Isaias 61 - Ti Biblia (1973)

Ti pannacaitan-oc dagiti napaldaang.

¹ Ti Espiritu ni Apo Jehova adda caniac; ta ni Jehova pinulotannac a mangicasaba cadagiti naimbag a damdamag cadagiti naemma: imbaonnac a mamatapat iti puso a nadunor, a mangiwarragawag iti wayawaya cadagiti nacayawan, ken ti pannacaluc-at cadagiti nabalud;

² A mangiwarragawag iti tawen ti parabur ni Jehova, ken ti aldaw ti ibabales ti Diostayo; a mangliwliwa iti amin nga agdung-aw;

³ A mangipaay cadagidiay nga agdung-aw idiay Sion, a mangted cadacuada iti balangat iti lugar ti dapu, ti lana ti rag-o iti lugar ti dung-aw, ti pagan-anay ti dayaw iti lugar ti espiritu ti ladingit; tapno managananda coma caycayo ti kinalinteg, ti panagmulmula ni Jehova, tapno madaydayaw coma.

⁴ Ket isuda bangonendanto dagiti cadaanan a langalang, patacderendanto dagiti immun-una a narba, ken isuda tarima-anendanto dagiti naracrac nga il-ili, dagiti pannacarba dagiti adu a caputotan.

⁵ Ket dagiti gangannaet agtacderdanto ken pacanendanto dagiti pangenyo, ket dagiti sangsangaili agbalindanto a pagararadoenyo ken agaywan iti inuvasanyo.

⁶ Ngem dacayo managanancayto papadi ni Jehova; dagiti tattao naganendacayto ministros ti Diostayo: canenyonto dagiti sanicua dagiti nasnacion, ken iti dayagda maitan-occayto.

⁷ Iti lugar ti pacaibainanyo maminduacayto a maidayaw; ket iti lugar ti pacarabngisan dagiti adipenco agragsacdanto iti biangda: gapuna nga iti dagada cupicupandanto ti mamindua; agnanayon a rag-o ti addanto cadacuada.

⁸ Ta siac, ni Jehova, ayatec ti kinajusticia, guraec ti panagtacaw agraman kinadangkes; ket itdecto a sipupudno, cadacuada ti gungunada, ket agaramidacto ti agnanayon a tulag cadacuada.

⁹ Ket ti capuonanda maammoanto iti tengnga dagiti nasnacion, ken ti caputotanda iti tengnga dagiti il-ili: isu-amin a macakita cadacuada mabigbigdanto ida, nga isuda ti putot a binendicionan ni Jehova.

¹⁰ Siac agragsacacto unay ken ni Jehova, ti cararuac agrag-onto iti Diosco; ta isu kinawesannac cadagiti pagan-anay ti pannacaisalacan, isu inabbongannac iti lambon ti kinalinteg, a cas maysa a novio nga agbalangat, ken cas maysa a novia nga agaramat cadagiti alajasna.

¹¹ Ta cas ti daga iruarna ti buselna, ken cas ti minuyongan patuboenna dagiti banbanag a maimula kencuana; casta ti panangpatubo ni Apo Jehova iti kinalinteg ken panagdayaw iti saclang dagiti amin a nasnacion.