Isaias 7 - Ti Biblia (1973)

Da Rezin ken Peca gumubatda a maibusor iti Jerusalem. Ti ipadamag ni Isaias ken Acaz. Ti ubing nga Emmanuel. Ti pannacadadael ti Juda.

¹ Ket naaramid cadagidi aldaw ni Acaz nga anac ni Jotham, nga anac ni Uzias nga ari ti Juda, a ni Rezin nga ari ti Siria, ken ni Peca nga anac ni Remalias, nga ari ti Israel, simmang-atda idiay Jerusalem a manggubat kencuana, ngem dida nabalin ti nagballigi a maibusor kencuana.

² Ket naipacaammo iti balay ni David, a nacuna, Ti Siria nakisingalut iti Efraim. Ket ti pusona nagkintayeg, ken ti puso dagiti tattaona, a cas cadagiti caycayo iti bakir magongonda a gapu iti angin.

³ Idin kinuna ni Jehova ken Isaias, Inca ita a sumabet ken Acaz, sica, ken ni Searjasub nga anacmo, iti pungto ti calasugan ti nangatngato a tangke, iti dalan iti tay-ac ti agdaldalus iti lupot;

⁴ Ket cunaem kencuana, Agaluadca, ken agtalnaca; dica agbuteng ket dica met ipalubos a maupay ta pusom, a gapu cadagitoy dua a ngudo ti aluten nga umasasuc, a gapu iti narungsot a pungtot ni Rezin ken ti Siria, ken ti anac ni Remalias.

⁵ Agsipud ta ti Siria, ti Efraim ken ti anac ni Remalias nagpanggepda iti dakes a maibusor kenca, a cunaenda,

⁶ Sumang-attayo a maibusor iti Juda, ket isu ti riribukentayo, ket gutbawantayo sadiay a maipaay cadatayo, ken mangisaadtayo iti ari iti nagtengngaanna, uray ti anac ni Tabeel;

⁷ Castoy ti cuna ni Apo Jehova, Isu saanto nga agtaeng, ket dinto met maaramid.

⁸ Ta ti olo ti Siria isu ti Damasco, ket ti olo ti Damasco isu ni Rezin; ket iti bayat dagitoy innem a pulo ket lima a tawen maburacto ti Efraim, iti casta isu saanton nga ili:

⁹ Ket ti olo ti Efraim isu ti Samaria, ket ti olo ti Samaria isu ti anac ni Remalias. No saancayo a mamati, pudno a dicayto mataginayon.

¹⁰ Ket ni Jehova nakisao manen ken ni Acaz, a kinunana,

¹¹ Agkiddawca iti maysa a pagilasinan ken Jehova a Diosmo; uray ti kiddawem iti caadalman, wenno iti cangatoan sadi ngato.

¹² Ngem ni Acaz kinunana, Diacto agkiddaw, ket diacto met suuten ni Jehova.

¹³ Ket kinunana, Denggenyo ita, O balay ni David: Bassit laeng aya a banag cadacayo ti panangrengrengyo cadagiti tattao, a rengrengenyonto pay met ti Diosco?

¹⁴ Gapuna a ti Apo met laeng iccannacayonto iti maysa a pagilasinan: adtoy, a maysa a virgen agsicogto, ken mangipasngayto iti maysa nga anac a lalaki, ket maigaladto iti naganna nga Emmanuel.

¹⁵ Mantequilla ken diro ti canennanto, intono ammona a paiden ti dakes, ken pilien ti naimbag.

¹⁶ Ta intono di pay ammo ti ubing a paiden ti dakes, ken pilien ti naimbag, ti daga a dagiti dua nga arina caguram mabaybay-anto.

¹⁷ Ni Jehova yegnanto kenca, ken iti ilim, ken iti balay ni amam, dagiti al-aldaw a dida pay immay, nanipud idi aldaw nga ipapanaw ti Efraim iti Juda uray pay ti ari ti Asiria.

¹⁸ Ket maaramidto iti dayta nga aldaw, a ni Jehova sultipannanto ti ngilaw nga adda iti caadayuan a paset dagiti carayan ti Egipto, ken ti uyocan nga adda iti daga ti Asiria.

¹⁹ Ket umaydanto, ket agtaengdanto amin cadagiti nalangalang a loblobong, ken cadagiti rengrengngat dagiti batbato, ken iti rabaw ti amin a caremmengan, ken iti rabaw ti amin a pagpaaraban.

²⁰ Iti dayta nga aldaw ti Apo kiskisannanto nga aramatenna ti pangiskis nga inupaan cadagiti disso a labes ti Carayan, ti met laeng, ari ti Asiria, ti olo ken muldot dagiti sacsaca; ket ikisapnanto met ti iming.

²¹ Ket maaramidto iti dayta nga aldaw, a ti maysa a tao mangtarakento iti maysa a vaca a danawan, ken dua a carnero;

²² Ket maaramidto a gapu iti kinawadwad ti gatas a pataudendanto manganto iti mantequilla: ta mantequilla ken diro ti canento ti tunggal maysa a mabati iti tengnga ti daga.

²³ Ket maaramidto iti dayta nga aldaw, a tunggal disso, a yan idi ti sangaribu nga uvas nga agpateg iti sangaribu a capisi a pirac, maipaayto cadagiti cascasumba ken calcalunay.

²⁴ Umayto ti maysa iti dayta a disso a mangicuyog cadagiti pana ken ba-i, agsipud ta amin a daga addanto dagiti cascasumba ken calcalunay.

²⁵ Ket isu-amin a turturod a nacali iti gabion, dicanto umay dita a disso a gapu iti buteng cadagiti cascasumba ken calcalunay; ngem daydiay maipaayto a pagpaipanan cadagiti vacvaca, ken pagpayatpayatan dagiti carcarnero.