Isaias 60 - Ti Biblia (1973)

Ti maipapan ti nagloriaan a Sion.

¹ Tumacderca, agraniagca; ta ti lawagmo umay, ket ti dayag ni Jehova lumgac kenca.

² Ta, adtoy, ti kinasipnget abungotanna ti daga, ket ti napuscol a kinasipnget cadagiti il-ili; ngem ni Jehova lumtuadto kenca, ket ti dayagna makitanto iti rabawmo.

³ Ket dagiti nasnacion umaydanto ita lawagmo, ken dagiti ar-ari iti raniag ta ileleggacmo.

⁴ Itangadmo dagita matam iti aglicmut ket cumitaca: isuda amin agguurnongda, umayda kenca; dagiti annacmo a lallaki umaydanto nga aggapuda iti adayu, ket dagiti annacmo a babbai masacroydanto cadagiti tactackiag.

⁵ Iti casta makitamto ket agraniagca, ket ta pusom agrag-onto ken mapadackelto; agsipud ta ti kinawadwad ti taaw agturongdanto kenca, ti sanicua dagiti nasnacion umayto kenca.

⁶ Ti kinaadu dagiti camcamello abbongandacanto, dagiti dromedarios a taga Madian, ken taga Efa, isuda amin manipud sadi Seba umaydanto; isuda mangyegdanto iti balitoc ken incienso, ket iwarragawagdanto dagiti pannacadaydayaw ni Jehova.

⁷ Isu-amin a pangen ti Cedar maurnongdanto kenca, dagiti carcarnero a lallaki ti Nebayoth agservidanto kenca; umaydanto a macaayayo iti altarco; ket padayawecto ti balay ti dayagco.

⁸ Asinoda aya dagitoy nga agtayab a cas la ulep, ken cacas la calcalapati cadagiti tawada?

⁹ Pudno a dagiti purpuro agpannuraydanto caniac, ket dagiti sasacayan ti Tarsis nga umuna, a mangyeg cadagiti annacmo a lallaki nga aggapu ti adayu, ti piracda ken balitocda agraman cadacuada, maipaay iti nagan ni Jehova a Diosmo, ken maipaay iti Santo ti Israel, agsipud ta isu ti nangpadayag kenca.

¹⁰ Ket dagiti gangannaet bangonendanto dagiti bacudmo, ket dagiti arida agservidanto kenca ta iti pungtotco sinaplita, ngem iti paraburco kinaasianca.

¹¹ Dagiti met ruanganmo cancanayondanto a silulucat; didanto maripcan iti aldaw uray iti rabii; tapno dagiti lallaki mabalinda coma a yeg kenca ti sanicua dagiti nasnacion, ket dagiti arida macayawanda.

¹² Ta dayta a nacion ken pagarian a dinto agservi kenca mapucawto; wen, dagidiay a nasnacion marbadanto a naananay.

¹³ Ti dayag ti Libano umayto kenca, ti parwa, ti saleng, ken ti alamo nga agtitimpuyog, tapno pasayaatenda ti lugar ti santuarioc; ket aramidecto ti disso dagiti sacsacac a nagloriaan.

¹⁴ Ket dagiti annac a lallaki dagidiay a namaladingit kenca umaydanto a sirurucnoy kenca, ket amin dagiti nanguyuyaw kenca agrucnoydanto cadagiti dapanmo; ket naganendacanto Ti Ili ni Jehova, Ti Sion ti Santo ti Israel.

¹⁵ Idinto a sica naidianca ken naguraca idi, iti casta nga awan ti tao a limmasat kenca, aramidencanto a maysa a kinadaeg iti agnanayon, maysa a ragsac dagiti adu a caputotan.

¹⁶ Sica met susopemto ti gatas dagiti nasnacion, ket susopemto dagiti barucong dagiti ar-ari; ket sica maammoamto a siac, ni Jehova, ti Mannangisalacan kenca, ken Mannubbot kenca ti Mannacabalin ni Jacob.

¹⁷ Iti lugar ti suer mangyegacto ti balitoc, ket iti landoc mangyegacto ti pirac, ket iti cayo ti suer, ken iti batbato ti landoc. Ket aramidecto met dagiti pagturayem a talna, ken dagiti agsingsingir ti buis a nalinteg.

¹⁸ Ti panagrabsut dinto mangngegen iti dagam, ti pannacaracrac ken pannacarba cadagiti beddengmo; no di ket sica naganemto dagiti bacudmo iti Pannacaisalacan, ken dagiti ruanganmo iti Dayaw.

¹⁹ Ti init saanton nga isu ti lawagmo iti aldaw; uray ti raniag ti bulan dinanto itden ti lawagna kenca: no di ket ni Jehova isunto ti agnanayon a silawmo, ket ti Diosmo ti dayagmo.

²⁰ Ti initmo dinto lumneken, uray ti bulanmo dinto bumassit; ta ni Jehova isunto ti agnanayon a lawagmo, ket dagiti aldaw ti panagpanesmo manungpaldanto.

²¹ Ti umilim met nalintegdanto amin; isuda tawidendanto ti daga iti agnanayon, ket ti sanga ti panagmulmulac, ti aramid dagiti im-imac, tapno madaydayawac.

²² Ti bassit agbalinto a sangaribu, ket ti cabassitan maysa a napigsa a nacion: Siac, ni Jehova, aramidecto a nadaras iti pannawenna.