Isaias 8 - Ti Biblia (1973)

Ti anac ni Isaias ken ti panangsillong ti Asiria. Ni Jehova coma ti pagbutnganda a saan a cadagiti cabcabusor. Ti pannacacondenar ti yuuman cadagiti mangcuculam.

¹ Ket kinuna ni Jehova caniac, Mangalaca iti dackel a tapi, ket suratam iti rabawna iti pluma ti tao, Agpaay ken Maher-salal-hash-baz;

² Ket mangicuyogac cadagiti matalec a sacsi a mangipalagip, isuda Urias a padi, ken Zacarias nga anac a lalaki ni Jeberekias.

³ Ket napanac ken mammadto a babai, ket isu nagsicug, ken nangipasngay iti maysa a lalaki. Sa kinuna ni Jehova caniac, Panaganam iti nagan a Maher-salal-hash-baz.

⁴ Ta intono di pay ammo ti ubing ti agbalicas ti, Amac, ken Inac; ti kinabacnang ti Damasco ken ti nasamsam iti Samaria maipandanto iti sangoanan ti ari ti Asiria.

⁵ Ket ni Jehova nagsao pay caniac manen, a kinunana,

⁶ Agsipud ta inwacsi daytoy nga umili dagiti dandanum ti Siloe nga agayusda a sitatalna, ket agragsac cada Rezin ken iti anac a lalaki ni Remalias:

⁷ Ita ngarud, adtoy, ti Apo pasalpaenna cadacuada dagiti dandanum ti Carayan, a napigsa ken adu, a ti met laeng ari ti Asiria ken isu-amin a dayagna: ket isu sumalpanto cadagiti isu-amin a pagayusanna, ken agayus cadagiti isu-amin nga igigidna;

⁸ Ket isu agayusto agingga iti Juda; manglayusto ken aglasatto; isu dumanonto agingga iti tengnged met laeng; ket ti panangyucradna cadagiti payacna sacnapannanto ti caacaba ti dagam, O Emmanuel.

⁹ Agariwawacayo, O dacayo nga inilin-ili, ket maburburaccayo; ket timudenyo, dacayo amin a taga adayu a dagdaga: agbarikescayo, ket maburburaccayo; agbarikescayo, ket maburburaccayo.

¹⁰ Agpipinnatigmaancayo, ket awanto ti capapaayanna; balicsenyo ti sao, ket dinto mataginayon: ta ti Dios adda cadacami.

¹¹ Ta ni Jehova casta ti insaona caniac a binuyogan ti napigsa nga imana, ken binilinnac a diac magmagna iti dalan daytoy nga umili, a kinunana,

¹² Dicayo saoen, Maysa a yaalsa, a maipapan iti amin a sawento daytoy nga umili, Maysa a yaalsa; dicayo met umamac iti panagamacda, dicayo met agbuteng.

¹³ Ni Jehova dagiti buybuyot, isu ti santificarenyonto; ken isu coma ti caamacyo, ken isu coma ti cabutengyo.

¹⁴ Ket isunto ti maipaay a santuario; ngem cadagiti dua a balbalay ti Israel maipaay a cas maysa a bato a pacaitibcolan, ken dackel a bato a pacarurodan, a maipaay a saltoc ken silo cadagiti agtaeng sadi Jerusalem.

¹⁵ Ket adunto ti maitibcol cadagidiay, ket maiticlebda, ken mablodanto, masiloandanto, ket matiliwdanto.

¹⁶ Reppetem ti pammanecnec, sello-am ti linteg cadagiti adalac.

¹⁷ Ket urayecto ni Jehova, nga ilingedna ti rupana iti balay ni Jacob, ket agsapulacto kencuana.

¹⁸ Adtoy, siac ken dagiti ubbing nga ited caniac ni Jehova maipaayda a pagilasinan ken datdatlag idiay Israel a naggapu ken Jehova dagiti buybuyot, isu nga agtaeng idiay bantay Sion.

¹⁹ Ket intono saoenda cadacayo, Umumancayo cadagiti baglan, ken cadagiti mammuyon, nga agarasaas ken agtanabutob: saan aya a rebbeng coma dagiti umili nga umumanda iti Diosda? gapu cadagiti sibibiag umumanda aya cadagiti natay?

²⁰ Iti linteg ken pammanecnec! no dida agsao a cas mayannurot itoy a sao, saan a pagduaduaan nga awan ti bigat a maipaay cadacuada.

²¹ Ket aglasatdanto, iti nacaro a sennaay ken panagbisin; ket maaramidto nga, intono mabisindan, agalimutengdanto, ken agilunoddanto a gapu iti arida ken iti Diosda, ken tumangadda:

²² Ket cumitadanto iti daga, ket, adtoy, rigat ken sipnget, kinacudrep ti ladingit; ket mayabogdanto iti napuscol a sipnget.