Isaias 63 - Ti Biblia (1973)

Ti ibabales ti Dios cadagiti nasnacion. Maipalagip dagiti caasi a cadaanan unay. Cararag gapu iti caasi ken badang.

¹ Siasino daytoy a sumungad nga aggapu sadi Edom, a sipapagan-anay iti tinina a naggapu iti Bosra? daytoy a nadayag ti cawesna, a magmagna iti kinadackel ti pigsana? Siac nga agsao iti kinalinteg, mannacabalin a mangisalacan.

² Apay a sica nalabaga iti cawesmo, ken ti pagan-anaymo umasping iti daydiay a nagpayat iti pagpespesan iti uvas?

³ Maymaysaac a nagpayat iti pagpespesan iti uvas; ket cadagiti il-ili awan idi ti tao a nakicadua caniac; wen, payatec ida iti rungsotco, ken binaddebaddecco ida iti pungtotco; ket ti dara ti biagda naiparsiac cadagiti pagan-anayco, ket tinulawac ti amin a cawesco.

⁴ Ta ti aldaw ti panangibales adda idi iti pusoc, ket ti tawen dagiti sinubbotco dimtengen.

⁵ Ket kimmitaac ket awan idi ti timmulong; ket nasdaawac nga awan idi ti mangsaranay: gapuna a ti met laeng tackiagco ti nangyeg ti pacaisalacanan caniac; ket ti pungtotco, isu ti nangalangon caniac.

⁶ Ket impayatco dagiti il-ili iti pungtotco, ket binartecco ida iti rungsotco, ket imbucbocco ti dara ti biagda iti daga.

⁷ Siac saritaecto dagiti kinamanagayat ni Jehova, ken dagitikinadayaw ni Jehova, a mainugot amin a ni Jehova impaayna cadatayo, ken ti dackel a kinaimbag a maipaay iti balay ti Israel nga impaayna cadacuada a mayalubog cadagiti caasina, ken cas iti kinawadwad dagiti kinamanangngaasina.

⁸ Ta kinunana, Pudno, isuda ti ilic, annac a didanto agaramid a siu-ulbod: iti casta isu nagbalin a Mannangisalacan cadacuada.

⁹ Iti amin a ladingitda isu napaladingit, ket ti angel ti saclangna insalacanna ida: iti ayatna ken iti asina sinubbotna ida; ket inawitna ida, ken imbagcatna ida cadagiti amin nga al-aldaw di ugma.

¹⁰ Ngem isuda immalsada, ket pinaladingitda ti nasantoan nga Espirituna: gapuna nga isu nagbalin a cabusorda, ket isu met laeng nakibacal a maibusor cadacuada.

¹¹ Idin nalagipna dagiti al-aldaw idi ugma, ni Moises ken ti ilina, a cunana, Sadino ti yan daydi a nangisang-at cadacuada nanipud iti baybay agraman cadagiti paspastor ti arbanna? sadino ti yan daydi a nangicabil iti nasantoan nga Espirituna iti nagtengngaanda?

¹² Daydi a nangipan ti nadayag a tackiagna iti canawan nga ima ni Moises? daydi a nangbisngay cadagiti dandanum iti sangoananda, tapno aramidenna a maipaay kencuana met laeng a maysa a nagan iti agnanayon?

¹³ Daydiay a nangidalan cadacuada iti caadalman, a cas iti maysa a cabayo iti let-ang, iti casta a dida agtibcol?

¹⁴ Cas cadagiti vacvaca a sumalog iti lobong, ti Espiritu ni Jehova pinaginanana ida: iti casta indalanmo ti ilim, tapno aramidem kenca met laeng a maysa a nadayag a nagan.

¹⁵ Tumannawagca manipud langit, ket cumitaca manipud iti pagtaengan ta kinasantom ken gloriam: sadino ti yan ti kinaregtam ken maingel nga aramidmo? ti panagiliw ta pusom ken dagita panangngaasim nalappedanda caniac.

¹⁶ Ta sica ti Amami, nupay ni Abraham saannacami nga ammo, ken ni Israel dinacami bigbigen: sica, O Jehova, sica ti Amami; Mannubbotmi isu ti naganmo manipud iti agnanayon.

¹⁷ O Jehova, apay a pinagbawingnacami cadagiti daldalanmo, ken pinatangkenmo ti pusomi iti di panagbuteng kenca? Agsublica gapu cadagiti ad-adipenmo, dagiti putputot ti tawidmo.

¹⁸ Ti nasantoan nga ilim isu tinagicuana iti bassit a pannawen: dagiti cabusormi pinayatpayatda ti santuariom.

¹⁹ Agbalincami a cas cadagidiay nga uray caano dica nagturayan, cas cadagidiay saan a nainaganan iti naganmo.