Isaias 66 - Ti Biblia (1973)

Dagiti panangocom ni Jehova, ken idadackel ti Sion.

¹ Castoy ti cuna ni Jehova, Ti langit isu ti tronoc, ket ti daga isu ti pagbatayan dagiti sacsacac: ania a kita ti balay ti bangonenyonto a maipaay caniac? ken anianto a disso ti paginanaac?

² Ta amin dagitoy a banbanag inaramid ti imac, ket iti casta addada amin dagitoy a banbanag, cuna ni Jehova: ngem itoy a tao imatangacto, daydiay met laeng nga isu napanglaw ken napagbabawi nga espiritu, ken daydiay nga agkintayeg iti saoc.

³ Daydiay a mangpatay iti maysa a vaca isu ti cas la iti mangpatay iti maysa a tao; daydiay a mangidaton iti maysa a cordero, cas la iti mangbungtol iti tengnged ti aso; daydiay nga agidaton iti daton, cas la iti agidaton ti dara ti babuy; daydiay nga agpuur iti incienso, cas la iti mangbendicion iti maysa a diosen a ladawan. Wen, isuda pinilida dagiti daldalanda met laeng, ket ti cararuada agragsac cadagiti kinarimonda:

⁴ Siac met piliecto ti pacaallilawanda ken yegconto ti pagbutnganda; agsipud ta idi immayabac, awan ti simmungbat; idi nagsaoac, dida impangag; no di ket inaramidda daydiay a dakes cadagiti matac ken pinilida ti saan a macaparagsac caniac.

⁵ Denggenyo ti sao ni Jehova, dacayo nga agkintayeg iti saona: Dagiti cacabsatyo a gumura cadacayo, dagidiay mangipuruac cadacayo gapu iti naganco, kinunada, Madaydayaw coma ni Jehova, tapno makitami coma iti rag-oyo: ngem isuda mabainandanto.

⁶ Adda timec ti gulogulo nga aggapu iti ili, timec nga aggapu iti templo, timec ni Jehova a mangted ti supapac cadagiti cabusorna.

⁷ Iti sacbay ti panagpasicalna, nagpasngay; iti sacbay ti yaay ti tuocna, nangipasngay iti anac a lalaki.

⁸ Asino ti nacangngeg iti casta a banag? asino ti nacakita cadagiti cacasta a banbanag? Maipasngayto aya ti maysa a daga iti maymaysa nga aldaw? maipasngayto aya ti maysa a nacion iti apagdaricmat? ta apaman a ti Sion nagpasical, isu impasngayna dagiti annacna?

⁹ Idatengconto aya iti panagpasngay, ket diacto pagpasngayen? cuna ni Jehova: siac a mangpapasngay punitacto aya ti aanacan? cuna ti Diosmo.

¹⁰ Makipagrag-ocayo iti Jerusalem, ket agragsaccayo iti maipaay kencuana, dacayo amin nga agayat kencuana: Makipagrag-ocayo kencuana a gapu iti ragsac, dacayo amin nga agdung-aw iti maipapan kencuana;

¹¹ Tapno susuoenyo coma ken mapneccayo cadagiti barucong ti panangliwliwana: tapno magatasyo coma, ken agrag-ocayo iti kinawadwad ti dayagna.

¹² Ta castoy ti cuna ni Jehova, Adtoy, isacnapconto ti talna kencuana a cas iti carayan, ken ti dayag dagiti nasnacion a cas iti aglablabiang nga ayus: ket dacayo sumusopcayto kencuana; maubbacayto iti rabaw ti bacrang, ken marayawcayto iti rabaw dagiti tumeng.

¹³ Cas iti maysa a liwliwaen ni inana, castanto ti panangliwliwac cadacayo; ket maliwliwacayto idiay Jerusalem.

¹⁴ Ket dacayo makitayonto, ket ta pusoyo agragsacto, ken dagita tultulangyo rumusingdanto a cas iti root a naganus: ket ti ima ni Jehova maammoanto a maipaay cadagiti adipenna; ket isu addaanto iti pungtot a maibusor cadagiti cabusorna.

¹⁵ Ta, adtoy, ni Jehova umayto a siaapuy, ket dagiti luganna casdanto la alawig; tapno ipaayna ti pungtotna a sirurungsot, ken ti panangtubngarna a buyogen dagiti darang ti apuy.

¹⁶ Ta babaen ti apuy ni Jehova tungpalennanto ti panangocom, ken babaen ti campilanna, agpaay iti amin a lasag; ket ti papatayen ni Jehova adudanto.

¹⁷ Dagiti agsantificar ken aggugor iti bagida met laeng a mapan cadagiti minuyongan, iti licudan ti maysa iti tengnga, a mangan iti lasag ti babuy, ken ti kinarimon, ken ti marabutit, isuda mapucawdanto a sangsangcatonos, cuna ni Jehova.

¹⁸ Ta ammoc dagiti ar-aramidda ken dagiti pampanunotda: umayen ti panawen a panangornongco iti amin a nacion ken pagsasao; ket umaydanto, ken makitadanto ti dayagco.

¹⁹ Ket mangisaadacto iti pagilasinan iti tengngada, ket ibaonconto dagidiay a macatalaw cadacuada cadagiti nasnacion, agingga iti Tarsis, iti Pul, ken iti Lud, nga agibiat iti ba-i agingga iti Tubal ken iti Javan, cadagiti purpuro nga adayu, a di nacangngeg iti damagco, dida met nakita ti dayagco; ket ipacdaardanto ti dayagco cadagiti nasnacion.

²⁰ Isuda yegdanto amin dagiti cacabsatyo nga igapu cadagiti amin a nasnacion cas sagut ken ni Jehova, nga ipasacayda cadagiti cabcabayo, ken cadagiti luglugan, ken cadagiti duyduyan, ken cadagiti mulo ken cadagiti dromedarios, agingga iti bantayco a nasantoan a Jerusalem, cuna ni Jehova, a cas iti panangyeg dagiti annac ti Israel iti sagutda iti nasin-aw nga alicamen iti uneg ti balay ni Jehova.

²¹ Ket cadagidiay met mangalaacto ti agpaay a padi ken ti agpaay a Levitas, cuna ni Jehova.

²² Ta cas cadagiti babbaro a langlangit ken baro a daga, nga aramidecto, agtalinaeddanto iti saclangco, cuna ni Jehova, castanto ti panagtalinaed dagiti putotyo ken naganyo.

²³ Ket maaramidto, a manipud iti maysa a lutuad agingga iti sabali, ket manipud iti maysa nga aldaw a panaginana agingga iti sabali, amin a lasag umayto agcararag iti sangoanac, cuna ni Jehova.

²⁴ Ket isuda rumuardanto, ket cumitadanto cadagiti bangcay dagiti tattao a naglabsing a maicaniwas caniac; ta ti iggesda dinto matay, uray ti apuyda dinto maiddep; ket isudanto ti maysa a macarurud cadagiti amin a lasag.