Isaias 65 - Ti Biblia (1973)

Ti pannacadusa mailayat cadagiti nasukir. Dagiti baro a langlangit ken baro a daga.

¹ Mabirucac cadagiti saan a nagsaludsod caniac; nasaracannac cadagidiay a saan a nagsapul caniac: Adtoyac, adtoyac, kinunac iti maysa a nacion a saan a nanagan iti naganco.

² Inyunnatco dagiti im-imac iti nagmalmalem iti immalsa nga ili, a magna iti dalan a saan a naimbag, a mayannurot cadagiti pampanunotda met laeng;

³ Maysa nga ili a siaagnanayon a manggargari caniac iti imparupa, nga agidaton iti uneg dagiti minuyongan, ken agpuur ti incienso iti rabaw dagiti ladrillo;

⁴ Nga agtugawda iti tengnga dagiti tantanem, ken agdagusda cadagiti nalimed a disdisso; a canenda ti lasag ti babuy, ket ti digu dagiti nacarimrimon a banbanag adda cadagiti longlonganda;

⁵ A cunada, Agtukengca, dica duminna caniac, ta siac nasansantoac ngem sica. Dagitoy isuda ti maysa nga asuc iti agongco, maysa nga apuy a sumged iti agmalmalem.

⁶ Adtoy, naisurat iti sangoanac: diacto agulimec, no di ket manggungunaacto, wen, gungunaacto iti saclotda,

⁷ Dagiti met laeng kinadangkesyo, mairaman dagiti kinadangkes dagiti ammayo, cuna ni Jehova, a nagpuurda iti incienso iti rabaw dagiti banbantay, ket tinabbaawandac iti tapaw dagiti turturod: gapuna umuna rucodecto ti aramidda iti saclotda.

⁸ Castoy ti cuna ni Jehova, Cas iti baro nga arac masaracan iti raay ti uvas, ket ti maysa cunana, dicayo dadaelen, ta maysa a bendicion ti adda kencuana: casta ti aramidecto gapu cadagiti adipenco, tapno diac coma dadaelen ida amin.

⁹ Ket paruarecto ti maysa a putot nga aggapu ken ni Jacob, ken rumuar ken ni Juda maysa nga agtawid cadagiti banbantayco; ket ti pinilic isu tawidennanto, ket dagiti adipenco agtaengdanto idiay.

¹⁰ Ket ti Saron isunto ti maysa a pagaponan dagiti carcarnero, ket ti lobong ti Acor maysa a disso a maipaay a pagiddaan dagiti pangen, a maipaay iti ilic a nangbiruc caniac.

¹¹ Ngem dacayo a nangidian ken ni Jehova, a nanglipat iti nasantoan a bantayco, a nangsagana iti maysa a lamesaan a maipaay ken Gasat, ken mangpunno iti nagampor nga arac ken Signo;

¹² Isignocayto iti campilan, ket dacayo agrucnoycayto iti pannacapapatay; agsipud ta idi immayabac, dicayo simmungbat; idi nagsaoac, dicayo impangag; no di ket inaramidyo daydiay dakes cadagiti matac, ket piniliyo daydiay diac pagragsacan.

¹³ Gapuna a castoy ti cuna ni Apo Jehova, Adtoy, dagiti adipenco mangandanto, ngem dacayo mabisinancayto; adtoy, dagiti adipenco uminumdanto, ngem dacayo mawawancayto; adtoy, dagiti adipenco agrag-odanto, ngem dacayo mabainancayto;

¹⁴ Adtoy, dagiti adipenco agcantadanto a gapu iti rag-o ti puso, ngem dacayo agpuccawcayto a gapu iti ladingit ti puso, ken agdung-awcayto a gapu iti tuoc ti espiritu.

¹⁵ Ket ibatiyonto ti naganyo a maysa a lunod iti pinilic; ket ni Apo Jehova papatayennacanto; ken naganennanto dagiti ad-adipenna iti sabali a nagan:

¹⁶ Iti casta daydiay mangbendicion kencuana met laeng iti daga bendicionanto ti bagina met laeng iti Dios ti pudno; ket daydiay agsapata iti daga agsapatanto iti Dios ti pudno; agsipud ta dagiti immununa a riribuc malipatandan, ken agsipud ta isuda nailemmengda cadagiti matac.

¹⁷ Ta, adtoy, mamarsuaac cadagiti baro a langlangit ken baro a daga; ket dagiti immun-una a banbanag didanto malagipen, didanto mapanunuten.

¹⁸ Ngem agragsaccayo ken agrag-ocayo iti agnanayon iti daydiay a parsuaec; ta adtoy, a parsuaec ti Jerusalem a maysa a pagrag-oan, ken ti umili kencuana a maysa a ragsac.

¹⁹ Ket agrag-oacto iti Jerusalem, ken agragsacacto iti ilic; ket dinto mangngegen kencuana ti timec ti sangit ken ti timec ti aganug-og.

²⁰ Awanton manipud iti daydiay a pannawen ti maysa nga ubing nga ababa ti biagna, uray lacay a tao a di napnoan cadagiti al-aldawna; ta ti ubing matayto inton agsangagasut ti tawenna, ket ti managbasol inton agsangagasut ti tawenna mailunodto.

²¹ Ket isuda bangonendanto dagiti balbalay, ken agtaengdanto cadacuada; ket agmuladanto cadagiti cauvasan, ket canendanto ti bungada.

²² Isuda didanto mangbangon, ket sabali ti agnaed; didanto agmula ket sabali ti mangan; ta cas cadagiti al-aldaw ti maysa a cayo castadanto dagiti al-aldaw ti ilic, ket dagiti pinilic agragsacdanto iti mabayag iti aramid dagiti im-imada.

²³ Isuda didanto agtrabajo iti ubbaw, didanto agpasngay a maipaay iti didigra: ta isuda ti capuonan ti binendicionan ni Jehova, ken ti putotda makiadda cadacuada.

²⁴ Ket maaramidto nga, iti sacbay ti iyaawagda, sumungbatacto; ken iti bayat ti panagsasaoda, denggecto.

²⁵ Ti lobo ken ti cordero aglanglangdanto nga agarab, ket ti leon manganto iti garami a cas iti vaca; ket ti tapoc isunto ti canen ti uleg. Didanto mangranggas, didanto met mangdadael iti amin a nasantoan a bantayco, cuna ni Jehova.