Isaias 64 - Ti Biblia (1973)

Ti cararag gapu iti caasi ken badang.

¹ O no sica burburakem coma dagiti langlangit, ket umulogca coma, ket dagiti banbantay agkintayegda iti saclangmo,

² A cas la no ti apuy uramenna ti ruting, ken ti apuy paburkenna dagiti danum; tapno ipacaammom ta naganmo cadagiti cabusormo, tapno dagiti nacion agarigengenda ita saclangmo!

³ Idi nga inaramidmo dagiti nacakigkigtot a banbanag a saanmi a ninamnama, sica immulogca, dagiti banbantay nagkintayegda iti saclangmo.

⁴ Ta nanipud idi ugma dagiti tattao saanda a nangngeg, saanda met a natimud iti lapayag, uray ti mata di nacakita iti maysa a Dios malacsid kenca, nga agaramid iti maipaay iti daydiay nga agpannuray kencuana.

⁵ Sica sabtem daydiay nga agrag-o ken agaramid iti kinalinteg, dagidiay a manglagip kenca cadagiti daldalanmo: adtoy, sica nagungetca, ket dacami nagbasolcami: nagtalinaedcami cadacuada iti nabayag a pannawen: ket maisalacancamto ngata?

⁶ Ta dacamin amin nagbalincami a cas maysa a narugit, ket amin a kinalintegmi isuda ti cas maysa a narugitan a pagan-anay; ket dacami amin malaylaycami a cas la bulong; ket dagiti kinadangkesmi, cas la iti angin, ipalaisdacami.

⁷ Ket awan ti umawag iti naganmo, nga agregget tapno cumpet kenca; ta sica inlemmengmo ta rupam cadacami, ken rinunawnacami babaen cadagiti kinadangkesmi.

⁸ Ngem ita, O Jehova, sica ti Amami; dacami pilacami, ket sica ti agdamdamili; ket dacami amin gapuanannacami ta imam.

⁹ Dica agunget unay, O Jehova, dica lagipen nga agnanayon ti kinadangkes: adtoy, kitaem, agpacaasicami kenca, nga dacami amin ilinacami.

¹⁰ Dagiti nasantoan nga il-ilim nagbalinda a letlet-ang, ti Sion nagbalin a let-ang, ti Jerusalem maysa a langalang.

¹¹ Ti nasantoan ken naimnas a balaymi, isu nga dagidi ammami nangdaydayawanda kenca, napuuran iti apuy; ket amin a nacaay-ayo a dissomi narnarbada.

¹² Macaibtorca aya gapu cadagitoy a banbanag, O Jehova? agtalnacanto aya, ken paladingitennacamto aya unay?