nga aramatenmi ti tinicapan a bato, dagiti sicomoro napucanda ngem suctanminto ida iti cantingen.

¹¹ Gapuna a ni Jehova ipangatonanto dagiti cabusor ni Rezin a maibusor kencuana, ket tignayennanto dagiti cabusorna,

¹² Dagiti Sirios iti sangoanan, ken dagiti Filisteos iti licudan; ket alun-unendanto ti Israel iti nacanganga a ngiwat. Ta gapu amin daytoy ti pungtotna di pay pimmanaw, no di ket ti imana silalayat pay laeng.

¹³ Nupay casta dagiti tattao dida simmango iti daydiay kimmabil cadacuada, ket dida met sinapol ni Jehova dagiti buybuyot.

¹⁴ Gapuna ni Jehova putdennanto iti Israel ti olo ken ipus, ti sanga ti palma ken ti badobadoc, iti maysa nga aldaw.

¹⁵ Ti panglacayen ken ti natacneng a tao, isu ti olo; ket ti mammadto a mangisuro cadagiti ululbod, isu ti ipus.

¹⁶ Ta isuda a mangidalan iti daytoy nga umili pagbiddutenda ida; ket dagidiay a maidalan cadacuada madadaelda.

¹⁷ Gapuna a ti Apo saannanto a pagragsacan dagiti agtutubuda a tattao, ket dinto sumnec ti asina cadagiti ululilada ken babbaloda a babbai; ta tunggal maysa managtabbaaw, ket managdacdakesda, ken tunggal ngiwat agsao iti kinamaag. Ta gapu amin daytoy ti pungtotna di pay naiccat, no di ket ti imana adda a silalayat pay laeng.

¹⁸ Ta ti kinadakes manguram a cas la apuy, alun-unenna dagiti cascasumba ken calcalunay; wen, pasgedanna ti casamecan ti bakir, ket maipangatoda iti maysa a monmon nga asuc.

¹⁹ Gapu iti pungtot ni Jehova dagiti buybuyot macset ti daga; ket dagiti tattao isuda ti cas la pagsungrod iti apuy: awan ti tao a mangigaga iti cabsatna.

²⁰ Ti maysa agrabsutto iti imana a macanawan, ket mabisinanto; ket manganto iti imana a catigid, ket didanto mabsog: tunggal maysa a tao canennanto ti lasag ti tackiagna met laeng.

²¹ Ti Manases iti Efraim; ket ti Efraim iti Manases; ket isuda agtipondanto a bumusor iti Juda. Ta gapu amin daytoy ti pungtotna saan a pimmanaw, no di ket ti imana adda a silalayat pay laeng.