Isaias 62 - Ti Biblia (1973)

Ti dayag ti Sion ken ti baro a naganna. Ti panaguray iti pannacaisalacan a naicari.

¹ Gapu iti Sion diacto agtalna, ken gapu iti Jerusalem diacto aginana agingga iti iruruar ti kinalintegna a cas raniag, ken ti pannacaispalna a cas maysa a silaw a dumardarang.

² Ket dagiti nasnacion makitadanto ta kinalintegmo, ken amin nga ar-ari dayta dayagmo; ket sica managanancanto iti baro a nagan, nga inagananto ti ngiwat ni Jehova.

³ Sicanto met ti maysa a balangat ti kinaimnas iti ima ni Jehova, ken naarian a diadema iti ima ti Diosmo.

⁴ Saancanton a managanan iti Nabaybay-an; ket dinto met managananen ta dagam iti Langalang: no di ket sica managanancanto iti Hebsiba, ken iti dagam iti Beulah; ta ni Jehova agrag-o kenca, ken ti dagam maasawanto.

⁵ Ta cas ti agtutubo a lalaki mangasawa iti maysa a virgen, castanto ti panangasawa kenca dagiti annacmo a lallaki; ket cas ti novio agragrag-o iti novia, castanto ti panagrag-o ti Dios kenca.

⁶ Siac nangisaadac cadagiti agwanawan iti rabaw dagiti bacbacudmo, O Jerusalem; isuda didanto agtalna uray caano iti aldaw uray iti rabii: dacayo a mangipalpalagip ken ni Jehova, dicayo aginana,

⁷ Ken dicayo paginanaen agingga iti Isu mangpasingked, ken agingga iti maaramidna ti Jerusalem a maysa a dayaw ti daga.

⁸ Ni Jehova insapatana babaen iti imana a canawan, ken gapu iti tackiag ti pigsana, Pudno a diacto itdenen ti trigom a canen dagiti cabcabusormo; ket dagiti gangannaet saandanto nga uminumen iti baro nga aracmo, a sica nagbannogam.

⁹ No di ket dagiti nangyagamang kencuana isuda met laeng ti manganto, ket dayawendanto ni Jehova; ket dagiti nagburas iti uvas isuda met laeng ti uminumto kencuana cadagiti paraangan ti santuarioc.

¹⁰ Sumreccayo, sumreccayo cadagiti ruruangan; saganaenyo ti dalan ti ili; gaburanyo, gaburanyo ti dalan; iccatenyo dagiti batbato; mangibayog cayo iti wagayway a maipaay cadagiti il-ili.

¹¹ Adtoy, ni Jehova inwarragawagna agingga iti pungto ti daga, Saoenyo iti anac a babai ti Sion, Adtoy, ti pannacaisalacanmo umay; adtoy, ti panggongonana adda kencuana, ken ti pangsupapacna iti sangoananna.

¹² Ket naganendanto ida iti nasantoan nga ili, Ti sinubbot ni Jehova: ket sica managanancanto iti Nabirucan, Maysa nga ili a di nabaybay-an.